Read dhopadhola Tim pa Jomoor 5 Bible Online

Tim pa Jomoor 5 - dhopadhola bible

Tim pa Jomoor 5

¹To onwaŋo nitie nyatoro m'ilwoŋo ni Anania, gi cege ma nyinge Safira, ma jotana lowo pajo moro.

²To go okano pesa moro ma konyirok, aka cege oŋeyo gime, to m'odoŋ ama go otero ri jomoor.

³Petero owaco rigo ni, “Anania, raŋo m'iyeyo Sitan odonjo i cunyin to miyin itwodo ri Cuny Maleŋ to ikano adec ma pesa m'ilimo i lowo perin?

⁴Mafodi ikitana lowo no, onwaŋo k'obedo aperin? Aka munyo itieko kitana, pesa mere oyido k'obedo aperin? To raŋo ma iridho i cunyin nike itimi gima pameno? Ikiwondo ji to iwondo Were won!”

⁵Tekin Anania winjo gime, ogore piny to tho, aka dhano je m'owinjo gime, lworo opoŋ kwoŋe.

⁶Yac moro jodonjo, jotweyo go gi suka to jotero go to joyiko go.

⁷Munyo hongo okadho ma romo sawa adek, cege bende odonjo ma k'oŋeyo gim'oyido nende otimere.

⁸Petero openjo go ni, “Waci ran, me oyido a gima in gi cworin wilimo gipi i gimewin?” Go odwoko ni, “Ey, meno won a welo mere.”

⁹Gikenyo Petero owaco rigo ni, “Raŋo ma in kodi cworin wiyiko paro ma temo Cuny Maleŋ? Neni! Joma jowok yiko cworin eno jokonjere dhiot, aka jobino tiŋin jowoterin woko bende!”

¹⁰Gikenyo won to dheno podho piny dho ka tiendi Petero to tho. Yac ca jodwoko, aka munyo jonwaŋo go otho, jotiŋo go bende to jokidho yiko go kabuti cwore.

¹¹Kitipa pa jom'oyeyo gibe gi joman ma jowinjo gino lworo madwoŋ opoŋ kwoŋ jo.

¹²Jomoor jotimo ranyuth ma gir'aura madit i dier ji. Jom'oyeyo bin joromo i kalikondi pa Solomon.

¹³Ongoye ŋatimoro man ma k'obedo jakweth pajo m'otemo riwirok gi jo, kada ji oyido jomiyo jo dwoŋ.

¹⁴Kad'ameno welo pa cwo kodi mon ma jomedo yeyo Rwoth oidho malo mayot.

¹⁵Ranyuth m'omore kodi gir'aura otim i waŋ ji gi cingi Jomoor ma kiri jotwo bin itero jo i royo m'okare ma tindi to jobedo kenyo i kanindo kodi i par pajo munyo jogeno ni kada nyaka tipo pa Petero wogey jomegi kwoŋ jo ka go kadho kenyo.

¹⁶Ji bende jowok i tindi m'othoko Yerusalem to jocokere kenyo munyo jokelo jotwo kodi joma cuny m'ocido cando jo, aka joboth joje.

¹⁷Gikenyo jadwoŋ pa jocway ri Were i wi migam kodi wadi je, ma kweth pa Josadukayo, jobedo gi nyeko madwoŋ ri jomoor.

¹⁸Jomako jomoor to joketho jo i od twec man kenyo.

¹⁹To i wor no, malaika pa Rwoth oyawo waŋkac ma od twec, to wodho woko jomoor, to waco rijo ni,

²⁰“Kidhi win wicungi i Ot pa Were, aka wiwaci ri ji je kwoŋ kwo manyen me.”

²¹Munyo ŋamba oriedo, jomoor jodonjo i Ot pa Were to jocako fonji paka owaci rijo. Munyo jadwoŋ pa jocway ri Were i wi migam kodi wadi jotundo, jolwoŋo jotel pa Joyuda kanyacel bedo i romo m'opoŋ i kapido. Gikenyo odhiro wac i od twec nike wokel jomoor bongi jo.

²²To munyo josirikale jotundo, jok'onwaŋo jomoor; gikenyo jogik to jodwoko wac ri jopido ni,

²³“Munyo watundo i od twec wanwaŋo ocegi aka jokur je oyido jocungo kenyo; to munyo wayawo wakinwaŋo moro kad'acel iye.”

²⁴Munyo jasirikale ma telo jokur ma Ot pa Were kodi jotel pa jocway ri Were i wi migam jowinjo gime, jodhier swa, kareno joparo kwoŋ gim'obedi ro wac no.

²⁵Gikenyo dhano moro odonjo to waco rijo ni, “Neni win ji ma wirwako i od twec icade jocungo i Ot pa Were jofonjo ji.”

²⁶Gikenyo jasirikale okadho gi ji pere to dwoko gi jomoor. Jok'oro meni, rupiri jolworo ni ji jonyalo goyo jo gi telin.

²⁷Jorwako jomoor i ot to jomiyo jo cungo ruwaŋ kitipa pa jopido, to jadwoŋ pa jocway ri Were i wi migam osa jo ka waco ni,

²⁸ “Nyoro waciko win ni wiŋuti ro meno, wikiri widok wifonji i nyingi ŋato, to kole onyo wipoŋo Yerusalem gibe gi fonji mewin, aka wimito ridho ni tho pa jame obedo gimarac mawan.”

²⁹Petero gi jomoor man jodwoko ni, “Waripo winjo or pa Were makiweno apa ji.

³⁰Were pa bacere wan ama ocerino Yesu ma wiguro kwoŋ yath to wineko.

³¹Were ocerino go aka oketho go yuracuc pere paka Jadhum kodi Jaboth, womiy Isiraili hongo ma ŋuto gi limo cwaki mareco pajo.

³²Kendo wan wabedo jokony i gigipiny me. Wa jokony kanyacel gi Cuny Maleŋ mic pa Were ri joma winjo or pere.”

³³Munyo jokweth ma pido jowinjo gime jolimo nge mathoth to joridho nike woneki jomoor.

³⁴To ŋat'acel kwoŋ jo m'ilwoŋo ni Gamaliel ma Jafarisayo, odoko jafonji ma Cik ma jomiyo dwoŋ swa, ocungo i pido, to oro jo wodho woko jomoor, ma hongo mathin,

³⁵to waco ri jopido ni, “Joisiraili, gwokere win kwoŋ gima wiyenyo timo ri jome.

³⁶I hongo m'okadho Thiodas okethere munyo ŋoyo ni go ŋatimoro madwoŋ; ji ma romo miya aŋwen joluwo go. To kole oneki go, to jom'oyido joluwo go jokedhere woko, to kitula pere rere woko.

³⁷Rumacen, Yuda ma Jagalili bende owok kamaler i hongo ma kwano ji; go oywayo ji megi bonge to kole oneki go bende, to jom'oyido joluwo go jokedhere woko.

³⁸Am'omiyo i wac pa jome, wikiri witim gimoro kwoŋ jo. Weyi win jo, rupiri ka atoŋa kodi tim pajo obedo yiko pa dhano, meno won bino rumo woko,

³⁹to ka wok bongi Were wikibino nyalo geŋo jome. Winyalo poyo ni wilwenyo gi Were won.” Jopido jowinjo rieko ma Gamaliel omiyo jo.

⁴⁰Jolwoŋo jomoor no i ot, to jomiyo or ni wocwadi jo, aka jopiro jo ni kiri jowomedi luwo i nyingi Yesu, nyaka to jogonyo jo.

⁴¹Jomoor joeye i kapido gi kisangala madwoŋ ni Were oparo kwoŋ jo ni joripo limo acanda ma kite no i nyingi Yesu.

⁴²Aka piny m'oyawere je jomedere gi fonjo ji Wac Manyen Maber ma Kwoŋ Yesu Kristo, i Ot pa Were kodi i pecin pa ji.