Read dhopadhola 1 Jothesalonika 4 Bible Online

1 Jothesalonika 4 - dhopadhola bible

1 Jothesalonika 4

¹Macowe, wutmere, paka witieko fonjere bongi wan kiti kwo ma wiripo bedo gine aka nyaka wisangala Were, onyo wakwayo win, kendo waruma win i nyingi Rwoth Yesu, medere ameda win gi timo ameno.

²Kole wiŋeyo or ma wamiyo win, gi meni pa Rwoth Yesu.

³Me a gima Were mito riwin. Ni wibedi maleŋ aka wiwey kicutho kwo ma kidakana.

⁴Kisi jacwo je kwoŋ win ripo ŋeyo royo ma bedo gi cege i leŋo gi dwoŋ,

⁵makiweno g'awanya ma timo giwickwot pa jokafir ma jokuya Were.

⁶Aka i wac me, wongoye nyatoro ma wotim ri nyawote raco, kosa ma woor kwo pere kicar. Kole watieko waco riwin gime con, munyo wanyutho win gima wikure kwoŋe, nike Were bino cando joma timo kite reco no.

⁷Were k'olwoŋo wan bedo i kwo ma kidakana, to ma leŋo.

⁸Am'omiyo, ŋata kwero fonji me kikwer wac pa dhano, to kwero Were won, ma miyo win Cuny Maleŋ pere.

⁹Ki yenyere ndiko riwin kwoŋ marok ma wiripo bedo gine ri jowot win ma bende joyeyo. Kole wiwegi Were otieko fonjo win paka wiripo marok.

¹⁰Aka adieri wimaro jom'oyeyo ma Makedonia gipi. To wakwayo win, wutmere, ni medi win ameda timo ameno.

¹¹Bedi win gi maro ma bedo ma wikudere, kareno wiparo kwoŋ tic mewin kende, aka witiy ri gima nyalo kuro kwo mewin, paka watieko waco riwin wok con.

¹²Meno aka wibino bedo gi kwo m'otire ruwaŋ joma fodi ni woko, ŋey wikiri wibedi ma wicando gimoro.

¹³Wutmera, amito wiŋeyi odoco kwoŋ jom'otho, aka nyaka wik'okumi pa joma jongoye gi geno.

¹⁴Ato paka wayeyo ni Yesu otho aka ocerino kendo, meno wayeyo ni Were bende bino dwoko joma jotieko nindo i Yesu kanyacel gine.

¹⁵Kole wanyutho win gime wok i wac pa Were, nike wan ma fodi wakwo, aka wadoŋ cuka hongo ma dwoko pa Yesu, wak'otel cerino ri joma onyo jonindo.

¹⁶Derino ma wodho or bino bedo, to dwondi malaika madwoŋ winjere, kodi dwondi gwara pa Were, aka Rwoth won bino loro piny wok i polo! Jom'otho munyo joyeyo Kristo jobino telo cerino;

¹⁷aka ŋey ibino coko wan ma wakwo i hongo no, kanyacel gi jo i pondeponde kidho romo gi Rwoth i hongo malo. Ameno wabino bedo gi Rwoth ndir je.

¹⁸Am'omiyo, kwey win cuny jowoti win gi wac me.