Read dhopadhola 2 Jokorintho 9 Bible Online

2 Jokorintho 9 - dhopadhola bible

2 Jokorintho 9

¹Onwaŋo kiyenyere ni adoko andiki riwin kwoŋ dhiro kony ri ji pa Were i Yuda.

²Aŋeyo nike wiyeyo konyo, aka ayuma win ri ji ma Makedonia k'awaco ni, “Wutmere ma Gris joyikere miyo kony wok denge i oro meca.” Aka ketho kinen mewin oico jomathoth kwoŋ jo bende konyo.

³Onyo eno adhiro jom'oyeyo me, ŋey yumirok mawan gi win i wac me wokiri wotho nono: To paka awaco, wibino yikere ma miyo kony.

⁴Kak'ameno, ka ji ma Makedonia jobin kodan to jonwaŋo ni wikiyikere, wiy wan bino kwot marom nedi; meno kareno wakiluw kwoŋ wickwot mewin; rupiri waasa geno win!

⁵Am'omiyo, aparo nike ripo aori jom'oyeyo me jowotel bino ran bongi win, ŋey wiyikere kicutho nwaŋo mic ma wiciko miyo. Gikenyo bino nwaŋo ni mic no oyiki con ka atundo, aka meno bino nyutho ni wimiyo rupiri wiwegi wiyenyo, makiweno ni orom aroma win timo.

⁶Me a gim'awaco: Ŋata cwoyo kodhi manok bino keco gima nyak manok; ŋata cwoyo kodhi mathoth bende bino keco gima nyak mathoth.

⁷Am'omiyo, dhano je ripo miyo gimoro paka won oridho timo, m'ongoye kiŋunyaŋunya kosa paro ni orom aroma go timo; kole Were omaro ŋata miyo mic pere gi kisangala.

⁸Aka Were nyalo miyo win i ŋono pere, gima kalo ma wiyenyo, ŋey ndir je wibedi gi gimoro je ma wiyenyo, kodi ma winyalo konyo gine tic je mabeyo.

⁹Ato ndiko waco ni, “Go ka miyo jocandi, miyo amiya jo gima bup; ato tiro pere yindira cil gi cil.”

¹⁰Were ma miyo ji kodhi ma cwoyo, kodi cemo acama, bino miyo win kodhi ma wiyenyo to miyo kodhi no dongo, ŋey gima wok i tim mewin mabeyo wonyak kweth.

¹¹Go bino miyo wiŋaŋ i kisi gimoro ŋey winyal bedo jomiyo ndir je, aka jomathoth jobino foyo Were ro mic mewin ma bino luwo gi bongi wan.

¹²Kole tic ma witiyo me kikony candi pa ji maleŋ pa Were kende, to bende miyo ji kweth jofoyo Were.

¹³Aka ro tic mewin m'otieko nyuthere kamaler me, jomathoth jobino miyo Were dwoŋ ro cwirok mewin kwoŋ Wac Manyen Maber mapa Kristo ma wituco ni wiyeyo, kodi ro miyo kony mewin munyo wipoko lim mewin gi jo kodi joman bende.

¹⁴Ameno, jobino kwayo riwin gi maro madwoŋ rupiri Were otieko nyutho win nema madwoŋ.

¹⁵Were wofoy ro mic pere ma welo mere kiwacere!