Read dhopadhola 1 Jokorintho 8 Bible Online

1 Jokorintho 8 - dhopadhola bible

1 Jokorintho 8

¹Onyo, i wac ma mako kwoŋ cemo m'ocow gine cal makicar: Ato adieri, wajoje wanigi ŋeyo kwoŋ wac, paka jowaco. Ŋeyo no adieri, kelo ri dhano winjirok nono; to mar ama miyo dhano dongo i yeyo.

²Dhano nyalo paro nike go oŋeyo gimoro, to kere fodi ongoye gi ŋeyo m'otire ma go oyido ripo bedo gine.

³To ŋat'omaro Were, Were ŋeyo go.

⁴Am'omiyo, i wac ma mako kwoŋ camo cemo m'ocow gine cal makicar: Waŋeyo ni cal makicar k'obedo gima nigi kwo i piny ka; aka adieri waŋeyo ni Were nitie acel kende m'ongoye man.

⁵Kada bedi ni gigipiny man m'ilwoŋo ni, werin, oyido nitie kuya i polo kosa i piny ka, (aka gigipiny m'ilwoŋo ni, werin kodi rwodhe no, jothoth,)

⁶to riwan Were nitie acel kende, Were Bawan, m'ocweyo gigipiny je, ma gimoro je wok bonge; ma wakwo rigo; odoko Rwoth nitie acel kende, Yesu Kristo, ma i go gigipiny je ocwey, aka go ama miyo wakwo.

⁷To ki ji je ma jonitie gi ŋeyo i gime. Jomegi oyido joasa ŋiyo gi cal makicar ma kiri konon ka jocamo nger cemo no fodi joparo nike meno cemo m'ocow gine cal makicar; aka paka paro pajo fodi nyap, joneno ni cemo no onyo obedo gimakoc.

⁸To cemo k'ama keli wan cegin gi Were; odoko wakikeŋ gimoro kada wakicemo, kendo wakilim gimoro kada wacem.

⁹To kure win, rupiri siem mewin nyalo lokere gima redho joma nyap i yeyo.

¹⁰Ka dhano ma paro pere nyap i wac me nenin, in m'iŋoyo ni initie gi ŋeyo nago, munyo i cemo i migam pa cal makicar, gino k'omedi go meni ma camo cemo m'ocow gine cal makicar?

¹¹Ameno ŋata nyap me, m'obedo omerin ma Kristo otho rigo, bino tho ro wac ŋeyo perin!

¹²Aka k'itimo gimarac ameno ri jom'oyeyo jowotin, t'imiyo paro ma cuny jo manyap no litho, meno itimo gimarac ri Kristo.

¹³Am'omiyo ka cemo miyo omera timo gimarac, ak'odoko acami riŋo kendo, ŋey akir'amiy omera kosa nyamera wopodhi i gimarac.