Read dhopadhola Tim pa Jomoor 4 Bible Online

Tim pa Jomoor 4 - dhopadhola bible

Tim pa Jomoor 4

¹Munyo Petero gi Yohana oyido fodi joluwo ri ji, jocway ri Were i wi migam, jotel pa jokur ma Ot pa Were, kodi Josadukayo jobino to jobwoko jo.

²Nge oyido omako jo ni rupiri jomoor ario no oyido jofonjo ji nike otiek cerino Yesu kwoŋ jom'otho, ma nyutho nike jom'otho jobino cerino.

³Ameno jomako jo to jobolo jo i od twec cuka yawere mere, paka piny oyido otieko yutho.

⁴To ji mathoth ma jowinjo mikwenda no joyeyo rigin, aka welo pa cwo omedere otundo cegin gana abic.

⁵Yawere mere jodhum kodi jotel pa Joyuda, kodi Jondiko jocokere Yerusalem,

⁶kodi Anas, jadwoŋ pa jocway ri Were i wi migam, kodi Kaifas, kodi Yohana, kodi Alekizanda, kodi ji je m'oyido jokweth ma nono pa jotel pa jocway ri Were i wi migam.

⁷Jomiyo jomoor no cungo i dier jo aka jopenjo jo ni, “Witimo gime nedi?”

⁸Gikenyo munyo Cuny Maleŋ opoŋ kwoŋ Petero, odwoko ni, “Jodhum kodi jotel pa ji,

⁹k'inen konon wipenjo wan kwoŋ bero m'otimi ri ŋat'oŋol kodi paka obedo maber,

¹⁰ber wijoje wiŋeyi, aka ji je ma Isiraili jowoŋey, nike ŋati me cungo ruwaŋ win m'olama adieri ro meni pa Yesu Kristo Janazareth ma wiguro kwoŋ musalaba aka Were ocerino go kwoŋ jom'otho.

¹¹Yesu won a ŋata ndiko luwo kwoŋe ama.” “Kole tele won ma jogeto jocayo ni bukony, am'olokere tele ma thielo kindi ot.”

¹²“Aka both kinwaŋere bongi ŋatiman, rupiri ongoye nyingi nyatoro man je i piny gipi, ma Were omiyo ji, ma waripo nwaŋ'iye both.”

¹³Jokweth ma pido jodhier munyo joneno miseni pa Petero gi Yohana, gi ŋeyo nike me ji moro ma jok'ofonjere kada. Gikenyo joniaŋ nike jome yado jobedo bongi Yesu.

¹⁴To onwaŋo ongoye gimoro ma di jonyal waco, rupiri joneno jal m'obothi no ocungo kenyo gi Petero gi Yohana.

¹⁵Am'omiyo jowaco ri Petero gin ni jowoeye i kapido, to jocako kikaŋasa wac wegi kendi gin.

¹⁶Jopenjere ni, “Wanotim aŋo gi jome? Dhano je ma Yerusalem oŋeyo nike jome jotieko timo gir'aura madwoŋ me, aka wakinyali kwero.

¹⁷To ma geŋo wac me medo nyay i dier ji, weyi wawaci rijo nike kiri jowomedi luwo kendo ri nyatoro je i nyingi ŋato.”

¹⁸Gikenyo jolwoŋo jo dwoko aka jociko jo teltel ni kiri jowofonji i nyingi Yesu.

¹⁹To Petero gi Yohana jodwoko ni, “Wiwegi thum win gim'otire atima ruwaŋ Were, winjo win, kosa winjo Were;

²⁰rupiri wakinyali weyo luwo kwoŋ gima wawegi watieko neno gi winjo.”

²¹Jopido jomedo bwoko jo gi meni swa, to joweyo jo jokadho. Jok'oneno yo ma di jomiyo gine jario no gir'acula, rupiri ji je oyido jopako Were kwoŋ gim'otimere.

²²Aka ŋata gir'aura ma both otimere kwoŋe no oyido kalo oro piero aŋwen.

²³Tekin itieko weyo jo, Petero gi Yohana jogik i kweth pajo to jowaco ri jowot gin gima jotel pa jocway ri Were i wi migam kodi jotel pa ji jowaco.

²⁴Munyo jowinjo gime, jo je joriwere kanyacel i kwayo Were ni, Rwoth ma Jacwec ma polo gi piny, kodi wakawaka kodi gima nitie iye je!

²⁵Cango iluwo i Cuny Maleŋ gi dhok kwari wan Daudi, jatic perin ni, Raŋo ma Jopath jonigi keme?

²⁶Kerere ma piny joyikere, aka jodhum joromo kanyacel, kwinyo Rwoth kodi Kristo (m'owir gi mo) pere!

²⁷Kole adieri Herode kodi Ponsio Pilato joromo kanyacel i tindi me gi Jopath kodi ji ma Isiraili ma cano timo reco ri Yesu, Jatic perin Maleŋ, m'iwiro gi mo.

²⁸Jocokere ma timo gimoro je ma in, gi meni perin kodi mito perin, oyido itieko yiko ni d'otimere.

²⁹Aka pama, Rwoth, neni paka jobwoko wan, am'omiyo miy jotic perin meni ma tito mikwenda perin gi miseni.

³⁰Riey cingin ma botho ji, itimi ranyuth ma gir'aura kodi gidhier i nyingi jatic perin maleŋ, Yesu.

³¹Munyo jotieko kwayo, kam'onwaŋo jontie iye oyengere. Cuny Maleŋ opoŋ kwoŋ jo to jocako luwo wac pa Were gi miseni.

³²Kitipa pa jom'oyeyo obedo acel i paro kodi i cuny gin. Ongoye ŋat'owaco ni lim pere obedo mar'aora pere kende, to apa ji je.

³³Jomoor jothielo wac ma cerino pa Rwoth Yesu gi meni m'oasere, aka joje jonwaŋo nema madwoŋ.

³⁴Ongoye moro i kitipa pajo m'oyido cando gimoro, rupiri jom'onwaŋo jonitie gi lowo kosa udi jotana to jokelo pesa mere

³⁵to joketho i cingi jomoor. Meno ama bin ipoko dhano je man kitipa m'onwaŋo cando gimoro.

³⁶Gikenyo Yozefu, Jalevi m'onywol Sipuro, ma jomoor jolwoŋo ni Barinaba (dwoŋ mere ni, Ŋata miyo miseni.)

³⁷Otana lowo pere, to kelo pesa mere to miyo jomoor.