Read dhopadhola Joefeso 6 Bible Online

Joefeso 6 - dhopadhola bible

Joefeso 6

¹Nyithindho, winji win jonywol mewin i Rwoth, rupiri obedo gim'otire timo ameno.

² Lwor benin gi yokin, obedo or m'otel medo gi cikirok i iye ni,

³Aka nyaka gimoro je bino bedo rin maber, t'iyindira i piny.

⁴Jonywol, wikiri wikuri nyithindho mewin i yo ma miyo jo nge. Kucel, fonji win jo jowodongi i tim mabeyo kodi i fonji pa Rwoth.

⁵Ŋecin, winji win rwodhe mewin ma piny ka, gi lworo kodi kirin; aka witim tic gi cuny win acel, paŋini witimo ri Kristo won gipi.

⁶Winji win jo, ki nyaka ni jowofoy win ka joneno win, to tiyi win paka jotic pa Kristo, ma jotimo gima Were yenyo.

⁷Tim win tic mewin gi kisangala, paŋini witiyo ri Rwoth, makiweno ri ji.

⁸Poyi win ni Rwoth bino miyo dhano je kemba, kada bedi ŋeca kosa ŋata ni siem, ro tic pere maber ma go otimo.

⁹Onyo rwodhe, wibende kuri win ŋecin mewin ameno. Weyi win bwoko jo paka wiŋeyo ni win kodi ŋecin mewin je wibedo apa Rwoth acel i polo, ma thumo banja ri dhano je m'ongoye yero.

¹⁰Macowe, bedi win ma wicwiny i Rwoth, kanyacel gi i meni pere m'oasere.

¹¹Ruki win gilweny je ma Were poko, aka nyaka winonyali cungo matek gi ciro bwo pa jwogi.

¹²Ato wakilweny gi ji wadi wan, to gi jodhum moro, gi rwodhe moro, kodi jomeni ma colo ma piny me, kodi jodhum mareco ma cuny, ma wi hongo malo.

¹³Am'omiyo ruki win gilweny pa Were gipi, ŋey ka ndelo ma raco otundi, wibino nyalo ciro lweny pa jakwor, aka ka witieko lwenyo kiri i gike, bino nwaŋo ni fodi witek.

¹⁴Am'omiyo cungi win matek, aka adieri ama wobedi del m'othoko pier win, tiro ama wiruki paka kwot ma nyweny i dakoriwin,

¹⁵aka yikirok ma tito Wac Manyen Maber ma kelo siem wobedi war ma tiendi win.

¹⁶Medo kwoŋ gigipiny no je, tiŋi win yeyo paka kwot mewin; meno ama wibino geŋo gi kweyo gine asere maliel mac ma Ŋatarac obay.

¹⁷Kethi win both paka junga ma gwoko wiy win, aka wac pa Were paka abor ma Cuny Maleŋ miyo win.

¹⁸Aka bedi win i kwayo, munyo wikwayo kony pa Were i royo m'omore hongo je, paka Cuny nyutho win. Am'omiyo bedi win milengela aka wikiri wilacere ndir je, to kway win ri ji pa Were.

¹⁹Kway win ran bende ni Were womiyan mikwenda ka ayikere luwo, ŋey aluwi gi miseni k'amiyo ji ŋeyo nyaliŋliŋ ma Wac Manyen Maber.

²⁰Kole abedo jamikwenda ma Wac Manyen Maber kada pama anitie i twec. Kway win ni abedi gi miseni ma luwo wac no paka ripo atimi.

²¹ Tikiko, omin wan ma jatic ma genere i tic pa Rwoth, bino kiliesa riwin kisi gimoro, to wiŋeyo paka anitie, kodi gim'atimo.

²²Am'omiyo adhiro go bongi win, wiŋey paka wanitie, aka wokwey cuny win.

²³Were Baba kodi Rwoth Yesu Kristo, womiy jom'oyeyo je siem gi mar, medo wi yeyo.

²⁴Weyi nema pa Were wobedi gi jono je ma jomaro Rwoth Yesu Kristo gi mar makirum.