Read dhopadhola Joefeso 1 Bible Online

Joefeso 1 - dhopadhola bible

Joefeso 1

¹Balwa m'owok bongi Paulo jamoor pa Kristo Yesu gi mito pa Were, ri ji pa Were ma jonitie Efeso, jom'oyeyo Kristo Yesu aka jogenere i kwo pajo.

²Nema gi siem ma wok bongi Were Bawan kodi Rwoth Yesu Kristo wobedi gi win.

³Were wofoy, Ba Rwodhiwan Yesu Kristo, m'omiyo wan silwany gi mic je ma cuny ma wok i polo i Kristo.

⁴Con ma piny fodi k'ocwey, go oyero wan bedo apere i Kristo, ni wabedi maleŋ, m'ongoye apuse ruwaŋ go.

⁵Mar pa Were, omiyo go oridho con ni walokere nyithindho pere i Yesu Kristo. Me obedo foyo pere kodi atoŋa pere.

⁶Meno aka wopak dwoŋ ma nema pere, mic pere riwan, ma go omiyo wan ma nono i Wode ma migos.

⁷Kole remo pa Kristo okelo riwan siem, kodi cwaki mareco mawan, ro nema pa Were m'oasere

⁸ma go okonjo riwan. Gi rieko je kodi niaŋ,

⁹Were otimo gim'onwaŋo otieko cano, to miyo wan ŋeyo can pere manyaliŋliŋ ma go onwaŋo otieko yiko timo i Kristo.

¹⁰Can pa Were ma go bino cowo timo ka ndir otundo, ma kelo cwec je kanyacel, gi gimoro je man polo kodi man piny, kareno Kristo a jatel mere.

¹¹Kole gimoro je timere gi can pa Were kodi paro pere; aka Were oyero wan bende bedo ji pere i can pere ma go oridho wok i cakirok.

¹²Meno aka nyaka wan ma wapen geno Kristo, wanomiy dwoŋ pa Were wopak.

¹³Wibende munyo wiwinjo wac mar'adieri, Wac Manyen Maber m'okelo riwin both, wiyeyo Kristo aka Were oketho ranyuth pere kwoŋ win, munyo miyo win Cuny Maleŋ ma go won oyido otieko ciko win.

¹⁴Cuny Maleŋ obedo ma ridho ni wabino limo gima Were otieko ciko wan, cuka ji pere jolimi both, ŋey dwoŋ pere wofoy.

¹⁵Am'omiyo cuka awinji kwoŋ yeyo mewin i Rwoth Yesu kodi paka wimaro ji pa Were je,

¹⁶akikeŋ ketho Were walwa riwin gi poyo win i kwayo paran,

¹⁷aka akwayo Were pa Rwodhiwan Yesu Kristo, Bawan man gi dwoŋ, ni womiy win Cuny Maleŋ, ma bino loko win mariek to nyutho win Were, nike wiŋeyi go maber.

¹⁸Odoko akwayo nike paro ma cuny win woyawere ma neno lero pa Were, to wiŋeyo geno ma go olwoŋ'iye win, kodi silwany madwoŋ ma go ociko ji pere,

¹⁹kendo paka meni pere madwoŋ m'oasere tiyo riwan ma wayeyo. Meni no dwoŋ tektek,

²⁰aka ama go ooro ma cerino Kristo kwoŋ jom'otho, to miyo go bedo yu cinge maracuc i polo.

²¹Yesu Kristo dhumo jodhum je, jodongo, jomeni, rwodhe; aka nyinge loyo nyingi jo je m'inyalo miyo pama kodi i ndir ma bino je.

²² Were oketho gimoro je i par tiendi go to miyo go bedo jatel ma gimoro je i kitipa pa jom'oyeyo,

²³m'obedo delkwoŋ Kristo, aka ago won gikululu ma poŋo kisi gimoro iye je.