Read dhopadhola Joroma 4 Bible Online

Joroma 4 - dhopadhola bible

Joroma 4

¹Onyo wanowaci aŋo kwoŋ Abraham, kwari wan i del?

²Bedi kwany woko banja kwoŋe cungo kwoŋ gigipiny ma go otimo, di go onyalo bedo kodi yumirok, to go kinyal yumere ruwaŋ Were.

³To kere randik waco aŋo? Ni, “Abraham oyeyo Were, aka ro yeyo pere Were okwano go paka ŋat'otire.”

⁴Dhano ka tiyo iculo go kemba ma kiter paka mic, to paka gima go otiyo rigo ayin.

⁵To ka dhano kikethi geno kwoŋ tic pere, to ketho i yeyo Were ma kwanyo woko banja kwoŋ ji ayino, kiti yeyo no miyo ikwano rigo tiro.

⁶Me a dwoŋ gima Daudi owaco munyo luwo kwoŋ kisangala pa ŋata Were jolo paka ŋat'otire ma k'okwano tic ma go otieko timo:

⁷ “Josilwany a joma reco pajo Were otieko cwako; joma go oumo reco pajo!

⁸Jasilwany a ŋata Rwoth kilakwano kwoŋe reco pere!”

⁹Silwany ma Daudi oluwo kwoŋe me bedo apa jom'othumere kende? Be. Bedo apa joma jok'othumere bende, rupiri watieko nyutho wac wok i randik ni, “Abraham oyeyo Were, aka ro yeyo pere Were okwano go paka ŋat'otire.”

¹⁰Gime otimere keraŋo? Otimere mafodi, kosa munyo Abraham otieko thumere? Mafodi, makiweno rumacen ma thumirok pere.

¹¹Othum go rumacen paka ranyuth ma ridho ni ro yeyo pere munyo fodi go k'othumere am'omiyo Were okwano go paka ŋat'otire. Meno am'omiyo Abraham obedo ba joma yeyo Were ma cuny, ma Were jolo jo paka jom'otire, kada jok'othumere.

¹²Go obedo ba jom'othumere bende, ki ni rupiri othum jo, to rupiri jonitie i kiti kwo ma yeyo ma Abraham cango obed'iye munyo fodi k'othumi go.

¹³Were ociko Abraham kodi nyikwaye ni piny me bino bedo apajo. Cikirok me otim, ki kwoŋbedo Abraham okuro Cik, to rupiri go oyeyo aka Were okwano go paka ŋat'otire.

¹⁴To k'inen joma kuro Cik ayino ama jobino lunjo gim'ocik, meno kere yeyo pa dhano ongoye kony, aka cikirok pa Were bende ongoye kony.

¹⁵Cik kelo nge pa Were, to kama cik ongoy'iye, meno turo cik bende ongoye.

¹⁶Riameno cikirok no cungo kwoŋ yeyo, ŋey wothenere kwoŋ nema pa Were aka womiy nyikway Abraham je, aka ki nyaka joma jokuro Cik kende, to joma joyeyo paka cango Abraham bende oyeyo. Ato Abraham obedo ba wajoje ma cuny,

¹⁷paka ndiko waco ni, “Alokin ba nonin mathoth.” Aka cikirok no otimere bongi Were won ma Abraham oyeyo; Were ma cerino jom'otho, ma or pere miyo gimoro m'oyido ongoye cako bedo.

¹⁸Abraham oyeyo aka ogeno, munyo geno oyido ongoye kiri kony, am'omiyo go olokere Ba nonin mathoth paka ndiko waco ni, “Nyikwayin jolatiŋo piny pa kweth micala.”

¹⁹Oro pere oyido cegin romo miya acel, to yeyo pere k'omojere munyo go oparo kwoŋ delkwoŋe m'onwaŋo cal p'otieko tho, kosa munyo oneno ni Sara oyido kinyal limo nyithindho.

²⁰Yeyo pere k'orumo, aka go k'oganagana kwoŋ cikirok pa Were; yeyo pere opoŋo kwoŋ go meni, to foyo Were,

²¹rupiri go oyido oridho kicutho ni Were bino timo gima go otieko ciko.

²²Meno am'omiyo, ro yeyo pa Abraham, Were okwano go paka ŋat'otire.

²³Wac me ni, “Okwan go.” K'ondiki ri Abraham kende.

²⁴Ondiki riwan bende m'ibino kwano wan paka jom'otire, wan ma wayeyo Ŋat'ocerino Yesu Rwodhiwan kwoŋ jom'otho.

²⁵Ojala Yesu ri tho ro reco mawan, aka ocerino go i kwo ŋey wokwan wan i tiro gi Were.