Read dhopadhola 2 Jokorintho 4 Bible Online

2 Jokorintho 4 - dhopadhola bible

2 Jokorintho 4

¹Am'omiyo, paka Were otieko miyo wan tic me i wor pere, wakibino nyocere.

²Waketho gicen tim manyaliŋliŋ ma kelo wickwot; wakitiy gi twodo, odoko wakiwir wac pa Were. Kucel waluwo adieri i lero, ma nyutho ji je ni wanitie i tiro ruwaŋ Were.

³Aka kada bedi ni Wac Manyen Maber ma wafonjo opanere, kole opanere nyaka ri joma jokidho rwenyo won kende.

⁴Were ma piny me oumo paro pa joma k'oyeyo gi mudho, ŋey womoni jo neno lero ma Wac Manyen Maber ma nyutho dwoŋ pa Kristo m'obedo cal pa Were.

⁵Ato wakifonji kwoŋ wawegi: Wafonjo kwoŋ Kristo Yesu paka Rwoth, aka wabedo jotic riwin ri atoŋa pa Yesu.

⁶Kole Were m'owaco ni, “Lero woliel wok i mudho.” Am'omiyo lero pere liel i cuny wan, ma kelo riwan niaŋ kwoŋ dwoŋ pa Were, ma nenere i waŋ Kristo.

⁷To wan ma wanitie gi ŋaŋo ma cuny me wacale degi ma lowo, ma nyutho nike meni m'oasere me wok bongi Were ayin makiweno bongi wan.

⁸Teko diyo wan i thenge je to kiŋiny wan woko; diceŋ wadhier, to cuny wan kiŋedhere woko;

⁹Icando wan, to k'ojwangi wan; bende ogoy wan piny, to wakirere woko.

¹⁰Hongo je watiŋo tho pa Yesu i delkwoŋ wan, aka ŋey kwo pere bende wonen i delkwoŋ wan.

¹¹I kwo mawan, ndir je wathenere gi tho r'atoŋa pa Yesu, ŋey kwo pere wonenere i delkwoŋ wan ma ki ro tho me.

¹²Me nyutho ni kere tho tiyo i wan; aka kwo ama tiyo rigo i win.

¹³Ndiko waco ni, “Ayeyo, am'omiyo aluwo.” Gi cuny ma yeyo acel no, wabende onyo wayeyo am'omiyo waluwo,

¹⁴rupiri waŋeyo ni Were, m'ocerino Rwoth Yesu i kwo, bende bino cerino wan gi Yesu to kelo wan kanyacel gi win ruwaŋe.

¹⁵Gino je bedo ma bero mewin, ŋey nema pa Were ma tundo ri ji m'omore jowomedi foyo Were gi miyo go dwoŋ.

¹⁶Meno am'omiyo wakilacere; kada meni ma delkwoŋ wan mojere mathin mathin, to kwo ma cuny wan lokere manyen kisi ndelo.

¹⁷Aka teko mathin ma hongo macek me bino kelo riwan dwoŋ m'oasere ma cil gi cil, maloyo teko no bor.

¹⁸Am'omiyo waketho paro mawan, ki kwoŋ gigipiny ma nenere, to kwoŋ gigipiny ma kinenere rupiri gima nenere cowo nyaka hongo macek; to gima kinenere yindira cil gi cil.