Read dhopadhola Yosuwa 17 Bible Online

Yosuwa 17 - dhopadhola bible

Yosuwa 17

¹Kenyo t'itimo mic ri nono pa Manase, rupiri go oyido obedo nyathi makayo pa Yakobo. To Makir nyathi pa Manase makayo, ba Giliad, t'imiyo go Giliad kodi Basan, rupiri go oyido obedo jalweny ma siragama.

²T'imiyo pok ri nyikway Manase m'odoŋ, gi pecin pajo, Abieza, Helek, Asiriel, Sekem, Hefer kodi Semida; me oyido obedo nyikway Manase wod pa Yozefu ma cwo, gi pecin pajo.

³Onyo Zelofehad wod pa Hefer nyakwar Giliad, Giliad wod pa Makir, Makir wod pa Manase oyido ongoye gi wote, to nyithindho manyir kende: Me a nyingi nyir pere: Mahila, Nowa, Hogla, Milika kodi Tiriza.

⁴Jobino ruwaŋ Eliazar jacway ri Were i wi migam kodi Yosuwa wod pa Nun kodi jotel, to jowaco ni, “Rwoth owodho or ri Musa ma miyo wan gir'alunja kanyacel gi wade mawan ma cwo.” Riameno cungo kwoŋ or pa Rwoth go omiyo jo gir'alunja i dier wade pa bajo ma cwo.

⁵Ama apaka adec apar opodho ri Manase, ketho gicen piny pa Giliad kodi Basan, manitie yuthenge man ca ma Yordan,

⁶rupiri nyithindho pa Manase manyir jojolo gir'alunja kanyacel gi wote. Piny ma Giliad oyido omiy nyikway Manase m'odoŋ.

⁷Adec pa Manase otundo wok Aser tundo Mikmethath, manitie yuwok ceŋ ma Sekem; onyo to kew medere yuthenge ma piny bongi jopiny ma Entapuwa.

⁸Lowo ma Tapuwa obedo apa Manase, to tindi ma Tapuwa i kew pa Manase obedo apa nyikway Isiraili.

⁹Onyo to kew loro piny yu pi ma mol Kana. Tindin madongo me, yupiny ma pi ma mol, i dier tindin madongo pa Manase, obedo apa Isiraili. Kenyo to kew pa Manase medere yuthenge ma yumalo ma pi ma mol to gik i nam.

¹⁰Lowo ma yupiny obedo apa Isiraili aka meno ma yumalo obedo apa Manase, aka nam ama timo kew mere; yumalo itundo Aser, aka yuwok ceŋ Isakar.

¹¹Iy'adec pa Isakar kodi Aser, Manase oloko Bethsin gi calin mere, Ibilim gi calin mere, jopiny ma Dor gi calin mere, jopiny ma Endor gi calin mere, jopiny ma Tanak gi calin mere, jopiny ma Megido gi calin mere; mar'adek obedo Nafeth.

¹²Kucel nyikway Manase jok'onyalo gweyo woko ji m'oyido jobedo i tindin madongo no, to Jokanan jomedo bedo i lowo no.

¹³To munyo Joisiraili jolokere matek, joketho Jokanan i tic arom, to jok'ogweyo jo woko kicutho.

¹⁴Nyikway Yozefu joluwo gi Yosuwa, ka jowaco ni, “Raŋo imiyo wan adec acel kende ma lowo paka gir'alunja, paka wabedo ji mathoth, ma Rwoth otieko miyo silwany?”

¹⁵Yosuwa to waco rijo ni, “Ka wibedo ji mathoth, kadhi win i lul, wicwadi lowo ma kenyo ri wiwegi i piny pa Joperiz kodi Jorefayim, paka onyo piny matendere ma Efrayim diny riwin swa.”

¹⁶Nyikway Yozefu to jodwoko ni, “Piny matendere diny riwan; kucel Jokanan je ma jobedo i lowo ma milelo jonitie gi cawilin ma nyweny, meno je ma Bethsin gi calin mere kodi meno ma milelo ma Yezirel.”

¹⁷Kenyo to Yosuwa waco ri ot pa Yozefu, ri Joefrayim kodi Manase ni, “Adieri wibedo ji mathoth, aka winitie gi mwamba madwoŋ; wik'obedi kodi adec acel kende,

¹⁸to piny matendere labedo mewin, rupiri kad'obedo lul, wilacwado to wilunjo tundo i kewere mere mabor; rupiri wilagweyo woko Jokanan, kada jonitie gi cawilin ma nyweny, kendo kada jotek.”