Read dhopadhola Jokolosia 2 Bible Online

Jokolosia 2 - dhopadhola bible

Jokolosia 2

¹Amito wiŋey paka atiyo matek riwin, kodi ri ji ma Lawodisia, kodi ri ji je mafodi jok'onenan.

²Atimo ameno ŋey miseni wopoŋ i cuny jo aka ŋey jowobedi kanyacel i mar to jolimo silwany ma niaŋ wac kicutho. Meno aka jobino ŋeyo nyaliŋliŋ pa Were, m'obedo Kristo won gipi.

³I go, okan'iye rieko mathoth kodi niaŋ kwoŋ wac.

⁴Awaco riwin ameno ŋey wikiri wiyey moro womiŋi win gi wac mathoth ma twodo, kada cale pa ber.

⁵Kole kad'angoye i del, je fodi anitie gi win i cuny, aka asangala ka aneno miseni mewin kodi yeyo ma wiridho i Kristo.

⁶Paka witieko jolo Kristo Yesu paka Rwoth, doŋ win i go i kwo mewin.

⁷Pidhi win tiendi win i go, aka go wobedi misingi ma kwo mewin. Ridhi win yeyo mewin paka ofonji win, munyo hongo je wifoyo Were.

⁸Am'omiyo, neni win ni moro wokiri wokethi win i bwo pajo gi piem kodi twodo masisiri, gi thenethene ma kula manyanono, gi wac kwoŋ cuny ma jodhumo i polo gi piny, aka kiwoki bongi Kristo.

⁹Kole kwo pa Were gipi nitie kwoŋ Kristo, i kwo manyadel;

¹⁰aka wilimo kwo m'opoŋ i riwirok gi go. Go a jadhum ma telo jodhum je kodi meni je.

¹¹Kole bende withumere i riwirok gi Kristo, to thumirok me k'obedo ma ji ama jotimo, to thumirok manyacuny, m'obedo eye woko i meni pa del ma gimarac, gi donjo i thumirok pa Kristo.

¹²Kole munyo wilimo batisimo, meno kareno oyiki win gi Kristo, aka bende wicerino gi go ro yeyo mewin i meni pa Were ma tic, m'ocerino go kwoŋ jom'otho.

¹³Kad'obedo ni con oyido witho i cuny win ro reco mewin, odoko rupiri oyido wibedo Jopath, ma jokithumere, to Were ocwako riwin reco mewin je, munyo omiyo wan kwo kanyacel gi Kristo.

¹⁴Were oreyo woko gim'onwaŋo ondiki kwoŋ wan marac, gi cik mere m'oyido yenyo kwoŋ wan gigipiny kweth, to kwanyo woko kicutho munyo oguro gino kwoŋ musalaba.

¹⁵Aka Kristo omayo woko jodhum gi rwodhe ma cuny meni, to loko jo ginyero pa ji munyo tero jo paka jom'omak i lweny.

¹⁶Am'omiyo, wikiri wiyeyi moro wokethi riwin cik kwoŋ gima wicamo, kosa wimadho, kosa gima mako kwoŋ kalima manyadini, kosa kalima ma dwe manyen, kosa ndelo ma Sabato.

¹⁷Gigipiny no je obedo nyaka tipo pa gigipiny m'oyido labino; to gim'obedo mar'adieri won nwaŋere i Kristo.

¹⁸Wikiri wiyeyi moro womayi win kemba mewin munyo ŋoyo ni loyo win gi dwoŋ ro lek ma go nwaŋo, kareno nyutho bwonirok ma rendirok aka lamo jomalaika. Dhano ma pameno pakirok ama opoŋ kwoŋe, aka paro pere obedo ma nyadhano.

¹⁹Go otieko weyo cwirok kwoŋ Kristo, m'obedo jatel mawan, ma kwoŋ go ama del pere gipi, ma fuce oriwo kanyacel to makere, nwaŋ'iye meni madongo paka Were mito ni wodongi.

²⁰K'inen onyo witieko tho gi Kristo aka okethi win i siem munyo wieye woko kwoŋ cuny ma dhumo polo gi piny, raŋo ma fodi kwo mewin bedo paka apa ji ma piny me? Raŋo ma wikuro cik masisiri paka ni,

²¹“Wikiri wimaki gime, wikiri wibili ginica, wikiri wigeyi meca?”

²²Kole gigipiny me je bedo gim'ongoye kony tekin or jo. Jobedo nyaka cik ma dhano am'otimo aka ofonjo.

²³Ato kiti cik no nenere pa girieko i lamo jomalaika m'otiek cuko gine jo, kodi bwonirok ma rendirok, gi cando delkwoŋ gin; to iy'adieri jongoye kodi kony i dhumo awanya ma del.