Read dhopadhola Joroma 11 Bible Online

Joroma 11 - dhopadhola bible

Joroma 11

¹Onyo apenjo ni, Were otieko bolo woko ji pere? K'ameno be! An won bende abedo Jaisiraili, nyakwar Abraham, acel kwoŋ jonono pa Benyamin.

²Were k'obolo woko ji pere ma go won oyero cako con. Wikuya gima ndiko waco kwoŋ Elia, nger ma go pid'iye kodi Were kwoŋ Isiraili?

³Owaco ni, “Rwoth, joneko jotuci wac perin aka jonyeko woko migam perin; aŋat'adoŋ kendan, aka jorango kiri nekan bende.”

⁴Were omiyo go radwok aŋo? Odwoko go ni, “Atieko ketho gicen ji gana abirio ma fodi jok'olamo were Bal.”

⁵Am'omiyo bende kiri gunyo fodi nitie jom'odoŋ, ma Were oyero ro nema pere.

⁶K'obedo ro nema pere, meno yero pa Were kicungi kwoŋ tim mabeyo ma dhano timo, rupiri d'onyo nema no kidok bedi nema m'otire.

⁷Onyo aŋo to? Gima Joisiraili jorango tektek jok'onwaŋo; jom'oyer ama jonwaŋo, to jom'odoŋ jobedo gi cuny jo matek.

⁸Otimere paka ondiki ni, “Were omiyo jo cuny ma miŋo, gi waŋ gin ma k'onyalo neno, kodi ithi gin ma k'onyalo winjo, kiri konon.”

⁹Aka Daudi waco ni, “Mada kalima pajo wolokere rijo bwo ma ciko jo, kodi gima redho jo; jowolimi gir'acula!

¹⁰Mada waŋ gin tho woko ma jokinyal neno, miy jowogwomere i candirok pajo ndir je.”

¹¹Am'omiyo apenjo ni: Munyo Joyuda jocer, jopodho to jorere woko? K'ameno be! Rupiri jotimo gimarac, both obino ri Jopath, ŋey womiy Joyuda jowotimi nyeko gi jo.

¹²K'inen gimarac pa Joyuda okelo silwany mathoth ri piny, aka podho pajo okelo ŋaŋo ri Jopath, onyo ka orwaki jo, silwany no bino thoth marom nedi?

¹³Pama onyo aluwo gi win Jopath: Kafodi abedo jamoor pa Jopath abino pakere gi tic paran.

¹⁴Miti anyalo miyo ji ma nono paran won nyeko, ŋey anyal botho jomegi kwoŋ jo.

¹⁵K'inen munyo obol jo woko, odwoki piny gipi i tiyirok gi Were, onyo aŋo man m'obedi ka ojol jo, loyo nwaŋo kwo wok i tho!

¹⁶Kole k'adec ma cemo m'omiy Were paka gima nyak marapena leŋ, meno cemo no gipi bende leŋ; aka k'inen tiendi yath leŋ, meno kiri jange bende leŋ.

¹⁷To k'inen otiek toŋo woko megi kwoŋ jangi yath vini m'opidhi, aka win ma wibedo jangi vini moro madudi onyo oriw win maber i kabedo pa m'otoŋ woko ca munyo ipoko win ye kwo m'oŋaŋ man tiendi yath m'opidhi no,

¹⁸onyo wikiri wipakere ri jangi yen m'ojwer woko ca, rupiri wibedo nyaka jangi yen, aka wiŋati wikithiel tiendi yath to tiendi yath ama thielo win.

¹⁹To wibino waco ni, “Ey, kole ojwer woko jangi yen ca ma leŋo ran hongo.”

²⁰Meno otire, ojwer woko jo rupiri jok'oyeyo, to wikiri wibedi gi paro ma pakirok kwoŋ gime; kucel, bedi win gi lworo ayino.

²¹Ato k'inen Were k'oworo Joyuda ma jobedo paka jangi yen m'otire mere, wiparo nike go bino woro win ayino?

²²Onyo neni win paka Were cunye ber aka odoko nyutho gero bende. Go ger kodi joma jopodho, to nyutho win bero tekin wicwire i bero pere; to ka wikitimo ameno, wibende ibino jwero win woko.

²³Aka ka Joyuda joweyo bedo ma buyeyo, ibino dwoko jo i kabedo pajo m'onwaŋo jonitie iye, rupiri Were nyalo dwoko jo kendo.

²⁴K'inen win Jopath oŋadi win paka jangi yath vini madudi to iriwo win kwoŋ vini m'opidhi peco, gim'oyido kinyalere, onyo Joyuda ma jobedo jangi yath kwoŋ yath vini m'opidhi, jobino bedo mayot nedi riwo jo kendo i kor yath mere won!

²⁵Amito ni winiaŋ nyaliŋliŋ me, wutmera, ŋey wikiri wipar ni wiriek swa: Wictek pa ji ma Isiraili k'obedo makiwire, to bino bedo cuka welo kwan pa Jopath ma mitere jowobin bongi Were worom.

²⁶Aka me apaka Isiraili gipi bino limo both, paka ondiki ni, “Jaboth bino wok Zayon, Go bino kwanyo woko reco pa nyikway Yakobo je.

²⁷Abino timo cikirok me gi jo, munyo akwanyo woko reco pajo.”

²⁸Rupiri jokwero Wac Manyen Maber, Joyuda jolokere jokwor pa Were ma bero mewin, win Jopath. To i yero pa Were, jobedo mere pere ma bero pa kwarere pajo.

²⁹Kole Were kiwir paro pere kwoŋ mic kodi lwoŋo pere ri nyatoro.

³⁰Gime rom kodi gim'otimere riwin Jopath; con oyido wicayo Were, to kole pama onyo wilimo wor pa Were rupiri Joyuda jotimo cay.

³¹Ameno bende, Joyuda pama jokiwinji Were, ŋey gi wor ma wilimo, jo bende jowolimi wor pa Were.

³²Kole Were otieko loko ji je jotwec pa cay, ŋey wonyuthi wor ri ji je.

³³Thutho ma ŋaŋo pa Were kodi rieko kodi niaŋ pere rom nedi! Ŋa manyalo tito paro ma go ocano? Ŋa manyalo niaŋ kwoŋ royo pere?

³⁴Kole ndiko waco ni, “Ŋa m'oŋeyo paro pa Rwoth? Odoko ŋa manyalo miyo go rieko?

³⁵Ŋa m'otieko miyo ye go gimoro ma ripo wonwaŋi cul?”

³⁶Kole go am'ocweyo gimoro je, aka gimoro je nitie kwoŋbedo go kodi rigo. Dwoŋ wobedi ri Were cil gi cil! Ameno.