Read dhopadhola 2 Jokorintho 12 Bible Online

2 Jokorintho 12 - dhopadhola bible

2 Jokorintho 12

¹Aripo medo yumirok kada kikel bero moro. Onyo pama abino luwo kwoŋ cal ma menyere kodi menyirok ma Wac ma Rwoth omiyan.

²Aŋeyo jakristo moro ma oro apar g'aŋwen m'okadho oyudhi go t'itero i polo mar'adek malo (akiŋeyo kuya gino otimere i del, kosa go oneno cal m'omenyere rigo; Were won am'oŋeyo).

³Weyi doko amedi waco ama: Aŋeyo ni ŋato oyudhi t'itero i polo (t'akuya ni gino otimere i del, kosa obedo cal m'omenyere rigo; Were won am'oŋeyo).

⁴Oter go i kabedo ma disiem i polo, aka kenyo go owinj'iye gigipiny ma kiwacere; gigipiny ma dhok dhano kinyal luwo.

⁵Am'omiyo, abino yumere kapa ŋato; to akibino yumirok kwoŋan an won, kwanyo woko gigipiny ma nyutho paka anyap.

⁶Kada bedi amito yumirok, je d'akibedo ŋatamiŋ rupiri d'aluwo gir'adieri. To ak'oyumere, rupiri akimiti moro wobedi gi paro ma malo kwoŋan ma kalo gima go otieko nenan atimo kosa owinjo munyo awaco.

⁷To ma jukan ŋey akir'akwoti gi pakirok ro menyirok ma urere m'aneno, okethi kwoŋan gima cale okudho, ma tiyo paka jamikwenda pa Sitan ma wocandan aka wojukan akir'abedi gi kwoto.

⁸Didek akwayo Rwoth i wac me, ni wokwany woko gino.

⁹To go odwokan ni, “Nema paran romin; kole meni paran asere kama nyapo niye.” Am'omiyo, asangala swa pakirok gi nyapo paran, ŋey meni pa Kristo wobedi kwoŋan.

¹⁰Aŋiyo ran gi nyapo, yet, candirok, lweny pa ji kodi teko ro tic ri Kristo. Kole ka angoye gi meni meno aka nyaka atek.

¹¹Onyo alokere paka ŋatamiŋ, aka wiŋati wimiyan abedo ameno. Kole wiŋati onwaŋo wiripo foyan, rupiri kad'akibedo gimoro, t'akinicen loyo jomoor mewin manyakare no.

¹²Kole gigipiny ma nyutho ni dhano obedo jamoor mar'adieri otim gi diyo cuny m'oasere i dier win: Ranyuth, gir'aura kodi tic madongo ma meni.

¹³Aŋo ma wikeŋ loyo kitipa pa jom'oyeyo man, kwanyo woko nike akikwayo win kony. Mondo cwakan win kwoŋ kibenga no!

¹⁴Me onyo mar'adek m'ayikere bino liewo win, aka akibino mito gimoro kwoŋ win. Ayenyo win ayino, to ki gigipiny mewin. Kucel nyithindho mathindho k'ama jolimo gigipiny ri jonywol, to jonywol ama jolimo gigipiny ri nyithindho pajo mathindho.

¹⁵Abino kisangala oro gimoro je m'anigine, makada an won gipi or ma konyo win. K'amaro win tektek ameno, onyo wiŋati winomaran mathin ma kirom?

¹⁶Am'omiyo, wibino yeyo ni, oyido akibedo bieto riwin. To wiwaco ni abedo jarieko aka aciko win gi bwo ma twodo.

¹⁷Nitie gim'akwanyo kwoŋ win i jomikwenda m'adhiro riwin?

¹⁸Adhiro Tito ni wobin, aka adhiro go kiri gi omin wan man ni wowothi gine. Kosa nitie gima Tito okwanyo kwoŋ win? Nyutho ni wakitiyo g'atoŋa acel? Kosa wakitimo can acel?

¹⁹Oyido wiparo ni hongo je watemo gwoko thenge mawan i waŋ win? Waluwo paka Kristo mito ni waluw ruwaŋ Were, aka gimoro je ma watimo jowotan, kole watimo ma konyo win!

²⁰Alworo ni kono kani atundo kenyo anyalo nwaŋo ni wipokere kodi paka oyido d'ayenyo wibedi, kosa kareno aŋat'apokere kodi paka di wiyenyo abedi. Alworo ni abino nwaŋo widhaw, kosa witimo nyeko, wioro nge kosa witimo mima, winyeko nyingi jowoti win kodi luwirok kicar, pakirok kodi nywowirok.

²¹Alworo nike ruman k'abino, Were paran bino miyan anwaŋo wickwot t'aywak ro jomathoth ma jotimo reco i ndir m'okadho aka fodi jok'oŋuto timo gigipiny makoc, cot kodi timo giwickwot.