Read dhopadhola Joroma 8 Bible Online

Joroma 8 - dhopadhola bible

Joroma 8

¹Pama onyo kidok kethi banja kwoŋ jomakwo pajo nitie i Kristo Yesu,

²rupiri cik ma Cuny ma kelo riwan kwo i Kristo Yesu, otieko thekan gi cik m'okelo gimarac kodi tho.

³Gima Cik k'onyalo timo ro nyapo ma del pa dhano, Were onyalo timo. Othumo banja loyo gimarac ma del, munyo ooro Wode won, m'obino i cal ma del pa dhano ma jagimarac, aka wonyali reyo woko gimarac.

⁴Meno aka ŋey gima Cik mito ama wotimere i wan, ma wakiter kwo mawan i timo gima del yenyo, t'itimo gima Cuny ama yenyo.

⁵Kole joma tero kwo pajo i timo gima del yenyo joketho paro pajo i gigipiny manyadel. Aka joma miyo kwo pajo i timo gima Cuny yenyo joketho paro pajo i Cuny.

⁶Ketho paro i gigipiny manyadel meno tho, to ketho paro i gigipiny manyacuny meno limo kwo kodi siem.

⁷Meno am'omiyo paro m'oketh kwoŋ gigipiny manyadel lokere jakwor pa Were, rupiri kiwinji cik pa Were, aka iy'adieri go kitim ameno.

⁸Aka joma jotero kwo pajo i timo gima del yenyo jokinyal kisangala Were.

⁹To kwo mewin k'obedo manyadel, to manyacuny, k'inen Cuny Maleŋ pa Were nitie i win. Ŋat'ongoye gi Cuny pa Kristo i kwo pere, meno k'obedo apa Kristo.

¹⁰To ka Kristo nitie i in, meno delkwoŋin otieko tho ma nyutho ni ikwero gimarac, aka cunyin onyo nigi kwo ro tiro perin gi Were.

¹¹Ka Cuny Maleŋ pa Were m'ocerino Yesu kwoŋ jom'otho nitie i win, meno ŋat'ocerino Kristo kwoŋ jom'otho bende bino miyo delkwoŋ win ma tho no kwo ro Cuny Maleŋ ma bedo i win.

¹²Am'omiyo, wutmera, wanitie gi banja, to ki ri del ni watim gima del yenyo.

¹³Kole ka kwo mewin nitie paka del yenyo meno wikidho tho; to ka wineko woko tim mareco gi meni pa Cuny, aka wibino kwo.

¹⁴Ato joma Cuny Maleŋ pa Were ama telo jo ama jobedo nyithindho pa Were.

¹⁵Kole wikilimo cuny ma lokirok ŋeca ma kelo riwin lworo; to witieko limo Cuny ma loko win nyithindho pa Were, aka ka waywak ri Were ni “Aba! Baba!”

¹⁶Meno meni pa Cuny no ama nyutho wan i cuny wan ni wabedo nyithindho pa Were.

¹⁷Aka ka wabedo nyithindho pa Were, meno bende wabedo jolunji gigipiny pere paka jom'isika kanyacel gi Kristo, aka wabende wabino limo dwoŋ kanyacel gi Kristo, ka bende wariwere gi go i candirok pere.

¹⁸Atero ni candirok ma pama kirom gi dwoŋ m'ibino nyutho wan be.

¹⁹Cwec gipi kiyo neno gima Were bino nyutho nyithindho pere.

²⁰Kole omiy piny lokirok gim'ongoye kony, ki ro mito pere, to Were won am'omito ni wobedi ameno. Kad'ameno, geno oyido nitie ama:

²¹Nike ndelo moro ibino gonyo cwec wok kwoŋ topo mafodi dhumo go, to limo siem i dwoŋ ma nyithindho pa Were jobino limo.

²²Kole waŋeyo kiri gunyo ni cwec gibe cur gi litho ma cale gi ŋedi.

²³Aka k'ameno kende, to wan ma wanitie gi Cuny paka mic pa Were marapena, wabende wacur gi litho i iy wan koro munyo wakuro Were woloki wan nyithindho pere aka wokethi wan i siem.

²⁴Kole geno am'omiyo obothi wan; to geno m'otieko nenere meno kidok bedi geno. Ŋa ma geno gima go neno?

²⁵To ka wageno gima wakinen, meno aka wakuro ginago ma wadiyo cuny wan.

²⁶I royo acel no bende, Cuny Maleŋ konyo wan i nyapo mawan; rupiri wakuya paka waripo kwayo; aka Cuny won ama pido riwan bongi Were gi cur ma wac kinyal tuco.

²⁷Aka Were ma neno cuny ji, oŋeyo paro pa Cuny, rupiri Cuny pido bongi Were ri ji pere paka Were mito.

²⁸Kole waŋeyo ni gimoro je timere kanyacel ma bero ri joma jomaro Were, jono ma go olwoŋo r'atoŋa pere won.

²⁹Kole joma Were oŋeyo con, bende oyiko rijo kicutho bedo i cal pa Wode, ŋey Wode wobedi okayo i dier wutmin go.

³⁰Am'omiyo joma Were oyiko rijo kabedo con kicutho, bende olwoŋo jo; aka joma go olwoŋo, bende okwanyo woko banja kwoŋ jo; aka joma go okwanyo woko banja kwoŋ jo, bende opoko jo dwoŋ pere.

³¹Onyo wanyalo waco aŋo kwoŋ gigipiny me? Ka Were nitie yuthenge mawan, ŋata nyalo lwenyo gi wan?

³²K'inen Were k'ogwoko kiri Wode won, to omiyo go ri wajoje! Onyo go k'omiy wan gimoro je nono kanyacel gi Wode?

³³Ŋa ma bino kelo banja kwoŋ ji pa Were m'oyer? Kole Were won ama kwanyo woko banja kwoŋ jo!

³⁴To ŋa m'odoko othum rijo banja? Ki Kristo Yesu m'otho, kendo ma Were ocerino go kwoŋ jom'otho, aka onyo obedo yu cingi Were maracuc aka pido riwan bongi Were!

³⁵Ŋa m'opok wan gi mar pa Kristo? Teko di tim ameno, kosa aŋedha cuny, kosa acanda, kosa kec, kosa bedo kinyoro, kosa tho, kosa abor?

³⁶Ato ndiko waco ni, “Ro wac perin imito neko wan ndelo je, itero wan pa rombo m'ikidho thumo.”

³⁷I gigipiny me je, watieko loyo lweny i go m'omaro wan!

³⁸Kole aŋeyo maber ni kada tho, kosa kwo, kosa jomalaika, kosa jodhum ma polo, kosa gima pama, kosa gima bino rumacen, kosa meni moro,

³⁹kosa ŋawirok pa gimoro, kosa thutho pa gimoro, kosa gimoro je i cwec, kinyal poko wan gi mar pa Were i Kristo Yesu Rwodhiwan.