Read dhopadhola Joroma 9 Bible Online

Joroma 9 - dhopadhola bible

Joroma 9

¹Aluwo gir'adieri i Kristo aka akitwodi; paro ma cunyan ridho gino gi meni pa Cuny Maleŋ.

²An gi rem kodi litho mathoth i cunyan.

³Aparo ni di Were wokwoŋan ayin aka wopokan kodi Kristo ma bero pa ji paran, wade paran won ma del!

⁴Jobedo Joisiraili, ma Were oloko nyithindho pere to poko jo dwoŋ pere. Otimo cikirok pere kodi jo, to miyo jo Cik. Jonitie gi royo ma lamo Were mar'adieri. Jotieko jolo cikirok pa Were;

⁵jowok kwoŋ kwarere wan macon, aka Kristo, paka dhano, onywole wok i dier jo. Weyi Were ma dhumo gimoro je, wopak cil gi cil. Ameno.

⁶Akiwaci ni cikirok pa Were othogaya ongoye kony; rupiri k'obedo ni Joisiraili je ji pa Were;

⁷odoko k'obedo ni nyikway Abraham je nyithindho pa Were. Kole Were owaco ri Abraham ni, “Nyikway Isaka kende am'ibino kwano paka aperin.”

⁸Ma nyutho ni nyithindho m'onywol i yo ma kisi ndelo manyadel jok'obedo nyithindho pa Were; kucel, nyithindho m'onywol cungo kwoŋ cikirok pa Were ama ikwano paka nyikway go mar'adieri.

⁹Kole cikirok pa Were otim i wac me: “I hongo marom gi ma pama yuwaŋe, abino dwoko aka Sara bino limo nyathi majayac.”

¹⁰Aka ki meno kende; nger gino bende otimere ri Rebeka munyo ogamo iye to limo nyithindho ma rut, go kodi kwari wan Isaka.

¹¹Kada munyo fodi k'onywol jo aka onwaŋo fodi jok'otimo kiri gimoro maber kosa marac, (ma miyo yero pa Were wotimere,

¹²kareno kicungi kwoŋ tim pa nyithindho no, to kwoŋ lwoŋo pa Were), Were owaco ri Rebeka ni, “Wodin makayo bino tiyo ri mathin.”

¹³Meno obedo paka ondiki ni, “Amaro Yakobo, to adaki Esau.”

¹⁴Onyo wawaci nedi? Nike Were k'otire? K'ameno be.

¹⁵Kole go owaco ri Musa ni, “Abino mako wor gi ŋat'ayero timo rigo wor, abino ramere ri ŋat'ayero ramirok rigo.”

¹⁶Am'omiyo, kicungi kwoŋ yero kosa meni pa dhano, to cungo kwoŋ Were ma nyutho wor.

¹⁷Kole ondiki kwoŋ Farawo ni, “Alokin kere ri atoŋa m'abino orin iye ma nyutho meni paran, gi miyo nyingan woŋeyere i piny gipi.”

¹⁸Am'omiyo Were mako wor gi ŋata go oyero, aka miyo dhano bedo jacay paka won oyero.

¹⁹Onyo moro kwoŋ win bino waco ran ni. “K'inen obedo ameno, Were nyalo nedi ketho banja kwoŋ dhano? To ŋa, manyalo geŋo paro pa Were?”

²⁰To jawodhan in iŋa, dhan'adhana, m'inyalo dwoko Were? Dak bende nyalo penjo ŋat'ocweyo go ni, “Raŋo m'icweyan ama?”

²¹Kole jacwec nigi siem ma oro lowo nyamasiga paka won oyero, gi cweyo degi ario wok i lowo acel m'odwany: Dak acel mar'aora i kabedo ma welo kodi man mar'aora i kabedo ma kisi ndelo.

²²Iŋeyo nedi, kole ka Were otimo ameno ma mito nyutho keme pere gi miyo meni pere woŋeyere! Am'omiyo go odiyo cunye swa munyo ciro joma keme pere d'otiyo kwoŋ jo, m'oyido ikidho reyo woko jo.

²³Aka iŋeyo nedi, kole ka Were otimo ameno ma mito nyutho dwoŋ pere m'oŋaŋ ri joma go kidho nyutho jo wor pere, ma go oyiko jolo i dwoŋ pere.

²⁴Kole meno mako kwoŋ wan ma go olwoŋo, ki nyaka wok kwoŋ Joyuda kende, to kwoŋ Jopath bende.

²⁵Kole me a gima go waco i kitawo pa Hoseya: “Ji me m'oyido jok'obedo aparan, abino lwoŋo jo ni, ‘Ji paran.’ Nono m'onwaŋo akimaro, abino lwoŋo ni, ‘Migos paran.’

²⁶Aka i kabedo m'onwaŋo owac'iye rijo ni, ‘Wikibedo ji paran.’ Kenyo am'ibino lwoŋ'iye jo ni nyithindho pa Were makwo.”

²⁷Aka Isaya luwo kwoŋ Isiraili ni, “Kada nyithindho pa Isiraili jothoth pa kwoyo ma nam, nyaka manok kwoŋ jo am'ibino botho.

²⁸Kole Rwoth bino cowo thumo banja pere i yoto ri piny.”

²⁹Aka gime nitie paka Isaya cango owaco ni, “Bedi Rwoth Majameni je k'oweyo ri waye nyikway wan moro, di wabedo paka Sodom, di walokere paka Gomora.”

³⁰To wanowaci nedi? Jopath m'onwaŋo jokitem bedo i tiro gi Were, onyo okethi jo i tiro gine ro yeyo pajo;

³¹kareno Joisiraili m'onwaŋo jorango tiro cungo kwoŋ Cik, jok'onyalo kuro Cik nago.

³²To raŋo? Rupiri gima jotimo onwaŋo k'ocungo kwoŋ yeyo to kwoŋ tic mabeyo ayino. Jocer wi tele ma redho jo,

³³ma ndiko luwo kwoŋe ni, “Neni, aketho i Zayon tele ma bino miyo ji cer, Tele ma bino miyo jo podho. To ŋat'oyey go, k'owey wiye wokwoti.”