Read dhopadhola Tim pa Jomoor 9 Bible Online

Tim pa Jomoor 9 - dhopadhola bible

Tim pa Jomoor 9

¹Saulo oyido fodi medere i hongo no gi ywoyo wac ma bwoko gi neko jofonjirok pa Rwoth. Okidho bongi jadwoŋ pa jocway ri Were i wi migam,

²to kwayo balwa ma dhiro go i kalamo pa Joyuda i Damasiko, ni k'onwaŋo joma luwo royo pa Rwoth kenyo, wonyali mako jo, cwo gi mon, to dwoko jo Yerusalem.

³Munyo go fodi oyido ni royo kidho Damasiko, mafodi k'otundo i tindi, lero owok i polo to umo go ni fungu.

⁴Go ogore piny to winjo dwondi jo ma waco rigo ni, “Saulo Saulo! Raŋo m'ilwenyo kodan?”

⁵Go openjo ni, “In iŋa, Rwoth?” Dwondi jo no odwoko ni, “An Yesu m'ilwenyo gine.

⁶To ay malo ikidhi i tindi, kam'ibino waco rin'iye gim'inotimi”

⁷I hongo no ji m'onwaŋo jowotho gi Saulo oyido jocungo, m'ongoye wac ma jowaco; jowinjo dwondi jo no to jok'oneno nyatoro.

⁸Saulo oay malo kam'onwaŋo opodh'iye to yawo waŋe, to k'onyalo neno gimoro. Gikenyo jomako cinge to jotero go Damasiko.

⁹I hongo ma ndelo adek go k'onyalo neno gimoro, aka i hongo no go k'onyalo cemo kosa madho gimoro.

¹⁰Onwaŋo nitie i Damasiko jafonjirok moro m'ilwoŋo ni Anania. Ŋato olimo lek ma Rwoth owac'iye rigo ni, “Anania!” Odwoko ni, “Anika, Rwoth.”

¹¹Rwoth owaco rigo ni “Yikere ikidhi i Royo m'ilwoŋo ni Nyatirtir, aka ipenji dhano ma wok Tariso m'ilwoŋo ni Saulo i ot pa Yuda. Go nitie i kwayo pama won me.

¹²Aka, i lek, go oneno dhano m'ilwoŋo ni Anania munyo donjo to ketho cinge kwoŋe ŋey go wocaki neno kendo.”

¹³Anania odwoko ni, “Rwoth, kole ji mathoth jotieko luwo ran kwoŋ gigipiny mareco ma ŋato otieko timo ri ji perin maleŋ ma Yerusalem.

¹⁴Aka go obino Damasiko gi meni ma jotel pa jocway ri Were i wi migam jomiyo go ma mako nyatoro je ma yeyo i nyingin.”

¹⁵Rwoth owaco rigo ni, “Kidhi, rupiri atieko yero go wotiy ran, ma miyo nyingan ŋeyirok bongi Jopath kodi kerin, kodi nyithindho pa Isiraili.

¹⁶Aka abino nyutho go paka go ripo candirok ran.”

¹⁷Gikenyo Anania okidho, odonjo i ot to ketho cinge kwoŋ Saulo ka waco ni, “Omera Saulo, Rwoth Yesu m'omenyere rin i royo munyo ibino ka, ooran nike inyal neno kendo ipoŋ gi Cuny Maleŋ.”

¹⁸Piyo piyo gimoro ma cale magambala ohale wok i waŋe to podho, to go cako neno kendo. Gikenyo go oay malo t'imiyo go batisimo,

¹⁹aka munyo otieko cemo, meni pere odwoko. Saulo obedo ndelo manok gi jofonjirok i Damasiko.

²⁰Go okidho nyatirtir i kalamo pa Joyuda m'omore aka ocako fonjo kwoŋ Yesu ka waco ni, “Yesu obedo Wod Were.”

²¹Ji je ma jowinjo go jodhier swa, aka wegi jopenjere ni, “Me k'aŋata oneko ji Yerusalem ma jotuco nyingi Yesu? Aka miti go onyo ameno k'obino ka kodi atoŋa ma mako ji ma jotuco nyingi Yesu gi tweyo jo tero jo bongi jotel pa jocway ri Were i wi migam?”

²²To fonji pa Saulo omedere bedo gi meni loyo, aka tito pere ni Yesu obedo Kristo obedo m'ocwiny swa ma Joyuda m'oyido jonitie Damasiko jok'onyalo dwoko go.

²³Munyo ndelo mathoth okadho, Joyuda jocokere to joyiko paro ma neko Saulo;

²⁴to owaci rigo gim'oyido joyiko timo. Jonago jokuro go i waŋkac ma tindi Wor g'odieceŋ ni jowoneki go.

²⁵To gi wor no, joma luwo Saulo jokwanyo go to jowodho go gi i hoŋ ma kor ot iy'adita m'olier gi thol.

²⁶Saulo okidho Yerusalem to temo makirok kodi jofonjirok to jok'onyalo yeyo nike go pama onyo bende olokere jafonjirok, to joje jolworo go ayino.

²⁷Gikenyo Barinaba obino okwanyo go to tero go bongi jomoor to tito rijo paka Saulo ndir ca oneno Rwoth i royo to Rwoth luwo gine. Go bende owaco rijo paka Saulo ofonjo gi miseni i nyingi Yesu i tindi ma Damasiko.

²⁸Gikenyo Saulo obedo gi jo to wotho Yerusalem parom, munyo fonjo gi miseni i nyingi Rwoth.

²⁹Go bende oluwo aka opiemo kodi Joyuda ma joluwo Dhogrik, to jotemo neko go.

³⁰Munyo jom'oyeyo joŋeyo gino, jotero Saulo yu Kasareya to jodhiro go Tariso.

³¹Gikenyo kitipa pa jom'oyeyo i Yuda gipi kodi Galili kodi Samaria obedo gi hola ma siem. Jokonyere aka jodongo i welo ro kony pa Cuny Maleŋ, munyo jowotho i kwo ma lworo Were.

³²Paka Petero oyido wotho i kabedo m'omore, ndelo moro go okidho liewo ji ma jobedo Lida.

³³Kenyo go oromo gi dhano m'ilwoŋo ni Ayineya, m'onwaŋo two nyaŋinya aka k'onyalo ay i kanindo oro aboro.

³⁴Petero owaco rigo ni, “Ayineya, Yesu Kristo bothin. Ay malo iyiki kanindo perin.” Ayineya oay mayot.

³⁵Ji ma jobedo Lida kodi Saron joneno go, to jowire bongi Rwoth.

³⁶I Yopa onwaŋo nitie dhako m'oyeyo m'ilwoŋo ni Tabisa, (Nyinge i Dhogrik obedo Dokas, dwoŋ mere ni amudhe), m'oyido oro hongo pere je ma timo bero gi konyo jocandi.

³⁷I hongo no two omako go to tho. Olwok delkwoŋe to ipielo i ot ma malo.

³⁸Paka Yopa oyido kibor gi Lida, munyo jofonjirok ma Yopa jowinjo ni Petero nitie Lida, jooro j'ario bonge gi mikwenda me, “Mondo redi ibin.”

³⁹Gikenyo Petero oyikere to kidho bongi jo. Munyo go otundo, oter go i ot ma malo. Mon tho je jothoko go munyo joywak aka jonyutho go satere gi k'otere ma Dokas otimo munyo fodi kwo.

⁴⁰Petero oriemo joje woko, aka oguro conge to kwayo; aka owire kama di jatho to lwoŋo ni, “Tabisa, ay malo!”

⁴¹Petero otundo bonge to konyo go gi ay malo. Gikenyo Petero olwoŋo jom'oyeyo kodi mon tho, to cwayo go makwo rijo.

⁴²Wac me onyay i Yopa gipi, aka ji mathoth joyeyo Rwoth.

⁴³Petero obedo Yopa ndelo m'oromo kodi jajwayi piendere m'ilwoŋo ni Simon.