Read dhopadhola Yosuwa 10 Bible Online

Yosuwa 10 - dhopadhola bible

Yosuwa 10

¹Tekin Adonizedek kere ma Yerusalem owinjo paka Yosuwa oyido otieko mako Ay, aka oyido otieko reyo kicutho, ka timo ri Ay kodi kere mere paka oyido otieko timo ri Yeriko kodi kere mere, kodi paka jopiny ma Gibeon oyido jotieko timo siem gi Isiraili aka oyido jonitie i dier jo,

²lworo omako jo tektek, rupiri Gibeon oyido obedo tindi madwoŋ swa, paka acel kwoŋ tindin pa kere, aka kwoŋbedo oyido dwoŋ loyo Ay, aka cwo mere je oyido jomeni.

³Ameno to Adonizedek kere ma Yerusalem dhiro ri Hoham kere ma Hebron, ri Piram kere ma Yarmuth, ri Yafia kere ma Lakis, kodi ri Debir kere ma Egilon, ka waco ni,

⁴“Biye win malo bongan wikonyan, aka wamonji Gibeon; rupiri otieko timo siem gi Yosuwa kodi Joisiraili.”

⁵Kenyo to kerin abic apa Joamor, kere ma Yerusalem, kere ma Hebron, kere ma Yarmuth, kere ma Lakis, kodi kere ma Egilon, jocoko jolweny pajo, to jokidho malo gi jolweny pajo je to joketho kambi pajo kwoŋ Gibeon, to jotimo lweny kwoŋe.

⁶Aka cwo ma Gibeon jodhiro ri Yosuwa wac i kambi i Gilgal, ka jowaco ni, “Ikir'ilwogi cingin kwoŋ ŋecin perin, biye bongi wan piyo, aka ibothi wan, aka ikony wan; kole kerin je mapa Joamor ma jobedo i piny matendere jocokere kwoŋ wan.”

⁷Ameno to Yosuwa idho malo wok Gilgal, go kodi ji je ma lweny gi go, kodi cwo ma jomeni je ma jocwiny.

⁸To Rwoth waco ri Yosuwa ni, “Ikir'ilwor jo, rupiri atieko ketho jo i cingin; ongoye kada ŋat'acel ma lacungo i waŋin.”

⁹Ameno to Yosuwa podho kwoŋ jo abwap, kareno otieko ŋanjo kidho malo wor je wok Gilgal.

¹⁰To Rwoth bolo jo i kirin ruwaŋ Isiraili, to neko jo gi yaŋ madwoŋ i Gibeon, to riemo jo i royo ma loro ma Bethhoron, to rwadho jo piny tundo kiri Azeka kodi Makeda.

¹¹Aka munyo oyido joringo ruwaŋ Isiraili, munyo oyido joloro piny i kamaloro ma Bethhoron, to Rwoth dwiro piny telin madongo wok i polo kwoŋ jo tundo kiri Azeka, to jotho; nitie megi m'oromo ma jotho ro pe loyo ji meno ma Isiraili m'oneki jo g'abor.

¹²Kenyo to Yosuwa luwo gi Rwoth i ndelo ma Rwoth omiy'iye Joamor ri cwo ma Isiraili; to waco ruwaŋ Isiraili ni, “Waŋceŋ, cungi m'ikikithin i Gibeon, aka in Dwe i milelo Ayijalon.”

¹³To waŋceŋ cungo ma k'okithin, dwe bende to cungo ma k'okithin, cuka nono no oculo kwor kwoŋ jokwor pajo. Gime k'ondiki i kitawo pa Jasar ni waŋceŋ ladoŋ i dier polo, aka k'okwakere podho cegin ma ndelo gipi.

¹⁴Oyido fodi nger ndelo no k'obedo con mere kosa kada rumacen, ma Rwoth owinj'iye dwondi dhano; kwoŋbedo Rwoth olwenyo ri Isiraili.

¹⁵Kenyo to Yosuwa gik, kodi Isiraili je gi go, i kambi ma Gilgal.

¹⁶Kerin abic me to joringo, to jopondo i ŋungu i Makeda.

¹⁷T'iwaco ri Yosuwa ni, “Onwaŋ kerin abic, jopondo i ŋungu i Makeda.”

¹⁸Yosuwa to waco ni, “Ŋili win woko telin madongo i dhok ŋungu, aka wikethi cwo cegin gine ma kuro jo;

¹⁹to wikiri wibedi kenyo wiwegi ka witieko riemo jokwor mewin, wimonji jo gi yucen pajo, aka wikiri wiyey jowodonji i tindin madongo pajo; rupiri Rwoth Were mewin otieko ketho jo i cingi win.”

²⁰Munyo Yosuwa kodi Joisiraili jotieko cowo neko jo gi yaŋ madwoŋ, cuka orey jo woko, aka munyo ji ma joboth kwoŋ jo jodonjo i tindin madongo m'otinda,

²¹ji je jogik i siem bongi Yosuwa i kambi i Makeda; aka ongoye dhano kad'acel m'obidho lewe kwoŋ dhano moro je kwoŋ Joisiraili.

²²To Yosuwa waco ni, “Yaw win dhok ŋungu, aka wikel woko kerin abic no bongan wok i ŋungu.”

²³To jotimo ameno, jowodho woko to jotero kerin abic no bongi Yosuwa wok i ŋungu, kere ma Yerusalem, kere ma Hebron, kere ma Yarmuth, kere ma Lakis kodi kere ma Egilon.

²⁴Aka munyo jowodho woko kerin no bongi Yosuwa, Yosuwa to lwoŋo cwo je ma Isiraili, to waco ri jomituka pa cwo ma lweny m'oyido jokadho gine ni, “Core win cegin, kethi win tiendi win i ŋuti kerin me.” To jocore cegin, to joketho tiendi gin i ŋuti jo.

²⁵Yosuwa to waco rijo ni, “Wikiri wibedi malwor kosa wibwoki; bedi win matek kodi jomiseni; kole Rwoth latimo ameno ri jokwor mewin je ma wigore gi jo.”

²⁶Aka rumacen to Yosuwa rwadho jo piny, to neko jo, to liero jo i win abic. To joliero i wi yen tundo othieno;

²⁷to munyo waŋceŋ podho, Yosuwa owodho or, to jokwanyo jo piny wok i yen, to jobolo jo i ŋungu kam'oyido jopond'iye, to jojengo telin madongo i dhok ŋungu, ma fodi nitie kenyo kiri pama.

²⁸Yosuwa to mako Makeda i ndelo no, to rwadho piny gi kere mere gi lew abor mabith; oreyo woko kicutho kisi dhano manitie iye, k'oweyo ŋatimoro; to timo ri kere ma Makeda paka oyido otieko timo ri kere ma Yeriko.

²⁹Kenyo to Yosuwa medere wok Makeda gi Joisiraili je, i Libina to lwenyo kodi Libina;

³⁰to Rwoth bende ketho Libina kodi kere mere i cingi Isiraili; to bende rwadho piny gi lew abor, gi kisi dhano ma iye; ongoye ŋata go oweyo iye; to timo ri kere mere paka oyido otieko timo ri kere ma Yeriko.

³¹To medere wok Libina, kanyacel gi Joisiraili je, i Lakis, to thoko woko, to cako lweny gine.

³²Rwoth to miyo Lakis i cingi Isiraili, to mako i ndelo mar'ario, to rwadho piny gi lew abor, gi kisi dhano je ma iye, paka oyido otieko timo ri Libina.

³³Kenyo to kere Horam ma Gezer ay malo konyo Lakis; to Yosuwa rwadho go piny gi ji pere cuka go k'oweyo dhano m'odoŋ.

³⁴Wok Lakis Yosuwa to medere kodi Joisiraili je i Egilon; jothoko to jocako lweny gine;

³⁵aka jomako i ndelo no, to jorwadho piny gi lew abor; aka kisi dhano ma iye t'ireyo kicutho i ndelo no, paka oyido otieko timo ri Lakis.

³⁶Kenyo to Yosuwa kidho malo kodi Isiraili je wok Egilon kiri Hebron;

³⁷to jomako, to jorwadho piny gi lew abor, aka kere mere kodi tindin mere, gi kisi dhano je ma iye; ongoye ŋata go oweyo, paka oyido otieko timo ri Egilon, to reyo woko Hebron kicutho gi kisi dhano je ma iye.

³⁸Yosuwa kodi Isiraili je, jowiro ŋey jo ri Debir to jocako lweny gine,

³⁹to mako Debir gi kere mere kodi tindin mere madongo; to rwadho jo piny gi lew abor, to reyo kicutho dhano je ma iye; ongoye ŋat'oweyo; paka oyido otieko timo ri Hebron kodi ri Libina gi kere mere, ameno bende apaka otimo ri Debir kodi ri kere mere.

⁴⁰Ameno Yosuwa okengila piny je, piny matendere kodi yupiny kodi piny m'opiele gi ma kamaloro, gi kerin pajo je; m'ongoye m'oweyo, to reyo woko gimoro je ma ywe, paka Rwoth Were pa Isiraili owodho or.

⁴¹To Yosuwa rwadho jo piny wok Kades Barineya kiri Gaza, kodi piny ma Gosen je, tundo kiri Gibeon.

⁴²Yosuwa to kwanyo kerin me je gi lowo pajo i hongo moro, rupiri Rwoth Were pa Isiraili olwenyo rijo.

⁴³Rumacen Yosuwa gi Isiraili je jodok i kambi i Gilgal.