Read dhopadhola Yosuwa 5 Bible Online

Yosuwa 5 - dhopadhola bible

Yosuwa 5

¹Munyo kerin je mapa Joamor yombo Yordan yupodho ceŋ, kodi kerin je mapa Jokanan yuthenge ma nam, jowinjo ni Rwoth othwo woko pi ma Yordan ri Joisiraili cuka jotieko por loka, cuny jo opodho, aka miseni moro kendo k'obedo i jo, kwoŋbedo Joisiraili.

²I hongo no Rwoth owaco ri Yosuwa ni, “Tim apalin m'othedhi gi mac aka i thum Joisiraili madirio.”

³Ameno Yosuwa otimo apalin m'othedhi gi mac, to thumo Joisiraili i Gibeyath Haraloth.[1]

⁴Aka me am'obedo atoŋa m'omiyo Yosuwa othumo jo: Jono je ma jobedo cwo ma jowok Misir, jolweny je oyido jotho i ndir ma woth i thim munyo jotieko wok woko ma Misir.

⁵Kada ji je ma jowok oyido otiek thumo, kucel ji je ma jonywole i royo i thim munyo jotieko wok Misir oyido fodi k'othumi jo.

⁶Kole wot Isiraili jowotho ma oro piero aŋwen i thim, cuka nono je, jolweny ma jowok Misir, josika woko, ma jok'owinjo dwondi Rwoth. Were okwoŋere rijo ni jok'oneni lowo m'oyido okwoŋere ri kwarere pajo ni lamiyo wan, lowo ma mol gi cak kodi mo kic.

⁷Ameno obedo nyithindho pajo, ma go odongo jo i kabedo pajo, ma Yosuwa othumo jo; kole jothumere, rupiri oyido fodi jok'othumere i royo.

⁸Munyo thumirok ma nono je orumo, jodoŋ i kabedo pajo i kambi cuka jocango.

⁹Rwoth owaco ri Yosuwa ni, “Konon atieko ŋilo woko kwoŋin wickwot ma Misir.” Aka riameno nyingi kabedo no ilwoŋo ni Gilgal[2] tundo gunyo ni.

¹⁰Munyo Joisiraili joketho kambi i Gilgal, jokuro kalima ma kadho othieno ma k'apar g'aŋwen ma dwe i kam'obipere ma Yeriko.

¹¹I ndelo ma luwo kalima ma kadho, i ndelo no won, jocamo ranyak ma lowo, mugat ma buthow kodi nyingi cemo m'obul.

¹²Aka mana k'obedo kendo i ndelo ma jocam'iye ranyak ma lowo, Joisiraili jok'obedo gi mana kendo; jocamo cemo ma lowo ma Kanan i oro no.

¹³Ndelo acel munyo Yosuwa oyido nitie cegin gi Yeriko, oŋiyo malo to neno dhano m'ocungo yunyime g'abor m'oyuy i cinge. Yosuwa okidho bonge to penjo go ni, “Ibedo acel kwoŋ wan, kosa acel kwoŋ jokwor mawan?”

¹⁴Ŋato odwoko ni, “Akibedo; to paka jamituka pa jolweny pa Rwoth, onyo atieko bino pama.” To Yosuwa podho gi nyime piny to lamo go, to waco rigo ni, “Ioro ŋeca perin timo aŋo, rwoth paran?”

¹⁵Jamituka pa jolweny pa Rwoth owaco ri Yosuwa ni, “Luny woko war ma par tiendin, kole kabedo m'icung'iye leŋ.” To Yosuwa timo ameno.