Read dhopadhola Joefeso 5 Bible Online

Joefeso 5 - dhopadhola bible

Joefeso 5

¹Paka wibedo nyithindho pa Were ma kacunye, wiripo temo cale go.

²Wiripo bedo gi mar paka Kristo omaro wan to miyo kwo pere ro wan paka cowirok maŋwe kur ri Were.

³Paka ji maleŋ pa Were, kiripi ni wac ma kidakana, kosa koc, kosa woro wowaci kwoŋ win.

⁴Kendo kiripi ni wac ma wiluwo wobedi ma kwoto wiy jo, ma miŋo, kosa kiliesa makoc. Kucel wiripo bedo munyo wifoyo Were ayino.

⁵Ŋey win gime ni: Ongoye moro je ma jacot, makoc, kosa ma wor (kole woro cale pa lamo gima k'obedo Were) m'olim gimoro i Ker pa Kristo kodi apa Were.

⁶Wikiri wiyey moro wowondi win gi wac m'ongoye kony, rupiri gigipiny me je ama bino miyo Were kigaga gi ji ma jokiwinji go.

⁷Am'omiyo wikiri wimakere gi kiti ji ma cale ameno.

⁸Kole con oyido wibedo jomudho, to pama onyo wilokere joparo i Rwoth. Riameno woth win paka nyithindho ma lero.

⁹Kole gima kelo lero obedo gigipiny mabeyo, m'otire kodi mar'adieri.

¹⁰Tem win fonjirok gima sangala Rwoth.

¹¹Wikiri widonji i tim ma colo ma kikony, kucel wodhi win gigipiny no kamaler.

¹²(Temo luwo kwoŋ gigipiny ma jotimo nyaliŋliŋ kelo kiri wickwot).

¹³Aka gim'owodhi t'ithango kamaler nyaka bino nenere maber;

¹⁴ato gimoro je m'othangi kamaler lokere lero. Am'omiyo nitie wac ma waco ni, “Cew, in janindo me, aka ay ieye woko kwoŋ jom'otho, aka Kristo bino liel kwoŋin.”

¹⁵Am'omiyo kure win i kwo mewin. Wikiri wibedi pa jomamiŋ, to bedi win pa jomariek.

¹⁶Wikiri winyeki hongo ma winitie gine, rupiri me ndir mareco oaser'iye.

¹⁷Wikiri wibedi ma miŋmiŋ, to niaŋ win gima Were mito.

¹⁸Wikiri wimer gi medho rupiri meno mienirok, to poŋ win gi Cuny Maleŋ ayin.

¹⁹Wer win wer ma Zabuli kodi wer man je ma cuny. Wer win gi dwondi win mamit ri Rwoth munyo wipako go i cuny win.

²⁰Aka foy win Were noknok ri gimoro je, i nyingi Rwodhiwan Yesu Kristo.

²¹Winjere win paka wiwinjo Kristo.

²²Mon jowowinji cwogi jo paka jowinjo Rwoth won.

²³Kole jacwo obedo jatel pa dhako paka Kristo obedo jatel pa kitipa pa jom'oyeyo Were, ma jobedo delkwoŋe, aka go won a jaboth pajo.

²⁴To paka kitipa pa jom'oyeyo winjo Kristo, ameno mon bende jowowinji cwogi jo i gimoro je.

²⁵Cwo, mari win mon mewin paka Kristo omaro kitipa pa jom'oyeyo to miyere rigo,

²⁶nike woloki go maleŋ kareno lonyo go gi pi kodi wac ma kwo,

²⁷ŋey wokel kitipa no bonge m'otieko lony ma bu cilo, kosa m'ongoye kam'ojony kendo m'ongoye kwoŋe sandi moro je.

²⁸Ameno cwo bende joripo maro mon pajo paka delkwoŋ gin won. Ŋat'omaro cege meno won omare.

²⁹(Ongoye moro ma ruman dak delkwoŋe won, kucel pidho aka kuro maber, paka Kristo timo ri kitipa pa jom'oyeyo,

³⁰rupiri wabedo adec ma delkwoŋe.)

³¹Am'omiyo jacwo weyo bamere gi yokimere to cwire kwoŋ cege to jario no jolokere del acel.

³²Me obedo wac m'opondo madwoŋ swa, aka me onyo ageda k'akidho kwoŋ Kristo kodi kitipa pa jom'oyeyo go.

³³Riameno jacwo je ripo maro cege paka won omare, aka dhako bende ripo miyo cwore dwoŋ.