Read dhopadhola 2 Jokorintho 7 Bible Online

2 Jokorintho 7 - dhopadhola bible

2 Jokorintho 7

¹Paka wan gi cikirok me, jowotan m'amaro, walonyi win kwoŋ gimoro je ma koco delkwoŋ wan, kosa cuny wan, aka warangi lokirok maleŋ makicutho, ka walworo Were i kwo mawan.

²Nwaŋ win kabedo riwan i cuny win. Wakitimo raco ri nyatoro, odoko wakinyeko kite pa moro, kosa temo timo gimahembi ri moro.

³Akiwaci gime ma thumo riwin banja; rupiri paka atieko waco, winitie kacuny wan tektek m'omiyo wanitie kanyacel, kada wakwo kosa watho.

⁴Anitie gi geno madwoŋ i win; aka apakere gi win swa! Awinjo gi siem i win. Kada i teko mawan je fodi anitie atia gi kisangala.

⁵Kiri munyo watieko tundo Makedonia je wakiywomere kada, to wanwaŋo candirok kisi kamoro: Koca dhawirok okaro wan, korin lworo opoŋ i cuny wan.

⁶To Were ma dwoko cuny jom'obwok, odwoko cuny wan gi bino pa Tito.

⁷Ki gi bino pere kende, to gi kony ma widwoko gine cunye bende. Go owaco riwan paka wiyenyo swa nenan, paka wirem gi paka wiyikere konyan; gino omedan kisangala tektek.

⁸Aka kada bedi ni balwa paran omiyo win rem, je cunyan kiraman ni andiko. To kad'ameno cunyan oraman ye kwoŋ balwa no munyo aneno ni omiyo win rem nyaka hongo macek won.

⁹To pama asangala, ki rupiri amiyo win rem, to rupiri rem mewin omiyo wiŋuto reco mewin. Kole wibedo gi rem paka Were onwaŋo yenyo, am'omiyo kere wakitimo riwin raco moro.

¹⁰Kole rem ma wok bongi Were kelo ŋuto reco aka tero dhano i both; aka ongoye ramirok kenyo. To rem ma piny ka kelo tho ayin.

¹¹Ere neni win gima rem ma wok bongi Were no otieko timo kwoŋ win; neni paka oloko win joma genere, ma cuny win olony. Neni paka cuny win ramere, bwok, paro, maro Were, aka mito tiro ama wobedi. Kole witieko nyutho ni wingoye gi raco i wac no je.

¹²Am'omiyo, kad'andiko balwa no, atimo ameno ki paka ŋat'otimo marac, kosa ŋat'otim rigo marac. Kucel, andiko ma nyutho win kamaler, ruwaŋ Were, paka wimaro wan tektek.

¹³Me am'omiyo walimo miseni. Wakilimo miseni kende; to iy'adieri wamedo kisangala ro siem ma Tito onyutho kwoŋ kony ma wimiyo go ma dwoko cunye.

¹⁴Kada bedi aŋat'atel kiyuma win rigo, di wiyan k'okwoti be. Paka noknok waluwo riwin gir'adieri, yumirok mawan ri Tito bende onyutho adieri mawan.

¹⁵Aka mar ma go nitie gine riwin medere ameda ka go poyo paka wijoje wiwinjo or, gi paka wijolo go gi lworo gi kirin.

¹⁶Asangala ni anyalo geno win kicutho!