Read dhopadhola 2 Jokorintho 11 Bible Online

2 Jokorintho 11 - dhopadhola bible

2 Jokorintho 11

¹Ayenyo ni widiy cuny win kodan, kada cale p'abedo mamiŋ ye. Aka aŋeyo ni witimo ameno!

²Atimo nyeko riwin paka Were timo; ato wicale nyako maliw m'atieko yiko ni wonywomere gi jacwo acel kende, aka manago Kristo.

³To alworo ni paro mewin bino nyekere to wiweyo miyirok mewin mar'adieri odoko makicutho ma winitie gine ri Kristo paka Eva otimo munyo jwogi owondo go gi twodo pere ma nyariekorieko.

⁴Kole wirikin jolo dhano je ma bino bongi win, kada ŋato fonjo kwoŋ Yesu man, makiweno ma wafonjo win kwoŋe; aka wijolo cuny kodi Wac Manyen Maber m'opokere gi ma winwaŋo bongi wan.

⁵Akipar nike an cen kada masisiri kwoŋ jomoor mewin manyakare no!

⁶Kono akifonjere i luwo, to ki i rieko be; aka watieko nyutho win gime kamaler hongo je kodi i gimoro je.

⁷Munyo atito riwin Wac Manyen Maber mapa Were akiyenyo kwoŋ win wodho cul moro; amwole ŋey atiŋ win malo. Meno onyo atimo marac?

⁸Kole onwaŋo akwalo lim pa jokristo man munyo ajolo kony pajo ma tic riwin ayino!

⁹Aka munyo abedo gi win akijoko win ni wikonyan kada munyo onwaŋo ayenyo pesa; kole jom'oyeyo ma Makedonia ama jokelo ran gimoro je m'oyido ayenyo. Fodi akikelo riwin peko moro, kendo akibino timo ameno kiri yuwaŋe!

¹⁰G'adieri pa Kristo i an, aciko ni yumirok paran me ongoye ŋata bino juko kamoro je i Gris.

¹¹Raŋo ma awaco ama? Obedo rupiri akimaro win? Kole Were oŋeyo ni amaro win.

¹²Abino medere gi timo gim'atimo, ŋey ageŋ jomoor man no bedo kodi atoŋa ma yumirok gi waco ni bende jotiyo paka wan.

¹³Jono jok'obedo jomoor mar'adieri; jobedo jomoor ma twodo, ma jokethere ni jo bende jomoor pa Kristo.

¹⁴Aka meno ki gidhier, rupiri kiri Sitan bende twodo to lokere paka malaika ma lero!

¹⁵Am'omiyo k'obedo gidhier ka jotic pere bende jotwodo ni jobedo jotic ma lero. Rumacen jobino limo gima ripo gi jo tirtir ro gigipiny ma jotimo.

¹⁶Adoko amedo waco ama: Moro wokiri wopar nike amiŋ. To ka wiparo ameno, ere jolan win to kada paka ŋatamiŋ, aka ŋey ayumere ye nyaka mathin.

¹⁷Ato wac ma aluwo me k'obedo wac ma wok bongi Rwoth; to me onyo aluwo paka ŋatamiŋ.

¹⁸Paka nitie jomathoth ma joyumere gi nyaka gigipiny manyapiny, abende onyo alatimo ameno.

¹⁹Ato wiriek riwin, am'omiyo wiyere kiri gi jomamiŋ!

²⁰Aka wiyere gimoro je ma bino miyo win or ma nger je, kosa loko win ŋecin, kosa cemo kwoŋ win, kosa limo ŋaŋo i nyapo mewin, kosa cayo win, kosa goyo lembi win adhoŋ.

²¹Kole wiyan kwot k'apoyo ni oyido wanyap swa ma wakinyalo timo ameno. To ka moro timo miseni to yumere gi gimoro, ka aluwo paka ŋatamiŋ, abende onyo alatimo miseni ma yumirok amanago.

²²Jobedo Joebulaniya? Kole an bende! Jobedo Joisiraili? Kole an bende! Jobedo nyikway Abraham? Kole an bende!

²³Jobedo jotic pa Kristo? K'aluwo pa janeko, abedo jatic maber loyo jo! Atieko tiyo matek loyo jo, atieko bedo i twec ndir mathoth loyo jo, otiek cwadan ndir madit loyo jo, aka atieko bedo cegin gi tho ndir mathoth loyo.

²⁴Dibic Joyuda jocwadan adasa piero adek g'abuŋwen;

²⁵Joroma jogoyan gi ludhe didek, aka ogoyan gi telin dicel; ye otieko bare ran i pi didek, aka dicel acowo sawa piero ario g'aŋwen i dier wakawaka munyo lekaleka kodan.

²⁶I woth paran m'omore aboth ri mikula ma jwombe, kodi jomac; aboth kwoŋ ji ma piny paran won, kodi ri Jopath; aboth i tindi, kodi i thim; aboth kwoŋ nam madongo, kodi kwoŋ jom'oyeyo ma twodo.

²⁷Atieko tic gi olo; ndir mathoth akibil nindo; abedo gi kec kodi riyo; ndir mathoth akicem, odoko koyo goyan kinyoro.

²⁸Aka, m'akituco gigipiny man, ndir je abedo i rembo ri kitipa pa jom'oyeyo je.

²⁹Ka dhano nyap, abende abedo manyap gine; ka moro opodho i gimarac, kole awinjo gi rem.

³⁰Ka ripo ayumere, abino yumirok kodi gigipiny ma nyutho paka anyap.

³¹Were kodi Ba Rwodhiwan Yesu, m'oripo g'apaka cil gi cil, oŋeyo nike akitwodi!

³²Munyo fodi oyido anitie Damasiko, gavana ma ndir pa Kere Areto oketho jokur i waŋkac ma tindi makan.

³³T'owodhan munyo icwayan piny iy'adita, gi hoŋ moro i kor ot, ameno t'abudho go.