Read dhopadhola Joroma 1 Bible Online

Joroma 1 - dhopadhola bible

Joroma 1

¹Balwa m'owok bongi Paulo, jatic pa Yesu Kristo kendo jamoor ma Were oyero to lwoŋo fonjo Wac Manyen Maber pere,

²ma Were cango ociko munyo oro jotuci wac pere, t'iketho i Ndiko Maleŋ.

³Me obedo Wac Manyen Maber ma mako kwoŋ Wode, Rwodhiwan Yesu Kristo, m'onywol paka nyakwar Daudi;

⁴t'inyutho ji ni go obedo Wod Were gi meni madwoŋ mapa Cuny ma kelo leŋo, munyo ocerino go kwoŋ jom'otho.

⁵I go Were omiyan nema ma bedo jamoor ri Kristo, ŋey atel ji ma nonin je jowoyey odoko jowowinji or.

⁶Me bende mako win ma winitie Roma, ma Were olwoŋo bedo ji pa Yesu Kristo.

⁷Am'omiyo andiko ri wijoje ma winitie Roma ma Were omaro to lwoŋo bedo ji pere won. Weyi Were Bawan kodi Rwoth Yesu Kristo womiy win nema gi siem.

⁸Marapena afoyo Were paran, i Yesu Kristo, ri wijoje; rupiri piny gipi winjo kwoŋ yeyo mewin.

⁹Were nyalo ridho ni gim'awaco obedo adieri; Were no ama atiyo rigo gi cunyan je munyo afonjo Wac Manyen Maber kwoŋ Wode. Were oŋeyo nike ndir je apoyo win, i hongo je ka akwayo.

¹⁰Akwayo nike Were i mito pere, i hongo moro womiyan ye thwolo ma limo win.

¹¹Kole ayenyo swa neno win ŋey anyal poko gi win silwany ma cuny, ma medo win meni.

¹²Dwoŋ mere ni win, kodan, wabino nwaŋo kony kiromo, win i yeyo paran aka an i yeyo mewin.

¹³Poyi win gime wutmera, ndir mathoth ayiko bino limo win, to hongo je gimoro geŋan. Atieko yenyo swa ywayo jomegi i yeyo i dier win bende, paka atieko timo i dier Jopath.

¹⁴Kole or omakan matek kwoŋ ji je, kwoŋ jokite mabeyo kodi joreco, kwoŋ jom'ofonjere kodi joma kuya gimoro.

¹⁵Am'omiyo ayenyo swa fonjo win bende ma winitie Roma Wac Manyen Maber.

¹⁶Kole ageno swa Wac Manyen Maber, rupiri obedo meni pa Were ma botho ji je ma joyeyo, marapena Joyuda, aka nyaka Jopath bende.

¹⁷Kole Wac Manyen Maber nyutho paka Were ketho ji i tiro gine luwo kwoŋ yeyo, wok i cakirok tundo i gike. Ato randik waco ni, “Ŋat'okethi i tiro gi Were bino kwo gi yeyo.”

¹⁸Were otieko nyutho ni keme pere bino wok i polo to lwenyo gi reco je kodi tim pa ji mareco ma royo pajo mareco geŋo adieri ŋeyirok.

¹⁹Were miyo jo gir'acula rupiri gima ji jonyalo ŋeyo kwoŋ Were nitie kamaler rijo.

²⁰Wok cuka Were cwey piny, kada go won kinenere i meni pere ma cil gi cil kodi i kite ma nyawerewere, gima nyutho ni go nitie nenere i gigipiny ma go ocweyo. Am'omiyo dhano ongoye kodi gigoŋirok!

²¹Ji joŋeyo Were, to jokimiy go dwoŋ pere, kendo kada temo foyo go ni walwa. Kucel, paro pajo olokere masisiri aka paro pajo ma kitiy m'odoŋ mudho otieko poŋ'iye.

²²Jowaco ni joriek, to kere jomiŋ ayin;

²³kama di jolami Were makitho, jolamo rigin gim'othedhi i cal pa dhano ma tho, kosa apa winyin, kosa ap'ogwaŋe kosa apa thwole ayino.

²⁴Paka ji jomiŋ ameno, Were ojala jo jowotimi gigipiny mareco ma cuny jo yenyo, aka jotimo gigipiny ma kelo wickwot i del pajo, ŋatiman gi nyawote.

²⁵Jowilo adieri kwoŋ Were gi twodo; jolamo aka jotiyo ri gima Were ocweyo kapa lamo Jacwec won, m'iripo pako cil gi cil. Ameno.

²⁶Paka ji jotimo gime, Were ojala jo to weyo jo ri awanya ma kelo wickwot. Kiri mon bende jowiro or ma delkwoŋ gin munyo joweyo riwirok i del i yo m'otire to joriwere wegi kendi gin, m'obedo yo ma k'otire.

²⁷Ameno, cwo bende joweyo riwirok gi mon paka ndir je, to joowere g'awanya kwoŋ cwo wadi gin. Cwo jotimo wickwot gi cwo wadi gin, am'omiyo Were miyo jo gir'acula ro ndir, ro tim pajo mareco no.

²⁸Paka ji jokwero ketho i paro pajo rieko mar'adieri ma mako kwoŋ Were, go onyo ojala jo ri paro m'otop, ma miyo jo timo gim'oyido jokiripi timo.

²⁹Jopoŋ gi kidakana ma nger je: Raco, woro, kodi camo tiendi ji gi piny. Jopoŋ gi nyeko, neki, gorok, twodo, gi paro marac. Jonyeko nyingi wadi gin,

³⁰aka joluwo kicar kwoŋ ji; jodak Were, joyetere, jobedo jopakirok, jokwoto; joparo yo m'omore ma timo reco; aka jokiwinji jonywol pajo;

³¹jodakana, jokikur cikirok pajo, jokinyuthi wor odoko jokidew kwoŋ nyatoro.

³²Joŋeyo kiri ni cik pa Were waco ni ji ma kwo pajo cale ameno joripo gi tho, to je fodi nyaka jomedere ameda gi timo gigipiny no won; aka maloyo raco: Jofoyo joman ma bende jotimo ameno.