Read dhopadhola Joroma 7 Bible Online

Joroma 7 - dhopadhola bible

Joroma 7

¹Wikuya, wutmera, k'aluwo gi joma joŋeyo cik, ni cik dhumo dhano kende ka go fodi kwo?

²Paka ranen, Cik tweyo dhako m'onywomere kwoŋ cwore ka cwore fodi kwo; to tekin cwore tho, go gonyere woko kwoŋ cik ma mako kwoŋ cwore.

³Am'omiyo, ka go obedo gi jacwo man munyo fodi cwore nitie, ibino tero go paka jatim cot; to ka cwore otieko otho, go nitie i siem i kite ma cik, aka go kitim cot ka go odoko obedo gi jacwo man.

⁴Meno apaka nitie kodi win wutmera. Wibende witieko tho kwoŋ gima mako kwoŋ Cik, rupiri wilokere adec ma delkwoŋ Kristo; aka onyo win apa go m'ocerino kwoŋ jom'otho, ŋey wanyal kwo kareno wakonyo tic pa Were.

⁵Munyo oyido fodi watimo gima del yenyo, awanya mareco ma Cik osigila oyido tiyo i delkwoŋ wan, aka oyido kelo riwan tho.

⁶To pama otiek gonyo wan woko kwoŋ Cik, rupiri watieko tho ma nyutho ni wakwero gima cango oyido otweyo wan. Pama onyo wakibedo jotic i cik macon m'ondiki, to wabedo jotic i kwo manyen ma Cuny ayino.

⁷Onyo wawaci nedi? Ni Cik meno won a raco. K'ameno be! To ro Cik am'omiyan aŋeyo gimarac. Kole d'akiŋeyo gim'ilwoŋo ni awanya bedi Cik k'owaco ni “Ikir'iwanya.”

⁸Gimarac onwaŋo hola pere i or pa Were, ma kelo ran kikobo ma nger je. Ka Cik ongoye, gimarac bende bedo gim'otho.

⁹An con oyido akwo munyo Cik fodi ongoye; to munyo or pa Were obino, to reco cako nenirok kamaler,

¹⁰gikenyo t'atho; ameno or m'onwaŋo omiti ni wokel kwo odoko olokere ran tho ayino.

¹¹Ato gimarac onwaŋo hola to wondan munyo luwo kwoŋ or; ameno to nekan.

¹²Riameno Cik leŋ, aka or pa Were leŋ, otire, kendo ber.

¹³Meno onyo nyutho ni gimaber okelo tho? K'ameno be! Gimarac am'okelo ran tho munyo oro gimaber, ney kite pere mar'adieri paka gimarac wonyuthere kamaler. Am'omiyo, cungo kwoŋ or pa Were, gimarac olokere marac makicutho.

¹⁴Waŋeyo ni Cik mako kwoŋ cuny, to an abedo dhano ma nigi del, m'otana paka ŋeca ri gimarac.

¹⁵Akiniaŋ odoco kwoŋ gigipiny m'atimo, rupiri akitim gim'amito timo, kucel, atimo gim'akimiti mere ayino.

¹⁶K'atimo gim'akimiti timo, meno nyutho nike ayeyo ni Cik otire.

¹⁷To iy'adieri awon, aŋat'akitim gime; kucel gimarac manitie i an ama timo gino.

¹⁸Aŋeyo ni bero ongoye i an, kosa awaci ni i delkwoŋan paka dhano. Anyalo yenyo timo gimaber, to akinyali.

¹⁹Ato akitim gimaber m'amito timo; kucel atimo reco m'oyido akimito timo ayino.

²⁰K'atimo gim'oyido akimito timo, nyutho ni aŋat'akitim ameno, to gimarac manitie i an am'atimo ameno.

²¹Ameno anwaŋo ni gime cale gi cik; ka amito timo gimaber, ayero gimarac ayino.

²²Kwo ma cunyan sangala i cik pa Were,

²³to anwaŋo ni cik man ama tiyo i delkwoŋan, cik ma lwenyo kodi gima paro paran yenyo. Gino lokan jatwec pa cik ma gimarac ma tiyo i delkwoŋan.

²⁴Adieri an adhano ma bu kisangala. Ŋat'othekan gi del me ma teran i tho! Were wofoy ma bino timo ameno kwoŋ Yesu Kristo Rwodhiwan!

²⁵Am'omiyo, me apaka anitie: Abedo ŋeca ri cik pa Were i paro paran, to i del abedo ŋeca ri cik pa gimarac.