Read dhopadhola Jofilipi 1 Bible Online

Jofilipi 1 - dhopadhola bible

Jofilipi 1

¹Balwa m'owok bongi Paulo kodi Timothe, jotic pa Kristo Yesu. Ri ji maleŋ pa Were je ma jobedo Filipi ma joyeyo Kristo Yesu, kanyacel kodi jotel ma kitipa pa jom'oyeyo kodi jokony.

²Weyi Were Bawan kodi Yesu Kristo womiy win nema gi siem.

³Afoyo Were paran ri wijoje ndir je ka aparo kwoŋ win;

⁴aka noknok ka akwayo riwin, akwayo gi kisangala,

⁵rupiri wikonyan gi tic ri Wac Manyen Maber wok i ndelo marapena tundo konon.

⁶Am'omiyo aŋeyo gime nike: Were m'ocako tic maber i win, bino medere gine cuka orum i Ndelo pa Kristo Yesu.

⁷Obedo gimaber ran paro ama kwoŋ win rupiri winitie i cunyan. Odoko, wiriwere kodan i nema ma Were omiyan me, ma bedo i twec kodi ma gwoko gi ridho Wac Manyen Maber.

⁸Were oŋeyo nike aluwo adieri k'awaco ni aparo kwoŋ win gi paro pa Yesu Kristo won.

⁹Aka me a kwayo paran riwin: Nike mar mewin womedere dongo noknok, i ŋeyo gimoro gi niaŋ maber i wac,

¹⁰aka nyaka wibino nyalo yero gim'oasa bero. Meno aka wibino bedo ma bu cilo moro je kodi apuse i ndelo pa Kristo.

¹¹Kwo mewin bino nyak olemo ma kite mabeyo, ma Yesu Kristo won ama kelo, to miyo Were dwoŋ kodi pak.

¹²Amito wiŋey, wutmera, nike gigipiny m'otimere ran otieko konyo swa nyayo Wac Manyen Maber.

¹³Gim'owok'iye, jokur je ma cel pa kere kodi joman je jonyalo ŋeyo nike anitie i twec ka ro tic pa Kristo.

¹⁴Aka bedo paran i twec otieko miyo wutmere i Rwoth maloyo thoth miseni ma medo tito wac pa Were gi derino m'ongoye lworo.

¹⁵Iy'adieri jomoro kwoŋ jo jofonjo wac pa Kristo gi nyeko kodi dhawirok, to joman jofonjo gi paro maber.

¹⁶Joman me jotimo ameno i mar, rupiri joŋeyo ni okethan ka ma wodho kony ri Wac Manyen Maber.

¹⁷To jonica jofonjo kwoŋ Kristo gi woro makiweno g'adieri, aka wegi jomito tiŋirok malo ayin; joparo nike jonyalo kisigila ran teko man ma fodi anitie i twec.

¹⁸To kiwaci moro, asangala ayino, rupiri ji jofonjo kwoŋ Kristo i royo je ma nyalere, kada bedi g'atoŋa kuya m'okom kosa m'otire. Aka abino medo kisangala,

¹⁹rupiri aŋeyo ni ro kwayo mewin kodi kony ma wok bongi Cuny Maleŋ pa Yesu Kristo, ibino gonyan wok i twec.

²⁰Kole anitie g'awanya madwoŋ kodi geno nike wiyan k'okwoti i tic paran, to ni hongo je, makada pama won, abino bedo gi miseni madwoŋ ma kelo dwoŋ ri Kristo i del paran, kad'akwo kosa atho.

²¹Aka ri an, bedo gi kwo meno doŋ i Kristo, aka tho meno nwaŋo lim.

²²To ka amedere gi kwo i del, meno abino medo timo tic maber man; onyo akuya gima ripo ni ayer.

²³Atudere i dier paro ario: Ayenyo swa weyo kwo me akidhi abedi gi Kristo, m'obedo gimaber loyo;

²⁴to maloyo, ri bero mewin, a an doŋ makwo.

²⁵Aŋeyo gime adieri, am'omiyo aridho ni abino doŋ. Abino bedo gi wijoje ma medo konyo win widongi kodi kisangala i yeyo.

²⁶Am'omiyo ka anobedi gi win kendo, wibino bedo gi kisangala madwoŋ, i kwo mewin i Yesu Kristo.

²⁷Kad'obedi nedi, bedi win gi kite ma ripo gi Wac Manyen Maber pa Kristo, ŋey kada k'anobin neno win, kosa k'awinjo awinja ayino kwoŋ win, obedi ni wicungo matek kodi atoŋa acel, aka wilwenyo kanyacel, gi paro acel kende ri yeyo ma Wac Manyen Maber kelo.

²⁸Wikiri wibedi malwor ri jokwor mewin, to ndelo je bedi win miseni, rupiri meno bino nyutho jo ni jorwenyo, to win wiboth, aka meno je gima Were ama timo.

²⁹Kole go otieko miyo win silwany, ki nyaka ma yeyo Kristo kende, to ma candirok rigo bende.

³⁰Ato lweny m'onyo winigine no a kiti lweny ma winenan munyo alwenyo i ndir m'okadho aka wiwinjo ni fodi an gine.