Read dhopadhola Tim pa Jomoor 3 Bible Online

Tim pa Jomoor 3 - dhopadhola bible

Tim pa Jomoor 3

¹Ndelo moro Petero kodi Yohana oyido jokidho i Ot pa Were sawa abuŋwen m'othieno, i hongo ma kwayo.

²Kenyo, dho Waŋkac Maŋon, paka oyido ilwoŋo, oyido nitie dhano m'oŋol wok i nywolirok pere. Ndiri je bin itiŋo atiŋa ŋato aka ikelo go dho waŋkac me kwayo pesa bongi joma donjo i Ot pa Were.

³Munyo go oneno Petero kodi Yohana jodonjo, okwayo jo ni jowomiy ye go gimoro.

⁴Joŋiyo go nyatirtir to Petero waco ni, “Ŋiy wan!”

⁵Gikenyo go oŋiyo jo, munyo geno limo gimoro bongi jo.

⁶Aka Petero owaco rigo ni, “Angoye gi zahabu kosa feza, t'abino miyin gima an gine. I nyingi Yesu Kristo ma Nazareth, aorin ni woth!”

⁷Gikenyo Petero omako cinge maracuc to konyo go to ay malo. Piyo piyo no olenge tiendi jalo kodi odondo je jobedo m'ocwiny;

⁸go opor malo, ocungo gi tiende to cako kisedela gi woth. Gikenyo go odonjo i Ot pa Were gi jo, munyo wotho aka por malo gi pako Were.

⁹Lwak ji je joneno go munyo wotho aka pako Were.

¹⁰Aka munyo joŋeyo ni meno jakwac ma yado bedo dho Waŋkac Maŋon ma Ot pa Were, jouro swa aka jobedo gi dhier kwoŋ gim'otimere rigo.

¹¹Munyo fodi jalo ocwire kwoŋ Petero gi Yohana, ji je jodhier aka joringo bongi jo I Kalikondi pa Solomon, paka oyido ilwoŋo.

¹²Munyo Petero oneno gime, owaco rijo ni, “Ji ma Isiraili raŋo ma wiuro gime, kosa raŋo ma wicomo waŋ win kwoŋ wan? Wiparo nike gi meni mawan won, kosa ni rupiri waŋeyo lamo Were maber am'omiyo ŋatin wotho?

¹³Kole Were pa Abraham, Isaka, kodi Yakobo, Were pa kwarere mawan, am'omiyo Yesu Jatic pere dwoŋ. Wibolo go i cingi jodhum aka wikwedo go ruwaŋ Pilato, kada munyo Pilato onwaŋo otieko ridho gunyo go.

¹⁴Kole go oyido leŋ aka ber, to wikwero go, kucel wikwayo Pilato ni wogonyi riwin janek ayino.

¹⁵Wineko Won kwo, to Were cerino go kwoŋ jom'otho; aka wabedo jokony ma joneno gime.

¹⁶Kole nyingi Yesu kodi yeyo kwoŋ nyinge am'omiyo jal ma wiŋeyo me kilam ama ruwaŋ wijoje.”

¹⁷“Onyo pama, wutmera, aŋeyo nike gima win kodi jotel mewin witimo ri Yesu obedo gima witimo ma wikuya.

¹⁸Me a gima Were cango owaco gi i dhok jotuci wac pere ni Kristo ripo candere; aka am'omiyo gino otimere adieri i royo me.

¹⁹Am'omiyo, ŋuti win reco mewin wigik bongi Were, ŋey reco mewin worey woko, aka ŋey hongo ma kelo lothi manyen wok bongi Rwoth wobin riwin,

²⁰aka go wodhiri riwin Kristo, ma go otieko yero riwin, m'obedo Yesu.

²¹Go ripo doŋ i polo cuka ndir otundi ma Were odwok'iye gigipiny je i kare, paka Were owaco gi i dhok jotuci wac pere ma cango con.

²²Kole Musa cango owaco ni, ‘Rwoth Were mewin bino dhiro riwin jatuci wac Were ma bino wok kwoŋ ji mewin won paka odhiran bongi win ama. Wiripo ciko ithi win wiwinji gimoro je ma go owaci riwin.

²³Nyatoro je ma k'owinji wac pere, ibino kwanyo go woko kwoŋ ji pa Were to ireyo go woko.’

²⁴To jotuci wac Were je wok kwoŋ Samwiri kodi jom'oluwo ŋeye joje ma jobedo gi mikwenda, bende joluwo kwoŋ ndelo agono.

²⁵Aka wibedo jolunji gima jotuci wac Were cango joluwo kwoŋe i cikirok ma Were otimo gi kwarere mewin, munyo owaco ri Abraham ni, Abino miyo ji je ma piny silwany wok kwoŋ kodhi perin.

²⁶Am'omiyo Were oyero aka okutho open dhiro jatic pere bongi win won, womiy win silwany munyo wiro wijoje ni wieye woko i yo mewin mareco.”