Read dhopadhola Joroma 3 Bible Online

Joroma 3 - dhopadhola bible

Joroma 3

¹Onyo Joyuda joloyo joman i yo mene? Kosa kony aŋo manitie i thumirok?

²Nitie bero m'oromo ma bedo Jayuda. Kutho marapena, Were ogeno Joyuda to miyo jo mikwenda pere.

³Aŋo to, ka jomegi kwoŋ jo jobedo joma kigenere? Onyo ro gino, nyutho ni Were kigenere?

⁴K'ameno be! Weyi Were wobedi jar'adieri kada dhano je obedi jatwodo. Paka ondiki ni, “Aka ŋey wonyuthere paka gim'iluwo otire, aka iloy banja ka i pido kodin.”

⁵Onyo wanowaci nedi ka tim mawan ma k'otire konyo ma nyutho kamaler ni apa Were am'otire? Wawaci ni Were timo marac ka miyo wan gir'acula? (Meno onyo aluwo paka dhano.)

⁶K'ameno be! Ka Were k'otire nyalo nedi thumo banja ri piny?

⁷To ka komo paran konyo ma nyutho tiro pa Were to kelo rigo dwoŋ, raŋo ma fodi ithumo ran banja paŋini ajareco?

⁸To raŋo ma kiwaci ni, “Weyi watim reco ŋey bero wowok'iye?” Adieri jomegi jotieko kiri yetan munyo jocwoko dhokan ni awaco ameno won! Ibino thumo banja loyo jo paka ripo.

⁹Onyo wa Joyuda wanitie maber i yo mene loyo Joman? Ongoye be! Atieko nyutho ni Joyuda kodi Jopath parom joje jonitie i meni pa gimarac,

¹⁰paka ondiki ni, “Ongoye dhano kad'acel m'otire, ongoye ma kad'acel,

¹¹ongoye moro ma niaŋ, kosa ma rango Were.

¹²Ji je joeye woko bongi Were, joje jotieko podho; Ongoye ŋata timo gimaber, ongoye kad'acel.

¹³Dhok jo cale kaliel m'othangere; Jooro lew jo ma twodo, aka wac ma cal kwir ama wok i dhok jo;

¹⁴Dhok jo opoŋ'iye kwoŋ makec kodi duro.

¹⁵Joyot gi kidho neko ji.

¹⁶Joweyo gunda kodi rem kama jokidh'iye je.

¹⁷Fodi jok'oŋeyo yo ma siem,

¹⁸odoko fodi jok'ofonjere lworo Were.”

¹⁹Onyo pama watieko ŋeyo ni gimoro je ma Cik waco, mako kwoŋ joma fodi joluwo Cik, ŋey wogeŋ woko rendirok pa dhano, aka Were wonyali thumo banja ri piny gipi.

²⁰Kole ongoye dhano m'ibino kwano rigo tiro ruwaŋ Were ro nyaka timo gima Cik yenyo, rupiri Cik miyo dhano nyaka ŋeyo nike gimanyo obedo reco won kende.

²¹To pama royo ma Were ketho gine ji i tiro gi go otieko nyuthere, aka kimaki kwoŋ cik. Cik kodi ndiko pa jotuci wac Were je joridho gima mako kwoŋ royo no.

²²Were ketho ji i tiro kwoŋ yeyo pajo i Yesu Kristo ayino. Were timo gime ri ji je ma joyeyo Kristo, rupiri pokirok ongoye.

²³Paka ji je jotieko timo reco aka jonitie bor gi dwoŋ pa Were,

²⁴pama onyo ikwanyo woko banja kwoŋ ji je ro mic ma nema pa Were kareno igonyo jo woko kwoŋ reco i Kristo Yesu

²⁵ma Were oketho paka cowirok, ŋey gi tho pere go wolokere royo ma cwako reco pa ji cungo kwoŋ yeyo pa dhano. Were otimo ameno ma nyutho tiro pere, rupiri i ndir m'okadho, go odiyo cunye to weyo ma k'okwano reco pa ji;

²⁶to i ndir ma pama go kaŋasa reco pa ji, ma nyutho paka go won otire, aka go ama kwanyo woko banja kwoŋ ŋata nitie gi yeyo i Yesu.

²⁷Onyo aŋo ma wanyalo yumirok gine? Kole ongoye! I royo mene? I royo ma kuro Cik? Be, i royo ma bedo gi yeyo ayino.

²⁸At'onyo wacowo wac ni Were kwanyo woko banja kwoŋ dhano cungo kwoŋ yeyo, makiweno kwoŋ timo gima Cik mito.

²⁹Kosa Were obedo Were pa Joyuda kende? Go k'obedo Were pa Jopath bende? Kole go obedo Were pa Jopath bende.

³⁰Were nitie acel, aka go bino kwanyo woko banja kwoŋ Joyuda cungo kwoŋ yeyo pajo, aka bende bino kwanyo woko banja kwoŋ Jopath ro yeyo bende acel no won.

³¹Onyo nyutho ni wabol woko Cik ro yeyo me? K'ameno be; kucel, waridhi Cik bende.