Read dhopadhola 1 Jokorintho 3 Bible Online

1 Jokorintho 3 - dhopadhola bible

1 Jokorintho 3

¹To wutmera, akinyalo luwo gi win paka joma nitie gi Cuny; to paka ji manyapiny, paka nyithindho maŋic i yeyo manyakristo.

²Apidho win gi cak makiweno cemo matek, rupiri oyido fodi wikiyikere, aka kada pama je fodi wikiyikere,

³kwoŋbedo fodi kwo mewin obedo manyadel. Ka witimo nyeko wiwegi aka widhawere, meno kinyuthi paka fodi wibedo ji ma kisi ndelo munyo wioro kula mere?

⁴Ka ŋat'acel kwoŋ win waco ni, “An aluwo Paulo.” Man ni, “An aluwo Apolo.” Meno wikibedo ji ma kisi ndelo?

⁵Onyo, Apolo a ŋa? Aka Paulo a ŋa? Kole wabedo nyaka jotic pa Were ma jokelo riwin yeyo. Kisi dhano kwoŋ wan otimo nyaka tic ma Rwoth omiyo go timo.

⁶Apidho kodhi, Apolo oywoy'iye pi, to Were won am'omiyo gim'opidhi dongo.

⁷Am'omiyo gima mako kwoŋ ŋat'opidho kosa ŋat'oywoy'iye pi ama k'obedo gimadwoŋ, kwanyo woko Were ma miyo gimoro dongo ama dwoŋ.

⁸Japidho kodi jaywoy pi je jorom aroma; Were bino miyo jo kemba cungo kwoŋ tic ma jotimo.

⁹Kole wariwere kanyacel i tic ri Were, aka wibedo ndelo pa Were kodi geto pere.

¹⁰Cungo kwoŋ nema ma Were omiyan, atimo tic paka jandijo ma geto m'oketho tiendi ot, aka ŋatiman am'onyo geto i kore. Aka dhano je ripo gwoko paka go medo tic kwoŋ ot no.

¹¹Ato ongoye misingi man ma nyatoro di caki kendo, kwanyo woko m'otiek cako no won, m'obedo Yesu Kristo.

¹²Joman jobino oro zahabu, feza, kosa telin ma welo i wi misingi no; aka joman mbawo, lum m'othwo, kosa kanja.

¹³Aka bero ma tic pa kisi dhano bino nenere munyo Ndelo pa Kristo thango gino kamaler, rupiri mac ma Ndelo no bino kikaŋasa tic pa dhano je; mac no bino kipima to nyutho bero kosa raco mere.

¹⁴Ka nyatoro ogeti i wi misingi no to tic pere ciro mac, go bino limo kemba.

¹⁵To ka tic pa moro owaŋ woko, go bino keŋ kemba mere kada nende go won bino both rigo, to kareno laboth paŋini obudhere owok i mac.

¹⁶Wikuya nike wibedo Ot pa Were, aka Cuny Maleŋ pa Were bedo i win?

¹⁷Ŋata nyeko Ot pa Were, Were bino reyo go woko, rupiri Ot pa Were leŋ aka wiŋati wibedo Ot ago.

¹⁸Moro wokiri wowondere. Ka moro kwoŋ win paro nike go riek i hongo ma pama me, go ripo bedo pa ŋatamiŋ, ŋey wolokere ŋatariek.

¹⁹Kole gima piny tero paka rieko meno gimiŋo ri Were, rupiri ndiko waco ni, “Were ciko jomariek i rieko pajo.”

²⁰Aka ndiko man waco ni, “Rwoth oŋeyo nike paro pa jomariek ongoye kony.”

²¹Am'omiyo, ongoye pakirok moro je kwoŋ gima dhano nyalo timo. Kole gimoro je obedo mewin:

²²Paulo, kosa Apolo, kosa Petero, kosa piny me, kwo gi tho, kosa hongo ma pama kodi ma bino; me je mewin.

²³Aka wibedo apa Kristo. Aka Kristo obedo apa Were.