Read dhopadhola 1 Jokorintho 4 Bible Online

1 Jokorintho 4 - dhopadhola bible

1 Jokorintho 4

¹Wiripo neno wan paka jotic pa Kristo, m'omiy jo adieri pa Were m'opanere.

²Onyo gima yenyere kwoŋ dhano m'oketh i tic meno a genirok ri rwoth pere.

³Aka, akidew kad'onyo withum ran banja, kosa kapido ma piny me ama thum; kad'awon akithum banja paran.

⁴An won akinen raco moro m'anigine to meno kinyuthi nike angoye gi raco. Rwoth ama thumo ran banja.

⁵Am'omiyo wikiri withum ri nyatoro banja mafodi ndir k'otundo. Kutho kur win bino pa Rwoth, ma bino wodho i lero gimoro je m'opondo i mudho kendo bino thango kamaler atoŋa ma cuny ji. I hongo no ama nyaka dhano je bino lim'iye pak ma ripo gine wok bongi Were.

⁶Wutmera, ma konyo win, aluwo kwoŋ Apolo kodan paka ranen, ŋey winiaŋ dwoŋ wac m'ondiki ni, “Maki cik m'otire.” Meno aka bino ngoye kwoŋ win ŋata pakere gi dhano acel to cayo ŋatiman.

⁷Aka ŋa ma neno gim'opokere i in? Aŋo m'initie gine ma k'omiyin amiya? To inyalo kwot nedi, paŋini gim'inigine k'obedo mic?

⁸Kole kere witieko riwin limo gimoro je ma wiyenyo! Witieko ŋaŋo! Witieko lokirok kerin, kada wawegi wakibedo ameno! Bedi nyalere di wibedo kerin adieri, aka di wabende wabedo kerin kanyacel gi win.

⁹Kole cal ran pa Were omiyo wan jomoor kabedo macowe swa, pa ji m'othumi rijo banja ma tho, rupiri walokere gir'anena ri jomalaika kodi ji ma piny.

¹⁰Wabedo jomamiŋ kwoŋbedo Kristo; to wiriek riwin i Kristo! Wanyap, to witek riwin! Ocay wan, to win omiy win dwoŋ!

¹¹Kiri gi pama fodi wanitie gi kec kodi riyo; waruko oselin; igoyo wan; wangoye gi pecin;

¹²watiyo matek gi cingi wan aka walimo gikonyirok. Ka dhano okwoŋo wan, wamiyo go silwany ayin; ka ilwenyo gi wan, waciro;

¹³k'oyeti wan, wadwoko wac i bero. Watieko lokere yuk ma piny; aka kiri pama won me wacal riwan cwodho.

¹⁴Andiko riwin ama ki ro mito kwoto wiy win; t'atimo ama ma fonjo win paka nyithindho paran ma kacunyan.

¹⁵Kole kada wibedi gi jofonji gana apar i kwo mewin, i Kristo winitie gi bawin acel kende. Kole i kwo mewin i Kristo Yesu alokere bawin munyo akelo riwin Wac Manyen Maber.

¹⁶Am'omiyo, akwayo win ni luw win kite paran paka ranen m'amiyo win.

¹⁷Atoŋa me am'omiyo adhiro riwin Timothe wodan m'amaro kendo m'ogenere i Rwoth. Go bino poyo win royo m'aluwo i Kristo Yesu, odoko m'afonjo i kweth pa jokristo iye je.

¹⁸Jomegi kwoŋ win jopakere ka joparo ni kono ak'obin bongi win.

¹⁹To ka Rwoth oyeyo, alabino bongi win mayot, aka abino neno meni pa jopakirok no, makiweno nyaka luwo pajo kende!

²⁰Kole ker pa Were k'obedo nyaka luwo kende, t'obedo meni.

²¹Mene ma wifoyo? Abin bongi win g'adasa, kosa gi mar kodi mwolo?