Read dhopadhola 1 Jokorintho 2 Bible Online

1 Jokorintho 2 - dhopadhola bible

1 Jokorintho 2

¹Wutmera, munyo abino bongi win fonjo adieri pa Were m'opanere, akioro wac maboyo kodi rieko ma malo.

²Kendo akimito ŋeyo giman je kwoŋ win munyo fodi anitie gi win kwanyo woko Yesu Kristo, aka m'ogur wi musalaba.

³Am'omiyo munyo abino bongi win oyido meni oloyan kareno akirin ro lworo.

⁴Aka luwo paran gi mikwenda paran k'obedo i luwo ma rieko pa ji, t'inyutho kamaler meni pa Cuny Maleŋ,

⁵ŋey yeyo mewin, wokiri wothenere kwoŋ rieko pa dhano, to kwoŋ meni pa Were ayin.

⁶Kad'ameno, waluwo gi rieko ri joma jotegino i yeyo. To k'obedo rieko ma ndir me, kosa apa jodhum ma pama, ma jokidho rerok woko.

⁷Rieko ma wafonjo obedo rieko pa Were m'opanere, m'opan ri ji, ma Were oyido otieko yiko miyo wan wok con ma piny fodi k'ocwey.

⁸Ongoye kad'acel kwoŋ jodhum ma pama m'oyido oŋeyo rieko me. Bedi joŋeyi di jok'oguro Rwoth m'opoŋ gi dwoŋ kwoŋ musalaba.

⁹To paka ndiko waco ama: “Gima dhano fodi k'oneno kosa k'owinjo wok cene, gima dhano fodi k'oparo kwoŋe ni d'otimere a gima Were oyiko ri jom'omaro go.”

¹⁰To Were onyutho wan nyaliŋliŋ me luwo i Cuny Maleŋ pere. Ato Cuny Maleŋ udo gimoro je, kada gimoro m'opanere kamadiny i Were.

¹¹To ŋa ma diŋey paro pa dhano kwanyo woko cuny dhano won manitie i go? Meno bende apaka Cuny Maleŋ pa Were won am'oŋeyo paro pa Were.

¹²Wakilimo cuny manyapiny, to walimo Cuny m'owok bongi Were, ma miyo waniaŋ kwoŋ gimoro je ma Were omiyo wan ma nono.

¹³Meno a wac ma waluwo; wakiluw wac ma rieko ma dhano am'ofonjo wan, to waluwo gima Cuny Maleŋ ama fonjo wan, aka watito adieri ma Cuny ri joma bende jonitie gi Cuny Maleŋ.

¹⁴To ŋat'ongoye gi Cuny kinyal limo mic ma wok bongi Cuny Maleŋ pa Were, rupiri obedo rigo gimiŋo: Go kinyal niaŋ kwoŋe, kwoŋbedo dwoŋ mere niaŋere ri ŋata bende nigi Cuny Maleŋ pa Were.

¹⁵Ŋata nitie gi Cuny nyalo niaŋ kwoŋ gimoro je, aka ongoye ŋata niaŋ kwoŋ gima nikwoŋ go.

¹⁶Ato ndiko waco ni, “Ŋata diŋey paro pa Rwoth aka womedi miyo go rieko?” To wan, wanitie gi paro pa Kristo.