Read dhopadhola Joefeso 4 Bible Online

Joefeso 4 - dhopadhola bible

Joefeso 4

¹Am'omiyo, an m'otweyan ro wac pa Yesu Kristo, akwayo win ni kwo mewin wobedi ma ripo gi lwoŋo mewin.

²Bedi win mamwol, ma wimako gigipiny moth, gi diyo cuny, ma wikijoki gi jowoti win, kodi nyutho marok.

³Tem win paka winyalo, kuro siem ma riwo win kanyacel i Cuny Maleŋ.

⁴Del nitie acel, paka geno obedo acel ma Were olwoŋ'iye wijoje.

⁵Aka Rwoth nitie acel, yeyo bende acel, batisimo bende acel;

⁶Were nitie acel, m'obedo Ba ji je, kodi Rwoth pa ji je, aka tiyo i ji je, odoko nitie i ji je.

⁷To omiy kisi dhano kwoŋ wan nema marom gi mic pa Kristo.

⁸Am'omiyo owaci i ndiko ni, “Munyo go oidho malo, okadho kodi ji mathoth m'onwaŋo otwey; aka opoko ji mic.”

⁹Onyo, Oidho malo, dwoŋ mere aŋo? Dwoŋ mere ni go okutho oloro piny i pendi lowo.

¹⁰Am'omiyo, ŋat'oloro piny a ŋata bende odoko oidho malo kalo pondeponde ŋey go woswana gimoro je i polo gi piny.

¹¹Go am'omiyo ji mic; go oloko jomegi jomoor, joman jotuci wac Were, joman jotiti Wac Manyen Maber, joman oketho bedo jokwath kodi jofonji.

¹²Otimo ama ma yiko ji pa Were je ri tic manyakristo, ma gero delkwoŋ Kristo.

¹³Ameno aka wajoje wabino bedo i acel i yeyo mawan kodi i ŋeyo Wod Were, to wategino i cuny, ma waripo gi kwo pa Kristo m'opoŋ.

¹⁴Wakiripi odoko bedo pa nyithindho, ma fonji moro je kwadho jo korin gi koca pa koyo, kareno jomoro jowondo wan gi riekorieko moro kodi twodo.

¹⁵Kucel ka waluwo g'adieri munyo wanyutho mar, wabino dongo i royo je i Kristo, m'obedo wic kitipa pa jom'oyeyo.

¹⁶I can pere, adec m'opokere ma del gipi joriwere kanyacel gi fuc ma riwo jo. Am'omiyo ka kisi adec tiyo paka mitere aka del gipi dongo i mar.

¹⁷Am'omiyo, i nyingi Rwoth awaco riwin gime, odoko amedo ridho: Kwo mewin odoko kiripi bedo paka apa joma bu Were, ma paro pajo ongoye kony.

¹⁸Cuny jo nitie i mudho, aka jonitie bor gi kwo pa Were ro miŋo pajo; ato wiy gin tek swa.

¹⁹Paro ma cuny jo otieko thore woko; kwo pajo nitie i kite mareco kende, aka jotimo gikoc g'awanya madit, m'ongoye wickwot.

²⁰Meno k'agima wifonjere kwoŋ Kristo!

²¹Ipoyo kosa wikiwinjo adieri manitie i Yesu maber odoco.

²²Kole ofonji win ni wiboli woko kiti win macon, ma awanya mareco oyido nyeko.

²³Paro mewin kodi cuny win ripo lokirok manyen,

²⁴aka nyaka wiruki kwo manyen, m'ocwey i cal pa Were, i tiro kodi leŋo.

²⁵Riameno, twodo onyo wongoye wok pama. Dhano je ripo luwo ri nyawote gir'adieri, rupiri wajoje wabedo adec m'oriw kanyacel.

²⁶Ka wimako nge, gino wokiri worwaki win i gimarac; aka wikiri wibedi gi nge ndelo gipi,

²⁷odoko wikiri wimiy Jwogi thwolo.

²⁸Ŋata yado kwalo wowey kwo, kucel wocaki tic, wotim tic mabeyo gi cinge wonyali kiri konyo jocandi.

²⁹Weyi win luwo wac ma ramo cuny jo, to luw win wac mabeyo kendo kodi ma konyo joman, kende ma ripo i hongo m'oluw'iye no, ŋey wac mewin wonyali kelo nema ri joma winjo.

³⁰Wikiri wimiy Cuny Maleŋ gut, rupiri go obedo ranyuth ma Were oketho kwoŋ win ri ndelo ma both.

³¹Kwany win woko duro, gi keme, kodi nge, gi dhaw kodi nyeko nyingi wadi win.

³²Bedi win mere ma wimako wor gi jowoti win aka wicwakere i yoto, paka Were ocwako win i Kristo.