Read dhopadhola Jokolosia 4 Bible Online

Jokolosia 4 - dhopadhola bible

Jokolosia 4

¹Rwodhe, bedi win ma witire i kite ma wikuro gine ŋecin mewin. Poyi win nike wibende winigi Rwoth mewin i polo.

²Bedi win jokinen i kwayo, munyo winitie milengela ka wikwayo gi foyo Were.

³Aka kway win bende riwan ni Were woyawi riwan royo ma fonjo mikwenda pere, ŋey watiti nyaliŋliŋ pa Kristo. Kole meno am'omiyo pama anitie i twec.

⁴Riameno kway win nike anyal luwo munyo aketho gigipiny i lero paka ripo atimi.

⁵Bedi win mariek i kite ma witero gine joma fodi jok'oyeyo, munyo wioro hongo ma winigine maber.

⁶Kiliesa mewin ripo ndir je bedo maŋon ma ywayo cuny jo pa kado cumbi, aka wiripo ŋeyo kite ma dwoko dhano je maber.

⁷ Omin wan Tikiko ma wamaro m'obedo jatic ma genere, aka jatic nyawotan i tic pa Rwoth, bino miyo win wac je ma mako kwoŋan.

⁸Aoro go bongi win wonyali waco riwin paka wanitie, gi dwoko cuny win.

⁹Go labino kodi Onesimo, omin wan ma genere ma wamaro, m'obedo acel kwoŋ win. Jobino waco riwin gimoro je ma timere ka.

¹⁰Aristariko, manitie i twec kodan, dhiro riwin moth kodi Mariko bende, omin Barinaba. (Witieko winjo wac kwoŋe; joli win go k'obino bongi win).

¹¹Yesu m'ilwoŋo ni Yusito, bende dhiro riwin moth. Jadek me kende a Joyuda ma joyeyo kwoŋ Kristo, ma jotiyo kodan ri Ker pa Were, aka jotieko konyan swa.

¹²Epafra, ma bende obedo acel kwoŋ win, kendo jatic pa Kristo Yesu bende m'otho win. Ndiri je go kwayo riwin gi maro madwoŋ, munyo kwayo Were womiy wicungi matek, ma witegino kareno wiridho paro ma timo gima Were yenyo.

¹³Awon anyalo ridho riwin ni go tiyo riwin matek kodi ri ji ma Lawodisia kodi Hirapoli.

¹⁴Luka, jamilerwa ma wamaro, kodi Dema jodhiro riwin moth pajo.

¹⁵Dhiri win moth mawan ri wutmin wan ma Lawodisia kodi ri dhakodwoŋ Nimfa gi kweth pa jokristo ma cokere i ot pere.

¹⁶K'otiek kisoma riwin balwa me, neni win nike osoma balwa no i kitipa pa jokristo ma Lawodisia bende. Aka wibende soma win balwa ma Jolawodisia jobino dhiro riwin.

¹⁷Aka waci win ri Arikipo ni, “Neni ni icowo tic m'omiyin i tic pa Rwoth.”

¹⁸An, Paulo, andiko riwin moth me gi cingan won; aka wiy win wokiri wowili gi lijegere m'otweyan me! Weyi nema pa Were wobedi kodi win.