Read dhopadhola Yosuwa 15 Bible Online

Yosuwa 15 - dhopadhola bible

Yosuwa 15

¹Mic pa nono pa nyikway Yuda cungo kwoŋ pecin pajo otundo yuthenge ma yupiny tundo i kew ma Edom, tundo i thim ma Zin i kamabor mere loyo yupiny.

²Aka kew pajo ma yupiny oringo wok i gike ma Nam ma Cumbi, wok i coŋino ma ŋiyo yupiny;

³kadho yupiny to idho malo ma Akirabim, luwo gi Zin, to medere malo ma Kades Barineya, aka luwo gi Heziron, to medere kiri Adar, to goyo kona kidho Karka,

⁴yu Azimon, to wok kodi i pi ma mol ma Misir, aka tundo i gike mere i nam. Me labedo kew mewin ma yupiny.

⁵Aka kew ma yuwok ceŋ obedo Nam ma Cumbi, tundo i gike ma Yordan. Aka kew ma thenge ma yumalo ringo wok i coŋino ma nam wok i gike ma Yordan;

⁶aka kew no medere kiri Beth Hogla, to luwo gi yumalo ma Beth Araba; to kew medere kiri i tele pa Bohan, wod pa Ruben;

⁷to kew medere kiri Debir wok i milelo ma Akor, aka ameno yuthenge ma yumalo, goyo kona yu Gilgal, m'obedo kama ŋiyere gi kama idho Adumim, manitie yuthenge ma yupiny ma milelo; aka kew luwo gi pi ma Ensemes, to gik i Enrogel;

⁸kenyo to kew medere i milelo pa wod pa Hinom i kamaloro pa Joyebus (meno Yerusalem) aka kew no medere kiri wi got ma ŋare kwoŋ milelo pa Hinom, yupodho ceŋ, i gike ma yumalo ma milelo pa Refayim;

⁹kenyo to kew tele tundo i waŋ pi ma Nefitowa, aka wok kenyo kiri i tindin madongo ma Got Efron; onyo to kew goyo kona kidho Bala (meno Kiriath Yerim)

¹⁰to kew goyo kona yupodho ceŋ ma Bala tundo Got Edom, luwo gi kamaloro ma yumalo ma Got Yerim (meno Kesalon) to loro piny tundo Bethsemes to luwo gi Timina;

¹¹kew kadho woko ma kamaloro matendere ma yumalo ma Ekiron, onyo to kew gondere kidho Sikeron, to luwo kadho i Got Bala, to wok kodi Yabinel; onyo to kew tundo i gike i nam.

¹²Aka kew ma yupodho ceŋ oyido obedo Nam madwoŋ gi thenge mere. Me a kew m'othoko nyikway Yuda cungo kwoŋ pecin pajo.

¹³Cungo kwoŋ or pa Rwoth ri Yosuwa, ŋatimoro omiyo Kaleb wod pa Yefune adec i dier nyikway Yuda, Kiriath Arba, meno, Hebron (Arba oyido obedo ba Anak.)

¹⁴To Kaleb gweyo woko wok kenyo wot Anak adek: Sesay, Ahiman kodi Talmay, nyikway Anak.

¹⁵Wok kenyo go okidho malo kwoŋ jopiny ma Debir; aka nyingi Debir macon oyido obedo Kiriath Sefer.

¹⁶To Kaleb waco ni, “Ŋat'omonji Kiriath Sefer to mako, alamiyo go nyaran Akisa paka cege.”

¹⁷To Othiniel wod pa Kenaz, omin Kaleb, mako, to Kaleb miyo go nyare Akisa paka cege.

¹⁸Munyo Akisa obino bongi Othiniel, odwoŋo go ni wokway bamere ndelo. Munyo Akisa loro i wi punda pere, Kaleb openjo go ni, “Imito aŋo?”

¹⁹To Akisa dwoko Kaleb ni, “Miyan silwany; paka onyo itieko jengan i lowo ma yupiny, miyan jwombe bende.” Ameno to Kaleb miyo go jwombe ma yumalo kodi ma yupiny.

²⁰Me a gir'alunja pa nono pa nyikway Yuda cungo kwoŋ pecin pajo.

²¹Tindin madongo m'obedo apa nono pa nyikway Yuda i witum ma yupiny, yuthenge ma kew kodi Edom, oyido jobedo Kabzil, Eder, Yagur,

²²Kina, Dimona, Adada,

²³Kedes, Hazor, Ithinan,

²⁴Zif, Telem, Beyaloth,

²⁵Hazor Hadata, Kerioth Heziron (meno, Hazor),

²⁶Amam, Sema, Molada,

²⁷Hazar Gada, Hesimon, Bethpelet,

²⁸Hazarsual, Berseba, Biziothia,

²⁹Bala, Iyim, Ezem,

³⁰Elitolad, Kesil, Horima,

³¹Ziglag, Madimana, Sansana,

³²Lebayoth, Silihim, Ayin, kodi Rimon: Joje, tindin madongo piero ario g'abuŋwen, gi calin pajo.

³³Aka yu tiendi got ma yupodho ceŋ, Esitayol, Zora, Asina,

³⁴Zanowa, Enganim, Tapuwa, Enam,

³⁵Yarmuth, Adulam, Soko, Azeka,

³⁶Sarayim, Adithayim, Gedera, Gederothayim: Tindin madongo apar g'ario gi calin pajo.

³⁷Zenan, Hadasa, Migdalgad,

³⁸Dilan, Mizipa, Yokthil,

³⁹Lakis, Bozkath, Egilon,

⁴⁰Kabon, Lamam, Kitlis,

⁴¹Gederoth, Beth Dagon, Nama, kodi Makeda: Tindin madongo apar g'aucel gi calin pajo.

⁴²Libina, Etha, Asan,

⁴³Ifita, Asina, Nezib,

⁴⁴Keyila, Akizib, kodi Maresa: Tindin madongo abuŋwen gi calin pajo.

⁴⁵Ekiron, gi nyir pere kodi calin pere;

⁴⁶wok Ekiron tundo i nam, kodi meno je m'oyido jonitie yuthenge ma Asdod, gi calin pajo.

⁴⁷Asdod, tindin mere kodi calin mere; Gaza, tindin mere kodi calin; kidho i malawa ma Misir, kodi Nam Madwoŋ gi thenge mere.

⁴⁸Aka i piny matendere, Samir, Yatir, Soko,

⁴⁹Dana, Kiriathsana (meno, Debir),

⁵⁰Anab, Esitemowa, Anim,

⁵¹Gosen, Holon, kodi Gilo: Tindin apar g'acel gi calin pajo.

⁵²Arab, Duma, Esan,

⁵³Yanim, Bethtapuwa, Afeka,

⁵⁴Humita Kiriath Arba (meno Hebron) kodi Ziyor: Tindin abuŋwen gi calin pajo.

⁵⁵Mayon, Kamel, Zif, Yuta,

⁵⁶Yezirel, Yokdim, Zanowa,

⁵⁷Kayin, Gibeya kodi Timina: Tindin madongo apar gi calin pajo.

⁵⁸Halhul, Bethzur, Gedor,

⁵⁹Marath, Beth Anoth kodi Elitekon: Tindin madongo aucel gi calin pajo.

⁶⁰Kiriathbal (meno Kiriath Yerim) kodi Raba: Tindin madongo ario gi calin pajo.

⁶¹I thim, Beth Araba, Midin, Sekaka,

⁶²Nibsan, Tindi madwoŋ ma Cumbi, kodi Engedi: Tindin aucel gi calin pajo.

⁶³To Joyebus, jopiny ma Yerusalem, nyikway Yuda k'onyalo gweyo jo woko; ameno to Joyebus jobedo gi nyikway Yuda i Yerusalem tundo gunyo ni.