Read dhopadhola Joefeso 3 Bible Online

Joefeso 3 - dhopadhola bible

Joefeso 3

¹Am'omiyo an, Paulo jatwec pa Kristo Yesu ka mewin, win Jopath,

²kono witieko winjo paka Were gi nema pere omiyan timo tic riwin:

³Were owodho nyaliŋliŋ pere, to nyuthan gim'atieko ndiko i ceko kwoŋe.

⁴Ka wisoma gim'andiko, wibino ŋeyo paka aniaŋ kwoŋ nyaliŋliŋ pa Kristo,

⁵ma i hongo m'okadho k'onyuthi ji, to pama Were onyo owodho gi Cuny Maleŋ ri jomoor kodi jotuci wac pere.

⁶Nyaliŋliŋ no a me: I Wac Manyen Maber, Jopath bende onyo jolunjo ŋaŋo pa Were kanyacel gi Joisiraili, paka adec ma del acel, aka bende onyo ofudi rijo gima Were ociko i Yesu Kristo.

⁷Abedo jafonji Wac Manyen Maber me ro nema pa Were m'omiyan kareno meni pere tiyo i an.

⁸Kad'oyido aŋat'aasa thin kwoŋ jomaleŋ je, omiyan nema me ma tito ri Jopath Wac Manyen Maber kwoŋ ŋaŋo pa Kristo ma bu gike.

⁹Kendo anyuthi ji paka can pa Were manyaliŋliŋ m'oyido opanere wok con i paro pa Were m'ocweyo gimoro je, ripo aketha i tim.

¹⁰Nike i ndir ma pama, luwo kwoŋ kitipa pa jom'oyeyo, Were wonyuthi jodhum, kodi jomeni ma cuny ma wi hongo malo rieko pere gi thenethene mere m'omore.

¹¹Were otimo ama i can pere ma bu gike, ma go oketho i tim kwoŋ gima Wode Yesu Kristo Rwodhiwan otimo.

¹²I go, kendo gi yeyo mawan i go, wanitie gi thwolo ma donjo bongi Were gi siem ma cuny wan odile.

¹³Am'omiyo, akwayo win ni wikiri wirembi, rupiri candirok paran riwin bino kelo riwin dwoŋ.

¹⁴Riameno, aguro congan i nyim Baba,

¹⁵ma pecin je man polo kodi i piny jonwaŋ nyingi jo kwoŋe.

¹⁶Akwayo Were ni cungo kwoŋ dwoŋ pere m'oasere, womiy win meni i cuny win, gi meni pa Cuny Maleŋ pere.

¹⁷Odoko ni Kristo wolimi kabedo i cuny win ro yeyo mewin, aka kwo mewin wocungi m'oridhere i mar,

¹⁸ŋey win kodi jomaleŋ je winyal niaŋ kwoŋ laco, gi boro, gi ŋawirok kodi thutho ma mar pa Kristo.

¹⁹Aka wiŋey ni mar no loyo rieko je, aka Were wopoŋ mic pere gibe i cuny win.

²⁰Onyo ŋata nigi meni ma tiyo i wan nyalo timo gim'oasere ma kalo ma wakwayo kosa waparo.

²¹Weyi dwoŋ wobedi rigo, i kitipa pa jom'oyeyo go, kodi i Kristo Yesu, ri luse je cil gi cil. Ameno.