Read dhopadhola Jokolosia 1 Bible Online

Jokolosia 1 - dhopadhola bible

Jokolosia 1

¹Balwa m'owok bongi Paulo, ma gi mito pa Were obedo jamoor pa Kristo Yesu, jokodi omin wan Timothe.

²Ri ji maleŋ ma Kolosia, ma jobedo wutmin wan ma jogenere i Kristo. Were Bawan womiy win nema gi siem.

³Noknok wafoyo Were, Ba Rwodhiwan Yesu Kristo, ka wakwayo riwin,

⁴rupiri watieko winjo yeyo mewin i Kristo Yesu, kodi mar mewin ri ji pa Were je.

⁵Yeyo kodi mar no owok i geno gim'okan riwin i polo ma witieko winjo kwoŋe i wac mar'adieri, aka Wac Manyen Maber.

⁶Wac Manyen Maber me otieko bino riwin, aka nyay ka medere i piny je, paka onyay i dier win wok i ndelo ma wipen winj'iye kwoŋ nema pa Were to wiŋeyo adieri mere je.

⁷Wifonjere gime bongi Epafra, jatic kodi wan ma wamaro swa, aka obedo jatic ma genere ri Kristo kamawan.

⁸Go bende owaco riwan kwoŋ mar mewin ma Cuny omiyo win.

⁹Riameno, fodi wakikeŋ kwayo riwin, wok cuka wawinji kwoŋ win. Wakwayo Were wopoŋ win gi rieko ma ŋeyo gima go yenyo, gi rieko je kodi niaŋ ma Cuny miyo.

¹⁰Wakwayo ameno ŋey kwo mewin wobedi paka Rwoth mito, to witimo gima sangala go hongo je. Kwo mewin bino nyak kiti tic mabeyo je, aka wibino medere gi ŋeyo Were.

¹¹Weyi Were woloki win jom'otegino gi meni ma wok i dwoŋ pere m'oasere, ŋey winyal ciro gimoro je gi diyo cuny kodi kisangala.

¹²Aka foy win Bawan, m'omiyo winyalo limo ye gima Were okano ri ji pere i lero.

¹³Kole go otieko botho wan kwoŋ meni ma mudho to kelo wan i Ker pa Wode ma migos m'omaro,

¹⁴ma walimo both i go, t'icwako reco mawan.

¹⁵Kristo obedo cal pa Were ma kinenere. Go obedo Wode makayo, aka loyo gimoro je m'ocwey gi dwoŋ.

¹⁶Kole luwo kwoŋ go Were ocweyo gimoro je i polo kodi i piny gi gigipiny ma nenere kodi ma kinenere, kada kom ma dhum, kosa meni, kosa jodhum, kosa rwodhe. Were ocweyo gimoro je luwo kwoŋ go kendo rigo.

¹⁷Go obedo mafodi gigipiny je, aka cungo kwoŋ go gigipiny je jonitie i kabedo pajo.

¹⁸Go a jatel pa delkwoŋe, m'obedo kitipa pa jom'oyeyo je, go a cakirok, okayo m'open cerino kwoŋ jom'otho, ŋey go wolimi kabedo marapena i gigipiny je.

¹⁹Kole Were won ama omito ni go wobedi gi kwo pa Were gipi.

²⁰Am'omiyo, kwoŋ Wode, Were otieko dwoko cwec je bonge, manitie i polo kodi i piny je, munyo kelo siem gi remo pa Wode m'ocwer wi musalaba.

²¹Aka yado onwaŋo winitie bor gi Were, kareno wibedo jokwor pere i paro mewin kodi i gigipiny mareco m'oyido witimo.

²²To pama, kwoŋ tho ma delkwoŋ Wode, Were onyo odwoko win i tiyirok gine, ŋey go wokel win ruwaŋe, ma wileŋ ma bu raco.

²³Ato wiripo medirok gi yeyo mewin, ma wiridhere aka wicwiny, ma wikiyengere i geno ma wilimo munyo wiwinjo Wac Manyen Maber. Me a wac ma wiwinjo aka otiek fonjo dhano je i piny, ma an Paulo, alokere jatic mere.

²⁴Pama onyo asangala gi candirok paran riwin, aka candirok paran i del konyan gi cowo gima fodi odoŋ i candirok pa Kristo ri delkwoŋe, m'obedo kitipa pa jom'oyeyo.

²⁵Olokan jatic ri kitipa no munyo Were omiyan tic ma kelo riwin Wac pere gibe.

²⁶Me nyaliŋliŋ ma go onwaŋo fodi opano ri dhano je i hongo je m'okadho, t'onyo pama owodho kamaler ri ji pere maleŋ.

²⁷Kole Were oyiko wodho nyaliŋliŋ pere ri Jopath, jowoŋey ŋaŋo madwoŋ manitie i iye, aka manago Kristo manitie i win, ma miyo wigeno limo dwoŋ pa Were.

²⁸Am'omiyo wafonjo ji je kwoŋ Kristo, ka wanyutho jo royo ma gwokirok gi rieko ma nger je, ŋey wakel dhano je ruwaŋ Were m'otieko tegino i Kristo.

²⁹Am'omiyo atiyo tektek munyo aoro meni m'oasere ma Kristo poko, ma tiyo i an.