Read dhopadhola Yosuwa 8 Bible Online

Yosuwa 8 - dhopadhola bible

Yosuwa 8

¹Kenyo to Rwoth waco ri Yosuwa ni, “Ikir'ilwor kosa ikir'ibwoki; kadhi gi ji ma jolwenyo je, aka ay malo, kidhi kiri Ay, par ni atieko ketho i cingin kere ma Ay, kodi ji pere, tindi pere madwoŋ kodi piny pere.

²Ibino timo ri Ay kodi kerin mere paka cango itimo ri Yeriko kodi kere mere; kwanyowoko mugugu gi dhok mere wikiri wikwany paka gim'onyaga ri wiwegi; wikethi apondi yuŋey tindi kwoŋ tindi madwoŋ.”

³Ameno Yosuwa oay, kodi ji je ma jolweny, kidho malo i Ay. Yosuwa oyero cwo 30,000 ma jomeni aka jocwiny, to dhiro jo woko wor.

⁴Ooro jo ni, “Ciki ithi win, wibino nindo apondi kwoŋ tindi madwoŋ, yucen mere; wikiri wikidhi bor swa gi tindi madwoŋ, to wijoje bedi win ma wiyikere.

⁵An kodi ji je ma jonitie kodan walacore cegin gi tindi madwoŋ. Aka ka jowok woko romo gi wan, paka con mere, waladwire ruwaŋ jo;

⁶to jowok woko ka watieko ngoye, cuka watieko ywayo jo woko bor gi tindi madwoŋ; kole jolawaco ni, ‘Jodwire kwoŋ wan, paka con.’ Ameno waladwire woko kwoŋ jo; nyaka to wiay malo wok i dudi.

⁷Wiay malo wok i dudi, to wimako tindi madwoŋ; rupiri Rwoth Were mewin laketho jo i cingi win.

⁸Aka ka witieko mako tindi madwoŋ; wibino cwinyo tindi madwoŋ no gi mac, kareno witimo paka Rwoth otieko waco; ciki ithi win, witim paka atieko oro win.”

⁹Ameno to Yosuwa dhiro jo woko; to jokidho kam'otim'iye apondi, to jobedo i dier Bethel kodi Ay, yupodho ceŋ ma Ay; to Yosuwa nindo wor no i dier ji.

¹⁰Yosuwa ocew odikin maŋic to lwoŋo ji kanyacel, to kidho malo, gi jodongo ma Isiraili, ruwaŋ ji i Ay.

¹¹Ji je ma jolweny m'oyido jonitie gi go jokidho malo, to jocore cegin gi tindi madwoŋ, to joketho kambi pajo yuthenge ma yumalo ma Ay, gi milelo i dier jo kodi Ay.

¹²Yosuwa okwanyo cwo cegin 5,000 to ketho jo iy'apondi i dier Bethel kodi Ay, yupodho ceŋ ma tindi madwoŋ.

¹³Ameno joketho jolweny, kodi kitipa je m'oyido nitie yumalo ma tindi madwoŋ kodi jokur mere ma yucen yupodho ceŋ ma tindi madwoŋ. To Yosuwa nindo i milelo wor no.

¹⁴Aka munyo kere ma Ay oneno gime go kodi ji pere je, cwo ma tindi madwoŋ, jowok woko odikin maŋic ma comirok gi Isiraili kama lweny ogunj'iye kamaloro ma kidho i Araba, ma jok'oŋeyo ni oyido apondi nitie yucen ma tindi madwoŋ.

¹⁵Yosuwa kodi Joisiraili je jorendere p'igoyo jo ruwaŋ jo, to joŋweco yuthim.

¹⁶Ameno t'icoko ji je m'oyido jonitie i tindi madwoŋ olwoŋo jo kanyacel ma riemo jo, aka munyo joriemo Yosuwa, oyway jo woko wok i tindi madwoŋ.

¹⁷Ongoye kada jacwo acel m'odoŋ i Ay kosa Bethel, ma k'owoki riemo Isiraili; joweyo tindi madwoŋ m'oyawere, to joriemo Isiraili.

¹⁸Kenyo to Rwoth waco ri Yosuwa ni, “Tel toŋ manitie i cingin woŋiy Ay; kole akidho ketho i cingin.” To Yosuwa telo toŋ m'oyido nitie i cinge to ŋiyo tindi madwoŋ.

¹⁹Tekin go telo cinge, to jolweny ma jonitie iy'apondi joay piyo piyo wok i kabedo pajo to jodonjo i tindi madwoŋ to jomako; jokwakere i tindi madwoŋ to jowaŋo.

²⁰Aka munyo cwo ma Ay jowire to joŋiyo yucen, oyido nitie yiro ma tindi madwoŋ m'okidho malo i polo; to jongoye gi meni ma ŋwec kome kosa koca, rupiri ji ma joringo i thim jowire aŋey kwoŋ joma riemo jo.

²¹Munyo Yosuwa kodi Joisiraili je joneno ni apondi oyido oloyo kor tindi madwoŋ; aka yiro ma tindi madwoŋ okidho malo, kenyo to jowire to joneko cwo ma Ay.

²²To cwo megi jobino wok i tindi madwoŋ romo gi jo; ameno Joisiraili jothoko jo, moro yuthenge acel, kodi megi yuthenge man; to Joisiraili neko jo, cuka ongoye kad'acel m'odoŋ makwo kosa m'okwale.

²³To omaki kere ma Ay makwo, t'itero ri Yosuwa.

²⁴Munyo Isiraili otieko cowo neko jopiny je ma Ay i kam'othangere ma thim kama joriem'iye jo, aka munyo joje tundo kiri i macowe jotieko tho g'abor mabith, Joisiraili je jogik i Ay to jomonjo g'abor mabith.

²⁵Aka joma jotho ndelo no cwo gi mon je, oyido obedo 12,000 ji je ma Ay.

²⁶Rupiri Yosuwa k'odwoko cinge m'otelo gine toŋ cen, cuka otieko reyo woko jopiny ma Ay kicutho.

²⁷Kende dhok kodi gim'onyaga ma tindi madwoŋ no ma Isiraili omako paka gipajo ma jonyaga, cungo kwoŋ wac pa Rwoth m'ooro Yosuwa.

²⁸Ameno to Yosuwa waŋo Ay, to loko kidhur gunda ma cil gi cil, paka fodi nitie gunyo ni.

²⁹To liero malo kere ma Ay wi yath tundo kiri othieno; aka munyo waŋceŋ podho, Yosuwa owodho or, t'igonyo delkwoŋe wok kwoŋ yath, to jojengo i dhiot ma waŋkac ma tindi madwoŋ, to jodhuro kwoŋe telin, ma fodi cungo kenyo gunyo ni.

³⁰Kenyo to Yosuwa geto migam wi Got Ebal ri Rwoth, Were pa Isiraili,

³¹paka Musa ŋeca pa Rwoth oyido ooro Joisiraili, paka ondiki i kitawo ma cik pa Musa, migam ma telin ma dhano fodi k'oketho cuma moro kwoŋe; to jomiy'iye mic awaŋa ri Rwoth, to jomiyo cowirok ma siem.

³²Aka kenyo i nyim Joisiraili, ondiko i wi telin nyawoti cik pa Musa, m'oyido otieko ndiko.

³³Aka Joisiraili je, jokicar kodi jopiny, jodongo kodi jotel gi jothum banja pajo, jocungo yuthenge m'oŋiyere gi kakan ruwaŋ jocway ri Were i wi migam ma Jolevi ma jotiŋo Kakan ma Cikirok pa Rwoth, adec kwoŋ jo ruwaŋ Got Gerizim aka adec man kwoŋ jo ruwaŋ Got Ebal, paka Musa ŋeca pa Rwoth oyido kutho owodho or, ni joripo miyo Joisiraili silwany.

³⁴Aka rumacen mere to soma wac je ma cik, silwany kodi kwoŋ, paka nitie i gimoro je m'ondiki i kitawo ma cik.

³⁵Ongoye wac kwoŋ gima Musa owodho or ma Yosuwa k'osoma ruwaŋ cokirok je ma Isiraili, kanyacel gi mon, nyithindho kodi jokicar ma jobedo i dier jo.