Read dhopadhola Joroma 13 Bible Online

Joroma 13 - dhopadhola bible

Joroma 13

¹Dhano je ripo winjo or pa rwodhe ma piny; ato ongoye meni mar'adhum ma Were ama k'oyeyo, aka jodhum ma jonitie Were ama oketho jo.

²Nyatoro je ma piemo kodi meni pa jodhum manitie, meno piemo kodi gima Were ocano; aka moro je ma timo ameno bino kelo wac kwoŋe won.

³Kole joma timo gimaber jokilwor jodhum, to joma timo reco ayino ama jolworo. Imito bedo ma bu lworo kwoŋ jadhum? Ere tim gimaber, aka go bino pakin.

⁴Kole go jatic pa Were ma tiyo ri bero perin. To k'itimo reco, lwor go, rupiri jadhum kibedi gi gilweny nono. Go obedo jatic pa Were aka go nyutho joma timo reco keme pa Were.

⁵Ro wac me dhano je ripo winjo or pa rwodhe, ki nyaka ro keme pajo kende, to ro gima paro ma cunyin nyuthin bende.

⁶Meno bende am'omiyo wiripo goyo misolo, rupiri rwodhe jotiyo ri Were ka jotimo tic pajo no.

⁷Am'omiyo, cul win gima wiripo culo dhano; cul misolo perin bongi ŋat'iripo culo, kodi lim perin bende ameno; aka wor win ŋata ripo awora, odoko miy dhano je dwoŋ, ma ripo amiya dwoŋ.

⁸Wikiri wibedi gi banja pa dhano moro je. Nyaka banja ma wiripo bedo gine meno a marok i dier win. Nyatoro je m'omaro nyawote meno otieko winjo Cik.

⁹Or ma waco ni, “Ikir'itim cot, ikir'ineki, Ikir'ikwal, ikir'ibedi g'awanya.” Je kodi man oriw kanyacel i or acel ni, “Mari nyawotin paka iwon imarere.”

¹⁰Nyatoro je m'omaro nyawote kilatimo ri nyawote reco. Am'omiyo, marok meno winjo Cik gibe.

¹¹Medo kwoŋ meno, wiŋeyo ndir ma pama ni ndir otundo riwin ma cew. Kole ndir ma both mawan onyo ocore cegin loyo munyo nyaka wacako yeyo.

¹²Wor cegin rumo, aka piny cegin yawirok. Riameno wawey win timo gigipiny ma mudho to wakwanyo win gilweny ma lero.

¹³Wabedi win i kwo m'otire paka ji ma jonitie i lero m'odieceŋ, m'ongoye woro kosa mero, cot kosa kidakana, gorok kosa nyeko.

¹⁴Kucel ruki win Rwoth Yesu Kristo, aka wikiri wiwey hola ri del, ma timo awanya mere.