Read dhopadhola 1 Jokorintho 11 Bible Online

1 Jokorintho 11 - dhopadhola bible

1 Jokorintho 11

¹Tim win gima wineno kwoŋan paka abende atimo gim'aneno kwoŋ Kristo.

²Afoyo win rupiri ndir je wipoyan aka wiluwo fonji m'amiyo win.

³To amito wiŋey ni Kristo obedo jatel pa jacwo je, jacwo obedo jatel pa cege, aka Were obedo jatel pa Kristo.

⁴Am'omiyo, jacwo ma lamo Were kosa tuco mikwenda pa Were m'oboyo wiye meno cayo jatel pere.

⁵Aka dhako moro je ma lamo Were kosa tuco mikwenda pa Were ma k'oboyo wiye meno bende cayo jatel pere: Pokirok ongoye kwoŋ go kodi dhako m'oliel wiye.

⁶Ka dhako kiboy wiye, ere woliel woko. To paka obedo giwickwot dhako lielo wiye kosa ŋado ye wiye, go ripo boyo wiye.

⁷Jacwo kiripi boyo wiye, rupiri go nyutho cal kodi dwoŋ pa Were. Aka dhako nyutho dwoŋ pa jacwo.

⁸Ato k'ocwey jacwo wok kwoŋ dhako, to dhako ama owok kwoŋ jacwo.

⁹Aka jacwo k'ocwey ri dhako, to dhako ama ocwey ri jacwo.

¹⁰Am'omiyo ro jomalaika ma joneno, dhako ripo bedo gi giboyo wiye ma nyutho nike go nitie i meni pa cwore.

¹¹To kad'ameno, i kwo mawan i Rwoth, dhako kibedi ma k'othenere kwoŋ jacwo, odoko jacwo bende kibedi ma k'othenere kwoŋ dhako.

¹²Ato paka dhako ocwey wok kwoŋ jacwo, apaka bende jacwo nywole wok kwoŋ dhako; aka gigipiny je wok bongi Were.

¹³Wiwegi neni win: Otire ka dhako kwayo Were gi wiye ma k'oboy?

¹⁴Kwo ma kisi ndelo won kifonji win ye ni jacwo m'oweyo ye wiye ogaŋere meno won dwokere cen,

¹⁵ma to ri dhako meno a bero pere? Ato omiy go ye wiye maboyo no paka giumirok.

¹⁶To ka moro mito piem kwoŋ gime, awaco nyaka ni wangoye gi kite man aluwa, kada i kitipa pa jom'oyeyo Were je.

¹⁷I fonji me, adieri akifoy win: Rupiri cokirok mewin medo win raco ayin loyo bero.

¹⁸Marapena, awinjo nike nitie pokirok moro i cokirok mewin, to fodi akiyey odoco ni timere ameno.

¹⁹(Aka pokirok no ripo aripa bedo i dier win ŋey jor'adieri jowonenere kamaler.)

²⁰Ato ka wiromo kanyacel kere wikibin riwin camo Cemo pa Rwoth M'othieno ma gike,

²¹rupiri ka wicemo, dhano je won comere gi cemo pere ma kikur wadi; ma miyo joman kec neko jo kareno joman jotieko rigin madho gimoro.

²²Wingoye gi pecin mewin ma cemo gi or'iye gir'amadha? Kosa wimito cayo kitipa pa jom'oyeyo Were ayino gi miyo jocandi kumo? Wiyenyo awaci riwin aŋo kwoŋ gime? Onyo afoy win? Be! Ak'otim ameno!

²³Kole alimo fonji me wok bongi Rwoth aka abende akelo riwin: Nike Rwoth Yesu, wor m'ocam'iye rigo sereko, okwanyo mugat,

²⁴ofoyo Were, oturo to waco ni, “Me delkwoŋan, m'omiy win. Tim win gime ma poyan.”

²⁵I yo acel, okwanyo agwata munyo cemo m'othieno orumo to waco ni, “Me agwata ma remo paran ma cikirok manyen. Onyo wangi kisi ka wicamo mugat me aka wimadho gima nitie iy'agwata me, meno wituco tho pa Rwoth cuka go odwoki.”

²⁶Kole cuka Rwoth obin, wibino tuco tho pere wangi ka wicamo mugat me aka wimadho gima nitie iy'agwata me.

²⁷Am'omiyo, ŋat'ocam mugat pa Rwoth kosa omadhi gima nitie iy'agwata pere i kite ma kiripi, meno timo gima kiripi kwoŋ del pa Rwoth kodi remo pere.

²⁸Dhano je ripo kutho kikaŋasa kwo pere mafodi k'ocamo mugat me kosa madho gima nitie iy'agwata me.

²⁹Ato ŋata camo aka madho gigipiny me ma kinen dwoŋ manitie i del pa Rwoth, meno won ketho banja kwoŋe.

³⁰Am'omiyo jomathoth kwoŋ win jotwo aka jongoye gi meni, aka joman jotieko kiri tho.

³¹Bedi kutho wakaŋasa kwo mawan di wakidonji i banja gi Were.

³²Ka Rwoth thumo riwan banja meno miyo wan gir'acula ma tiro wan, ŋey wokiri wothum riwan banja kanyacel gi ji ma piny.

³³Am'omiyo, wutmera, ka wicokere kanyacel i dhower pa Rwoth, kuri win jowoti win.

³⁴Ka nyatoro thoth gi kec, go ripo cemo peco aka ŋey ka wiromo kanyacel kite mewin wokiri womiy win donjo i banja gi Were. Kwoŋ wac man, abino cowo k'abino.