Read dhopadhola 1 Jokorintho 10 Bible Online

1 Jokorintho 10 - dhopadhola bible

1 Jokorintho 10

¹Wutmera, amito wipoy gim'otimere gi kwarere mawan ma joluwo Musa. Joje jowotho i pendi pondeponde, aka joje joluwo i dier Nam M'obokere.

²Joje jolimo batisimo i pondeponde kodi i nam paka joma luwo Musa.

³Joje jocamo mugat nger acel m'owok bongi Were,

⁴to jomadho gir'amadha nger acel m'owok bongi Were; ato jomadho pi m'owok i tele m'owotho gi jo aka meno oyido obedo Kristo won.

⁵To kad'ameno Were k'osangala kodi jom'oloyo i thotho kwoŋ jo, am'omiyo obol jo woko i thim to jotho.

⁶Onyo gigipiny me je obedo gir'anena riwan, ma fonjo wan nike wakiri wawanya gigipiny mareco paka jotimo.

⁷Wikiri wilam cal makicar paka jomegi kwoŋ jo jotimo paka ndiko waco ni, “Jonica jobedo piny cemo gi medho, to joay miel.”

⁸Wakiri watim cot paka jomegi kwoŋ jo jotimo, to gana piero ario g'adek kwoŋ jo tho i ndelo acel.

⁹Wakiri watem Rwoth, paka jomegi kwoŋ jo jotimo, to thwole neko jo.

¹⁰Wakiri waŋunyaŋunya, paka jomegi kwoŋ jo jotimo to Malaika ma janek reyo jo woko.

¹¹Gigipiny me je otimere paka gir'anena ri joman, aka ondiki ma fonjo wan ma wanitie i hongo ma gik ndir cegin tund'iye.

¹²Ŋata paro ni ocungo m'otire wogwokere ŋey wokiri wopodhi.

¹³Ongoye karatem moro je ma bino riwin ma kicale gi ma bino ri dhano je. Kole Were genere, aka k'oyey karatem ma bino riwin wokadhi kor win, to ka karatem moro obino, go bino miyo win royo ma both aka ŋey winyal ciro.

¹⁴Am'omiyo, jowotan, gwokere win kwoŋ lamo cal makicar.

¹⁵Aluwo gi win paka joma niaŋ; wiwegi kaŋasa win gim'awaco.

¹⁶Ka wafoyo Were ri agwata ma disilwany ma wamadho, meno wakibedo i riwirok acel gi remo pa Kristo? Aka mugat ma waturo aka wacamo; k'obedo riwirok i acel gi Kristo?

¹⁷Kole paka mugat nitie acel onyo wajoje bende, kada wathothi, wabedo del acel, rupiri wajoje wacamo mugat acel no.

¹⁸Pari win kwoŋ Joisiraili; joma camo gim'ocowere gine i wi migam meno jokinitie kanyacel i tic ma migam?

¹⁹Gim'awaco dwoŋ mere aŋo? Nike cal makicar kosa cemo m'ocow gine cal no nitie iye gimoro?

²⁰Be, gim'awaco obedo ni gim'ocowere gine wi migam manyakafir meno ocow gine jwogi, to ki Were. Aka akimiti ni wiriwere gi jwogi.

²¹Wikinyal madho gim'owok iy'agwata pa Rwoth kodi apa jwogi bende. Wikinyal cemo dhower pa Were to odoko wicemo dhower pa jwogi bende.

²²Onyo wanomiy Rwoth wotim nyeko? Wiparo nike watek loyo go?

²³Kada winopar ni, “Cik yeyo wan timo gimoro je.” To kibedi ni kisi gimoro je dikony.

²⁴Wongoye moro ma rango bero pere won kende, to bero pa jowote bende.

²⁵Cami gimoro je m'itana i katale, m'ongoye kiganagana moro je i paro ma cunyin.

²⁶Kole paka ndiko waco, “Lowo kodi gimoro je manitie i iye obedo apa Rwoth.”

²⁷Ka ŋat'ongoye gi yeyo olwoŋin cemo aka iridho kidho, cami gim'okethi ruwaŋin m'ongoye kiganagana moro je i paro ma cunyin.

²⁸To ka moro owaco rin ni, “Me cemo m'ocow gine cal makicar.” Onyo ikir'icam cemo no, ma kweyo cuny ŋat'owaco rin ameno ma konyo paro ma cunye;

²⁹akiwaci ni ma konyo paro ma cunyin, to ma cuny ŋati ca ayin. Nyatoro nyalo penjo ni, “Onyo raŋo ma siem paran wocungi kwoŋ paro ma cuny ŋatiman?

³⁰K'atieko ran foyo Were ri cemo paran, raŋo ma ŋatiman pusa an ro cemo m'atieko kiri keth'iye silwany?”

³¹Am'omiyo, gima witimo je, obedi ni wicemo kosa wimadho gimoro, tim win ameno ma miyo Were dwoŋ.

³²Wikiri wiŋedhi cuny Joyuda kosa Jopath, kosa kitipa pa jom'oyeyo.

³³Wibende tim win paka atimo. Ato atemo kisangala dhano je i gimoro je m'atimo, m'ongoye paro kwoŋ bero paran won, to bero pa ji mathoth ayino, ŋey jowonyal limo both.