Read dhopadhola 2 Jokorintho 13 Bible Online

2 Jokorintho 13 - dhopadhola bible

2 Jokorintho 13

¹Me onyo mirundi mar'adek m'abino liewo win. “Jokony ripo bedo ario kosa adek ma joridho kisi banja m'okel kwoŋ nyatoro.”

²Ndiri ca aniaŋo win kwoŋ jom'otimo reco munyo aliewo win mirundi mar'ario; to doko awaco kendo pama m'angoye bongi win ni: K'abino kendo, akibino weyo ŋat'otimo reco con kosa manyen ma k'olimo gir'acula.

³Ato wimito ŋeyo adieri ka Kristo luwo i an. Go kinyap ka tiyere gi win; kucel go nyutho meni pere i dier win.

⁴Kole ogur go wi musalaba i nyapo, to gi meni pa Were go odoko kwo. Wabende wanyap i go; to gi meni pa Were wabino kwo ka watiyere gi win.

⁵Kaŋasa win kwo mewin winen kafodi winitie gi yeyo. Wikuya ni Kristo Yesu nitie i win? Kono kosa timo ameno odhiero win kicutho.

⁶Ageno ni wibino ŋeyo ni kikaŋasa kwo mawan k'odhiero wan.

⁷Wakwayo Were ni di wikitim reco, ki ma nyutho ni kono wanyalo gimoro je, to ni witim gim'otire, kada wanocale jom'opodho.

⁸Ato wakinyali timo gima piemo kodi adieri pa Were, rupiri watiyo ri adieri no.

⁹Wasangala kada wabedo manyap tekin winitie gi meni. Am'omiyo, wakwayo nike wibende widongi i leŋo.

¹⁰Andiko gime munyo angoye bongi win; atimo ameno ni ka atundo bongi win akir'ater win gi mbaka, kareno aoro meni ma Rwoth omiyan madongo win, makiweno ma reyo win woko.

¹¹Onyo jowotan, kutho win! Tir win kwo mewin; winji win gim'awaco; yere win wiwegi, bedi win i siem; aka Were ma jamar kodi siem bino bedo gi win.

¹²Mothere win akor gi leŋo.

¹³Ji pa Were je jodhiro riwin moth.

¹⁴Nema pa Rwoth Yesu Kristo, mar pa Were, kodi riwirok pa Cuny Maleŋ wobedi kodi wijoje.