Read dhopadhola Joroma 12 Bible Online

Joroma 12 - dhopadhola bible

Joroma 12

¹Am'omiyo, wutmera, ro wor pa Were m'oasere riwan, agoyo riwin koko me: Miy win delkwoŋ win ri Were paka cowirok makwo, maleŋ ma sangala go. Meno a lamo ma cuny ma wiripo cwayo rigo.

²Wikiri wiluw kula ma piny me, to bedi win ma wiwire i paro mewin, aka nyaka wibino ŋeyo mito pa Were; gimaber ma sangala go, odoko m'olony kicutho.

³Aka gi mic ma nema ma Were omiyan awaco gime ri wijoje: Wikiri wipar ni win malo loyo kama di wipar'iye. Kucel, bedi win milengela i paro mewin, kisi dhano kwoŋ win, ma ripo gi yeyo ma Were omiyo go.

⁴Wanitie g'adec madit i del acel, aka adec me je nitie gi tic mere.

⁵Ameno kada wathothi, je fodi wabedo del acel i Kristo, aka wamakere kanyacel paka adec m'opokere opokere ma del acel.

⁶Am'omiyo paka wanitie gi mic m'opokere opokere cungo kwoŋ nema ma Were omiyo wan, weyi waori ama: K'obedo mic ma tuco mikwenda ma wok bongi Were, tim ameno cungo kwoŋ yeyo m'inigine.

⁷K'obedo mic ma cwayo, tiyi ri jowotin; k'obedo mic ma fonji, fonji wadin.

⁸K'obedo mic ma medo wadin miseni, tim ameno; ŋata poko ri joman gima go nitie gine, wopok gi cunye maber; jatel, wotiy gi meni; jawor, wonyuthi wadi wor gi kisangala.

⁹Mar ripo bedo mar'adieri. Kwer gimarac, cwire kwoŋ gimaber.

¹⁰Mare win gi owirok ma cuny paka wutmere i Kristo, odoko bedi win mayil i miyo jowoti win dwoŋ.

¹¹Tiyi win matek, aka wikiri wibedi manyap. Cway win ri Rwoth gi cuny win je.

¹²Weyi geno mewin womiy win kisangala, diy win cuny win i teko mewin, aka kway win Were hongo je.

¹³Pok win ye lim mewin gi wutmin win ma jocando, odoko weyi win pecin mewin thwolo ri wendo.

¹⁴Kway win Were womiy joma lwenyo kodi win silwany; ey, kway wi go womiy jo silwany makiweno kwoŋ.

¹⁵Sangala win gi joma sangala, ywak win gi joma ywak.

¹⁶Nyuthi win dhano je cuny maber marom. Wikiri wibedi jokwoto, to joli win tic kada ma piny. Wikiri wibedi gi paro ni wiriek.

¹⁷Ka nyatoro otimo riwin marac, wikiri wicul kwor. Tem win timo gima ji je tero ni ber.

¹⁸Tem win paka nyalere neno ni wibedo i siem gi ji je.

¹⁹Wikiri wicul kwor wiwegi, jowotan; kucel weyi win keme pa Were ama woculi. Kole ndiko waco ni, “Rwoth waco ni, ‘Culo kwor obedo aparan; abino culo.’ ”

²⁰Kucel ndiko waco ni, “Ka jakwor perin kec neko, pidhi go; ka riyo neko, miy go gir'amadha; kole k'itimo ameno, meno cal pa onyo itoko cuk mac malieth i wiye.”

²¹Ikir'iyey reco wodhumin; kucel loy reco gi bero.