Read dhopadhola Yosuwa 6 Bible Online

Yosuwa 6 - dhopadhola bible

Yosuwa 6

¹Onyo oyido ocegi waŋkace ma Yeriko gi woko kwoŋbedo Joisiraili; ongoye ŋat'owok kendo ongoye ŋat'odonjo.

²To Rwoth waco ri Yosuwa ni, “Neni, atieko ketho Yeriko i cingin, gi kere kodi cwo mere matek ma jomeni.

³Ibino ŋanjo thoko tindi madwoŋ, cwo je ma jolweny wikidhi withok tindi madwoŋ dicel. Wilatimo ameno ma ndelo aucel.

⁴Aka jocway ri Were i wi migam abirio jolatiŋo gwarin abirio ma tungi wot rombo ruwaŋ kakan; aka i ndelo mar'abirio wibino ŋanjo thoko tindi madwoŋ dibirio, kareno jocway ri Were i wi migam jokudho gwarin.

⁵Aka ka jotimo derino madwoŋ gi tungi wot rombo, tekin wiwinjo derino ma gwarin, nyaka to ji je jokoko gi woy madwoŋ; aka kor ot ma tindi madwoŋ lagore piny kicutho, aka ji jolakidho kisi dhano tirtir gine.”

⁶Ameno Yosuwa wod pa Nun olwoŋo jocway ri Were i wi migam to waco rijo ni, “Kwany win Kakan ma Cikirok, aka weyi jocway ri Were i wi migam abirio jowotiŋ gwarin abirio ma tungi wot rombo ruwaŋ Kakan ma Cikirok pa Rwoth.”

⁷To Yosuwa waco ri ji ni, “Tel win; ŋanji win withoki tindi madwoŋ, aka wiwey cwo ma jotiŋo gilweny jowoluwi ruwaŋ Kakan ma Cikirok pa Rwoth.”

⁸Aka paka oyido Yosuwa otieko oro ji, jocway ri Were i wi migam abirio ma jotiŋo gwarin abirio ma tungi wot rombo ruwaŋ Rwoth to jokidho yumalo, kareno jokudho gwarin, gi Kakan ma Cikirok pa Rwoth m'oyido luwo jo.

⁹To cwo ma jotiŋo gilweny jotelo jocway ri Were i wi migam ma jokudho gwarin, aka jokur ma yucen joluwo Kakan ma Cikirok, kareno gwarin ywak m'ongoye liŋ.

¹⁰To Yosuwa wodho or ri ji ni, “Wikiri wikoki kosa wimiy dwondi win wowinjere, aka wac moro je wokiri wowoki i dhok win, cuka ndelo m'anoor win koko; nyaka to wikoko.”

¹¹Ameno go omiyo Kakan ma Cikirok pa Rwoth woth thoko tindi madwoŋ, woth thoko dicel, to jotundo i kambi, to jonindo i kambi.

¹²Kenyo Yosuwa ocew odikin maŋic, to jocway ri Were i wi migam jokwanyo Kakan ma Cikirok pa Rwoth.

¹³Jocway ri Were i wi migam abirio ma jotiŋo gwarin abirio ma tungi wod rombo ruwaŋ Kakan ma Cikirok pa Rwoth jokadho, kareno jokudho gwarin m'ongoye liŋ; aka cwo ma jotiŋo gilweny jotelo jo, to jokur ma yucen joluwo Kakan ma Cikirok pa Rwoth, kareno ikudho gwarin m'ongoye liŋ.

¹⁴Aka i ndelo mar'ario joŋanjo thoko tindi madwoŋ dicel, to jogik i kambi. Ameno apaka jotimo ma ndelo aucel.

¹⁵I ndelo mar'abirio munyo jocewi odikin maŋic ma nyaka ŋamba cot, to joŋanjo thoko tindi madwoŋ i nger acel won dibirio. Oyido obedo i ndelo no won kende ma joŋanj'iye thoko tindi madwoŋ dibirio.

¹⁶Aka ma dibirio, munyo jocway ri Were i wi migam jotieko kudho gwarin, Yosuwa owaco ri ji ni, “Koki win, rupiri Rwoth otieko miyo win tindi madwoŋ.

¹⁷Aka tindi madwoŋ kodi gimoro je manitie i iye ilamiyo Rwoth mar'areya; kende Rahab m'obedo malaya kodi ji manitie gi go i ot ama wowey jo, rupiri go okano jopendo ma waoro.

¹⁸To win, gwokere win kwoŋ gigipiny m'omiy mar'areya, kosa ka witieko miyo jo wikwanyo gimoro je kwoŋ gigipiny m'omiy to witimo kambi ma Isiraili gimoro mar'areya, to wikelo teko kwoŋe.

¹⁹To feza je gi zahabu, kodi gigipiny ma ywel kodi nyweny, jobedo maleŋ ri Rwoth; jolakidho i od pesa pa Rwoth.”

²⁰Ameno ji jokoko, t'ikudho gwarin. Tekin ji jowinjo derino ma gwarin to ji jokoko malo swa, to kor ot gore piny kicutho, ameno ji jodonjo i tindi madwoŋ, kisi dhano tirtir ruwaŋ go to jomako tindi madwoŋ.

²¹Kenyo joreyo woko kicutho kisi gimoro je ma tindi madwoŋ cwo gi mon, jomathindho kodi jom'oti, megikwe, rombo, gi punde, gi lew abor.

²²Yosuwa to waco ri cwo ario m'oyido jokadho dwaro nyaliŋliŋ ma piny ni, “Kidhi win i ot pa malaya, aka wiwodhi go, kodi jono je ma jobedo apere, paka wikwoŋere rigo.”

²³Ameno to cwo m'oyido jobedo jopendo jodonjo, to jowodho Rahab gi bamere gi min gi wutmin kodi jono je ma jobedo apere; to jokelo wade pere je, to jojengo jo woko ma kambi ma Isiraili.

²⁴To jowaŋo tindi madwoŋ gi mac, kodi gimoro je manitie i iye; kwanyowoko feza gi zahabu, gi gigipiny ma ywel kodi nyweny, joketho i od pesa ma Ot pa Rwoth.

²⁵To Rahab m'obedo malaya, kodi ji ma ot pa bamere, kodi jono je ma jobedo apere, Yosuwa obotho jo makwo; aka go obedo i Isiraili kiri gunyo ni, rupiri go okano jopendo ma Yosuwa ooro timo nyaliŋliŋ i Yeriko.

²⁶Yosuwa oketho kwoŋirok kwoŋ jo i hongo no, ka waco ni, “Kwoŋ ruwaŋ Rwoth ri ŋatimoro je m'oay to geto kendo tindi madwoŋ me, Yeriko.” “Lakeŋ kayo pere nyaka to jengo sigingi mere, aka lakeŋ ocoko pere nyaka to ketho waŋkace mere.”

²⁷Ameno to Rwoth bedo gi Yosuwa; aka oŋeyere i piny no parom.