Read dhopadhola Tim pa Jomoor 6 Bible Online

Tim pa Jomoor 6 - dhopadhola bible

Tim pa Jomoor 6

¹I hongo me munyo welo pa jofonjirok medere dito, Joyuda ma joluwo Dhogrik joero kiŋunyaŋunya kwoŋ Joebulaniya. Joyuda ma joluwo Dhogrik jowaco ni mon tho pajo kipar kwoŋ jo odoco i pok ma kisi ndelo.

²Am'omiyo Jomoor apar g'ario jolwoŋo kweth pa jofonjirok gipi kanyacel to jowaco ni, “Kiripi ka waweyo tic ma fonjo Wac pa Were to wayindin gi tic ma poko cemo ayin.

³Am'omiyo, wutmin wan, yeri win cwo abirio i dier win ma wiŋeyo ni jopoŋ gi Cuny Maleŋ kodi rieko, aka wabino ketho jo i tic me.

⁴Aka wawegi wabino liŋ i tic ma kwayo kodi fonji.”

⁵Lwak ji gibe josangala gi wac pa jomoor, to joyero Stefano, jal m'opoŋ gi yeyo kodi Cuny Maleŋ; kodi Filipo, kodi Purokoro, kodi Nikanor, kodi Timon, kodi Parmena kodi Nikolao, Japath m'odonjo i dini pa Joyuda wok Antiok.

⁶Jokelo jono ruwaŋ jomoor, to jokwayo rijo, to joketho cingi gin kwoŋ jo.

⁷Gikenyo Wac pa Were omedere nyay. Welo pa jofonjirok ma Yerusalem omedo idho malo ma piyo, aka jocway ri Were i wi migam mathoth jojolo to yeyo.

⁸Stefano, dhano ma Were oŋaŋo gi nema aka oasere gi meni, otimo gigipiny madongo ma kelo dhier kanyacel gi gir'aura i dier ji.

⁹To ji megi, m'oyido jobedo jokweth ma kalamo pa jom'ogony (paka onwaŋo ilwoŋo jo), kodi jokalamo ma Sireno kodi ma Alekizandiria, jopiemo gine. Jono gi Joyuda man ma jowok Silisia kodi Asia jocako piem gi Stefano.

¹⁰To Cuny Maleŋ omiyo Stefano rieko ma munyo luwo jok'onyalo ciro go.

¹¹Am'omiyo jonyewo ji moro ma jowaco ni, “Wawinjo go luwo gima k'otire kwoŋ Musa kodi Were!”

¹²Ameno jonyalo kisigila ji kodi jotel pa ji kodi Jondiko. Jobino bongi Stefano, jomako go, to jotero go i kapido.

¹³Gikenyo jokelo ji moro ma jotwodo kwoŋ Stefano, ka jowaco ni, “Jame ndir je luwo aluwa marac kwoŋ Ot maleŋ mapa Were mawan kodi kwoŋ Cik pa Musa.

¹⁴Aka wawinjo munyo go waco nike Yesu ma Nazareth me bino ŋinyo woko Ot pa Were to wiro woko kula je ma wanwaŋo bongi Musa!”

¹⁵Ji je ma jobedo i kapido jocomo waŋ gin kwoŋ Stefano aka joneno ni waŋe ocale kodi waŋ malaika.