Read dhopadhola Joroma 16 Bible Online

Joroma 16 - dhopadhola bible

Joroma 16

¹Afoyo riwin nyamin wan Febe, ma tiyo paka jakony i kitipa pa jom'oyeyo i Kenkere.

²Joli win go i nyingi Rwoth, paka ripo ri ji pa Were, aka miy win go kony je ma go omiti bongi win; kole go otieko bedo jakony ri ji mathoth ma kiri ran bende.

³Mothi ran Pirisila kodi Akwila, jotic jowotan i Kristo Yesu,

⁴ma jojala kwo pajo ran. Aketho jo walwa, aka ki an kendan, to kitipa pa jom'oyeyo pa Jopath je bende.

⁵Mothi ran kitipa pa jom'oyeyo ma romo i ot pajo. Mothi ran mere paran ma kacunyan Epeneto, m'obedo ŋati marapena iy'adec ma Asia i yeyo Kristo.

⁶Mothi ran Maria, m'otieko tic tektek riwin.

⁷Mothi ran Androniko kodi Yuniya, Joyuda jowotan ma jobedo i twec kodan; joje joŋeyere maber i dier jomoor, aka jolokere jokristo mafodi an.

⁸Mothi ran Ampuliato, mere paran i Rwoth.

⁹Mothi ran Urubano, jatic nyawotan i Kristo, kodi Sitako, mere paran swa.

¹⁰Mothi ran Apele, ma cwirok pere kwoŋ Kristo oŋeyere maber. Mothi ran jopeco pa Aristobulo.

¹¹Mothi ran Herodion, Jayuda nyawotan kodi jokristo wutmin wan i peco pa Narikiso.

¹²Ter moth paran ri Turifena kodi Turifosa, mon ma jotiyo tektek i Rwoth. Mothi ran jawodhan swa, Pasis, m'otieko timo kweth tic ri Rwoth.

¹³Adhiro moth ri Rufo, jatic m'oŋeyere i tic pa Rwoth, kodi ri min, ma hongo je oteran paka wode.

¹⁴Ter moth paran ri Asinkurito, Filegon, Harime, Patiroba, Harima, kodi wutmere i Kristo je ma jo ni kanyacel gi jo.

¹⁵Mothi ran Filologo kodi Julia, Nereo kodi nyamin, Olimpas kodi ji pa Were je ma jonitie bongi jo.

¹⁶Mothere win akor i leŋo. Kitipa pa jom'oyeyo Kristo je jodhiro riwin moth pajo.

¹⁷Wutmera, agoyo riwin koko ni kure win kwoŋ joma kelo pokirok aka jogeŋo riwin royo gi gim'opokere kodi fonji ma witieko jolo; eye win kwoŋ jo.

¹⁸Kole joma timo gigipiny ma kite no jokitiy ri Kristo Rwodhiwan, to jotiyo ri iy gin wegi gi wac pajo mamit kodi luwo ma dwoŋo paro pa jom'onwaŋo jongoye gi raco.

¹⁹Dhano je otieko winjo cwirok mewin kwoŋ Wac Manyen Maber, aka ro wac me josangala swa gi win. Amito wibedi mariek kwoŋ gimaber, aka ma wikitim reco.

²⁰Aka Were ma miyo wan siem, bino ŋinyo woko Sitan i par tiendi win i yoto. Nema pa Rwodhiwan Yesu Kristo wobedi gi win.

²¹Timothe, jatic nyawotan, bende dhiro riwin moth; kanyacel gi Lukio, Yason kodi Sosipata, Joyuda jowotan.

²²An Teritiyo, jandiki balwa me, abende adhiro riwin moth i nyingi Rwoth.

²³Gayo, won peco ma an kodi jom'oyeyo waromo i ot pere ka, dhiro riwin moth pere; Erasto, jatel ma tic ma tindi, kodi omin wan Kwarito je jodhiro riwin moth.

²⁴[Nema pa Rwodhiwan Yesu Kristo wobedi kodi wijoje. Ameno].

²⁵Weyi wamiy Were dwoŋ manyalo miyo wicungo matek i yeyo, i Wac Manyen Maber m'afonjo win, mikwenda kwoŋ Yesu Kristo, kodi kwoŋ nyutho adieri manyaliŋliŋ m'onwaŋo opan oro kweth m'okadho.

²⁶To pama adieri no otiek wodho kamaler i ndiko pa jotuci wac Were; kodi i or pa Were ma cil gi cil, ma onyo imiyo nonin je ŋeyo, aka ji je jowoŋey odoko jowowinji.

²⁷Ri Were manitie acel kende mariek, luwo i Yesu Kristo, dwoŋ wobedi rigo cil gi cil. Ameno.