Read dhopadhola 2 Jokorintho 1 Bible Online

2 Jokorintho 1 - dhopadhola bible

2 Jokorintho 1

¹Balwa m'owok bongi Paulo, jamoor pa Kristo Yesu i mito pa Were, kodi omin wan Timothe. Ri kitipa pa jom'oyeyo Kristo ma Korintho, kodi ji pa Were je ma Akaya.

²Weyi nema gi siem ma wok bongi Were Bawan kodi Rwoth Yesu Kristo wobedi gi win.

³Were wofoy, Ba Rwodhiwan Yesu Kristo, Bawan ma jawor, Were ma jakweyi cuny ji!

⁴Go kweyo cuny wan i teko ma waluw'iye je, ŋey wanyal bende kweyo cuny ji ma jonitie i teko ma nger je, munyo waoro kony ma wawegi bende watieko limo bongi Were.

⁵Paka wariwere gi Kristo i candirok pere m'omore, ameno bende luwo kwoŋ Kristo wariwere gi go i kony pere m'oasere.

⁶Ka wacandere, meno ma konyo win kodi ma both mewin; ka okony wan, meno okony win bende aka omiy win meni ma ciro kiti candirok ma wabende waciro.

⁷Am'omiyo, geno mawan ma wan gine kwoŋ win kiyengere, rupiri waŋeyo ni paka wiriwere kodi wan i candirok mawan, onyo wibende wiriwere gi wan i kony ma walimo.

⁸Wakimiti wibedi ma wikuya, wutmin wan, teko ma walimo iy'adec ma Asia. Bieto m'oyim riwan obedo madwoŋ aka mapek swa, m'omiyo oyido wakigen kiri kwo kendo.

⁹Oyido waparo nike otiek thumo riwan banja ma tho. To gino obedo ameno ŋey wathenere, ki kwoŋ wawegi, to kwoŋ Were ayin, ma cerino jom'otho.

¹⁰Go obotho wan kwoŋ tho ma d'orac m'oasere, aka fodi go bino botho wan. Waketho geno mawan kwoŋ go nike go bino medere gi botho wan kendo;

¹¹aka wiripo konyo wan gi kwayo. Meno aka ji mathoth jobino foyo Were riwan, ro mic ma go omiy wan cungo kwoŋ kwayo pa ji mathoth.

¹²Me a gima wapakere gine: Paro ma cuny wan miyo waridho ni i kwo mawan i piny ka, tektek mere i riwirok mawan gi win kanyacel, wawotho i leŋo kodi i adieri pa Were. Aka watimo ameno gi meni ma nema pa Were, makiweno gi rieko pa dhano.

¹³Kole wakindiki riwin gima wikinyal kisoma gi niaŋ kwoŋe. Aka ageno nike paka fodi wikiniaŋ kwoŋ wan odoco, wibino niaŋ kicutho,

¹⁴(i gima pama winiaŋ wiyewiye), ŋey i Ndelo pa Rwoth Yesu winyal pakere gi wan paka bende wabino pakere gi win.

¹⁵Paka onwaŋo atieko ridho timo gime, oyido ayiko bino liewo win kutho, ŋey wilimi silwany dirio.

¹⁶Kole onwaŋo acano liewo win k'akidho yu Makedonia, aka k'adwoko anwaŋ ye kony bongi win i woth paran ma kidho Yuda.

¹⁷I can paran me, oyido acalo pa jawirok? Manago atimo can manyapiny kareno awaco ni “Ey, ey.” Kosa ni, “Be, be.” Gi hongo no won?

¹⁸Paka Were obedo ŋata genere, cikirok mawan gi win k'obedo Ey kodi Be.

¹⁹Kole Yesu Kristo, Wod Were, ma wan kodi Sila gi Timothe wafonjo win kwoŋe k'obedo Ey kodi Be. Kucel i Kristo, fonji no ndir je bedo Ey.

²⁰Am'omiyo cikirok pa Were je, kada mathoth nedi, i Kristo bed'abeda Ey. Meno am'omiyo i Yesu Kristo, wawaco Ameno mawan, ma miyo Were dwoŋ.

²¹Kole Were won ama miyo wan, kanyacel gi win, cungo matek i Kristo; aka go won ama owiro wan gi mo i tic pere,

²²to ketho ranyuth pere kwoŋ wan paka wabedo apere, to ketho Cuny Maleŋ i cuny wan ma ridho ni lamiyo wan gimoro je ma go okano riwan.

²³Alwoŋo Were wobedi jakony paran rupiri go oŋeyo cunyan! Kole aworo win am'omiyo akidwoko yu Korintho.

²⁴Onyo wakitem cuko win gi gima wiripo yeyo, rupiri wicungo matek i yeyo. Kucel, watiyo gi win ri kisangala mewin won.