Read dhopadhola 2 Jokorintho 6 Bible Online

2 Jokorintho 6 - dhopadhola bible

2 Jokorintho 6

¹Riameno, paka joma tiyo kanyacel gi Were, wakwayo win ni paka witieko jolo nema pa Were, onyo wikiri wiwey wonyekere woko.

²Kole Were waco ni, “Awinjo dwondin i hongo paran ma nyutho wor, aka atieko konyin i ndelo ma both.” Onyo me a hongo ma nwaŋo wor pa Were; me a ndelo ma limo both.

³Wakimiti riwirok ri dhano moro je i royo pere, rupiri meno nyalo miyo wocayi tic mawan.

⁴Kucel, i gimoro je wanyutho ni wabedo jotic pa Were, munyo waciro aŋedha cuny, teko, kodi peko gi diyo cuny madwoŋ.

⁵Otiek goyo wan, tweyo wan, kodi woy gi wan; tic opikere riwan, ruman nindo ngoye, to cemo je ngoye.

⁶Watieko nyutho ni wajotic pa Were gi lonyo, niaŋ, diyo cuny, kodi cuny maber, i Cuny Maleŋ, i mar mawan mar'adieri,

⁷i luwo adieri, kodi i meni pa Were. Wanitie gi tiro paka gilweny mawan, i cingi wan maracuc kodi maracam.

⁸Imiyo wan dwoŋ, odoko ikwoto wiy wan; iyeto wan, aka odoko ipako wan. Itero wan paka jotwodo, ma to waluwo adieri;

⁹paka joma k'oŋeyere, ma to ji je joŋeyo wan; itero wan pa jom'otho, to kere wakwo. Kada candi wan, kineki wan;

¹⁰kada miy wan gut, to ndir je wasangala; wacale pa jocandi, to wamiyo jomathoth ŋaŋo; wacale pa joma jongoye gi gimoro, ma to wanitie gi gimoro je.

¹¹A Jokorintho! Kole watieko luwo kamaler riwin, wathango riwin cuny wan.

¹²Wakipondo riwin; to wiŋati wipondo riwan i cuny win.

¹³Aluwo gi win paŋini winyithindho paran. Nyuthi wan win kiti paro ma wanitie gine riwin. Wibende yaw win cuny win malac paka watimo riwin.

¹⁴Wikiri witiyere kanyacel ma wirom kodi joma jok'oyeyo. Nyalere nedi tiro kodi komo bedo mere? Kosa nyalere nedi lero kodi mudho bedo kanyacel?

¹⁵Nyalere nedi Kristo kodi Jwogi tiyirok? Aŋo ma ŋat'oyeyo Kristo riwo kodi ŋata k'oyeyo?

¹⁶Tiyirok aŋo manitie i dier Ot pa Were kodi cal makicar? Kole wabedo Ot pa Were makwo! Paka Were won owaco ni, “Abino bedo i jo to awotho gi jo. Abino bedo Were pajo, aka jobino bedo ji paran.”

¹⁷Aka Rwoth waco ni, “Am'omiyo eye win bongi jo, aka wipokere gi jo. Wikiri wigeyi gima k'olony, aka nyaka abino jolo win.

¹⁸Abino bedo Bawin, aka wibino bedo wotan gi nyingan. Rwoth Majameni je waco.”