Read dhopadhola 1 Jokorintho 9 Bible Online

1 Jokorintho 9 - dhopadhola bible

1 Jokorintho 9

¹Kere angoye gi thwolo? Akibedo jamoor? Kere fodi akineno Yesu Rwodhiwan? Wikibedo jom'owok i tic paran i Rwoth?

²Kada nende akibedo jamoor ri joman, to aripo bedo riwin! Kole win a ranyuth nike abedo jamoor.

³Me a wac m'athielere gine kwoŋ joma dwaro wac kwoŋan.

⁴Nyutho ni wangoye gi meni ma limo cemo gi gir'amadha i tic mawan?

⁵Waŋati wakiripi woth gi mon mawan paka jomoor man jotimo, kodi wutmin Rwoth, kodi Petero?

⁶Kosa wan kodi Barinaba kende ama waripo tiyo ri kwo mawan aka walimi gir'acama?

⁷Ŋa ma bedo jasirikale to won culo gima go oro i lweny? Kosa ŋa ma jafur ma kicam gima nyak ma ndelo vini pere? Kosa jakwath mene ma kior cak ma wok kwoŋ mwendi pere won?

⁸Wiparo ni gim'awaco me wok i paro pa dhano? Cik bende kiwaci ameno won?

⁹Ondiki i Cik pa Musa ni, “Ikir'iculi dhok mirikwa ka ŋinyo rin withi ŋano nyinge wooy.” Onyo, wiparo ni Were dewo kwoŋ megikwe ayino kende?

¹⁰Kosa go k'owaco ameno ka luwo kwoŋ wan tektek mere? Kole gino ondiki riwan rupiri jafur furo, jaŋinyo ŋinyo kareno joje jogeno migew wok kwoŋ gim'okec.

¹¹Kole watieko cwoyo kodhi ma cuny i dier win. Onyo meno waŋati wanyeko ka wanwaŋo ye gimoro bongi win?

¹²K'inen joman jonigi thwolo ma nwaŋo gimoro bongi win, onyo mar'aŋo ma wan ama wakigen kada maloyo meno kwoŋ win? To wakioro thwolo no; kucel waciro gimoro je ni wakiri wakethi rageŋ i yo pa Wac Manyen Maber kwoŋ Kristo.

¹³Kere wikuya nike joma tiyo i Ot pa Were jolimo cemo pajo i Ot pa Were. Aka joma cwayo wi migam jolimo pok i tic ma cwayo no.

¹⁴Meno bende apaka joma tito Wac Manyen Maber mapa Rwoth joripo kwo gi wac no won.

¹⁵To fodi akioro thwolo no je kada dicel, kendo onyo akindiki gime ma kwayo win ni witim ran ameno. Them onyo atho ma akiweyo nyatoro womayan gim'apakere gine me to loko nyaka pa wac awaca.

¹⁶To akinyali pakirok i tito Wac Manyen Maber, rupiri atimo gim'ooran aora. Aka d'obedo ran marac ka akitito Wac Manyen Maber me ri ji.

¹⁷Bedi atimo tic paran paka awon ayero d'ageno limo kemba, t'atimo tic m'aripo timo ma Were ama ogenan gine.

¹⁸Onyo kemba paran aŋo? A me: Tito Wac Manyen Maber ri ji m'ongoye cul, kendo ma akioro thwolo m'oyido an gine ma limo gimoro.

¹⁹Oyido akibedo ran ŋeca pa moro, t'onyo awon alokere ŋeca pa dhano je ŋey ayway ji mathoth paka nyalere.

²⁰I dier Joyuda abedo paka Jayuda ŋey ayway jo; i dier joma luwo Cik pa Musa, abedo paka ŋata luwo Cik (kad'onwaŋo an won akibedo jaluwi Cik), ŋey ayway jo.

²¹K'anitie i dier Jopath, abende abedo paka Japath woko ma Cik pa Joyuda, ŋey ayway jo. Me kinyuthi ni akiwinji cik pa Were, rupiri anitie i cik pa Kristo.

²²Gi joma nyap i yeyo, abedo manyap paka jo, ŋey ayway jo. Am'omiyo abedo gimoro je ri ji je aka anyal both jomegi kwoŋ jo.

²³Atimo gime ri bero pa Wac Manyen Maber, ŋey wopokan silwany mere.

²⁴Wikipoy ni i ŋwec ma piem, joŋwec je joringo, to ŋat'acel kende ama limo kemba. Am'omiyo ringi cuka ibende ilimi kemba.

²⁵Jatuko ma piem moro je ripo yikirok ka fonjere cik ma tuko: Go timo ameno ŋey wolimi sangaria ma kiyindira, to wan walwenyo ri sangaria ma bino kiyindira cil gi cil.

²⁶Am'omiyo akiringi aringa ameno nono, meno am'omiyo acalo jagoy adol ma kiwiti adol pere i hongo nono.

²⁷Amiyo del paran fonji m'oromo aka wolokere m'ocwiny munyo adhumo go, ŋey k'atieko tito ri joman Wac Manyen Maber, an awon akir'akeŋ kemba mere.