Read dhopadhola Jofilipi 3 Bible Online

Jofilipi 3 - dhopadhola bible

Jofilipi 3

¹Aka macowe, wutmera, bedi win gi kisangala i Rwoth. Gik i gim'atieko ndiko con kijokan, aka meno medo gwoko win i yeyo.

²Gwokere win kwoŋ jotimi reco, gwokere no, ma jocwire kwoŋ thumirok ma del.

³Kole wan ayino ama watieko limo thumirok mar'adieri, wan ma walamo Were gi meni pa Cuny Maleŋ, aka wayumere i Kristo Yesu. Odoko wakikethi geno moro kwoŋ thumirok ma del,

⁴kad'awon onwaŋo d'anyal bedo g'atoŋa ma ketho geno paran i gigipiny ma pameno. Ka moro nitie g'atoŋa ma yumirok i del, anigine maloyo:

⁵Alimo thumirok i ndelo mar'aboro wok nywolirok paran, abedo Jaisiraili, janono pa Benyamin, nyakwar Joebulaniya ma k'osunga. Aka i wac ma kuro Cik ma, onwaŋo abedo Jafarisayo gipi.

⁶ Iketho kinen manyadini, alwenyo gi kweth pa jokristo. Ibedo m'otire gi winjo Cik, onwaŋo angoye gi reco.

⁷To gimoro je ma d'akwan pa lim, onyo atero paka gim'ongoye kony ro yeyo Kristo.

⁸Ki meno kende, akwano gimoro je paka podho madwoŋ, rupiri gima diwelo m'oasere a ŋeyo Kristo Yesu Rwoth paran. Ro wac pere atieko bolo woko gimoro je; atero je paka woyo, ŋey alimi Kristo,

⁹ŋey abedi i go. Aka adoko akibedi gi tiro paran won, i royo ma kuro Cik, to pama anitie gi tiro ma wok bongi Were, aka ma cungo kwoŋ yeyo Kristo.

¹⁰Gim'ayenyo kende a ŋeyo Kristo, gi meni ma cerino pere, kodi riwirok gi go i candirok pere, gi bedo paka go i tho pere,

¹¹munyo ageno ni abende abino cerino kwoŋ jom'otho.

¹²Akiwaci nike atieko nwaŋo gime, kosa ni atieko lokirok maleŋ. Fodi amedere gi tekirok cuka Anonwaŋ gim'omiyo Kristo Yesu olokan apere.

¹³Ato, wutmera, akipar nike adieri oyido atieko tundo kanyago; gimoro acel m'atimo, a weyo wiyan wowili gi gim'otieko kadho yucen, gi temo paka anyalo tundo bothi gima ni yuwiyan.

¹⁴Am'omiyo aringo m'adiyo cunyan, kareno acomere kodi gike, ŋey alimi kemba ma Were olwoŋan rigo, i polo malo i Kristo Yesu.

¹⁵Wajoje ma wategino i cuny waripo bedo gi paro acel no. To k'ipoyo roman winigi paro m'opokere, Were bino menyo riwin gino maber.

¹⁶To kad'ameno, weyi wakidhi yumalo gi kite ma watieko luwo kiri konon.

¹⁷Wutmera, wijoje tim win paka atimo. Watieko miyo win ranen maber. Am'omiyo kaŋasa win joma luwo ranen no.

¹⁸Ato paka atieko waco riwin gime con dikweth, onyo pama adoko awaco gi pigi waŋan: Nitie ji mathoth ma kwo pajo loko jo jokwor gi musalaba pa Kristo.

¹⁹Jokidho rerok i mac makitho, rupiri Were pajo obedo awanya ma delkwoŋ gin, aka jopakere kodi gima wiy jo di kwoti gine ayin. Joketho paro pajo kwoŋ gigipiny ma piny ka kende.

²⁰To wan, wabedo ji ma polo, aka wakuro dwoko pa Jaboth wok i polo, aka manago Rwoth Yesu Kristo.

²¹Go bino wiro delkwoŋ wan manyap ma tho me, to loko ma cale gi delkwoŋe won ma didwoŋ, kareno oro meni ma go nyalo kelo gine gigipiny je i dhum pere.