Read dhopadhola Yosuwa 9 Bible Online

Yosuwa 9 - dhopadhola bible

Yosuwa 9

¹Munyo kerin je m'oyido jonitie yombo Yordan i piny matendere kodi i piny m'opiele joje yuthengi Nam madwoŋ kadho Lebanon, Johiti, Joamor, Jokanan, Joperiz, Johivi kodi Joyebus, jowinjo gime,

²jocokere kanyacel gi cuny jo acel lweny gi Yosuwa kodi Isiraili.

³To munyo jopiny ma Gibeon jowinjo gima Yosuwa oyido otieko timo ri Yeriko kodi Ay,

⁴to joridho wondo go. Jokidho to joyiko mic rijo wegi, to jociwo punde pajo gi kutiyin m'ojwer ojwer, piendere ma vini, m'ojwer aka m'oyec to jokwoyo,

⁵gi ware m'ojwer aka ogoy'iye kiremo i tiendi jo, gi nangin m'ojwer; aka mic pajo je oyido othwo aka lengalenga.

⁶To jokidho bongi Yosuwa i kambi i Gilgal, to jowaco rigo kodi Joisiraili ni, “Wawok i piny mabor; riameno tim gi wan cikirok.”

⁷To cwo ma Isiraili jowaco ri Johivi ni, “Kono miti wibedo i dier wan; onyo wanotim gi win cikirok nedi?”

⁸Jowaco ri Yosuwa ni, “Wabedo ŋecin perin.” To Yosuwa penjo jo ni, “wijokune? Aka wiwok yukune?”

⁹Jodwoko go ni, “Ŋecin perin jowok i piny mabor swa, kwoŋbedo nyingi Rwoth Were perin; kole watieko winjo radwok ma mako kwoŋe, kwoŋ kisi gimoro je ma go otimo i Misir,

¹⁰kodi kwoŋ kisi gimoro je ma go otimo ri kerin ario apa Joamor m'oyido jonitie yombo Yordan, kere Sihon ma Hesibon, kodi kere Og ma Basan m'obedo i Asiteroth.

¹¹Aka jotel mawan kodi jopiny je ma piny mawan jowaco riwan ni, ‘Kwany win cemo i cingi win ma woth; wikidhi wirom gi jo, aka wiwaci rijo ni, “Wabedo ŋecin perin; biye pama me, tim gi wan cikirok.” ’

¹²Me mugat mawan; oyido fodi lieth munyo wakwanyo i udi mawan paka cemo mawan ma woth, i ndelo ma wacak'iye woth bino bongin, t'onyo pama, neni, othwo aka ŋinyere;

¹³piendere ma vini me oyido jonyen munyo wapoŋo jo, t'onyo neni, jobare aka nangin me gi ware mawan onyo joti wok kwoŋ woth mabor.”

¹⁴Ameno to cwo no jokwanyo pok pajo, to jobedo ma jok'openjo Rwoth gir'atima.

¹⁵Aka Yosuwa otimo siem gi jo, to timo cikirok gi jo, ma miyo jowokwo; to jotel ma kacokirok jokwoŋere rijo.

¹⁶I gike ma ndelo adek munyo jotieko timo cikirok gi jo, jowinjo ni oyido jobedo joger pajo, aka oyido jobedo i dier jo.

¹⁷To Joisiraili joay malo to jotundo i tindin pajo madongo i ndelo mar'adek. Tindin pajo madongo no oyido jobedo Gibeon, Kepira, Beroth kodi Kiriath Yerim.

¹⁸To Joisiraili jok'oneko jo, rupiri jotel ma kacokirok oyido jotieko kwoŋirok rijo gi Rwoth, Were pa Isiraili. Gikenyo to kacokirok je joŋunyaŋunya kwoŋ jotel.

¹⁹To jotel je jowaco ri kacokirok je ni, “Watieko kwoŋere rijo gi Rwoth, Were pa Isiraili, aka pama onyo wakinyali geyo jo.

²⁰Walatimo rijo gime, to waweyo jokwo, ka k'obedo ameno to keme bedo kwoŋ wan, kwoŋbedo cikirok ma wakwoŋere rijo.”

²¹Jotel to jowaco rijo ni, “Weyi jowokwo.” Ameno to jolokere jobar yen kodi jokulo ri kacokirok je, paka jotel oyido jotieko waco rijo.

²²Yosuwa to lwoŋo joje, to waco rijo ni, “Raŋo wiwondo wan ka wiwaco ni, ‘Wabor swa gi win, munyo wibedo i dier wan?’

²³Onyo pama okwoŋ win, aka jomegi kwoŋ win noknok jolabedo ŋecin, jobar yen gi jokulo ri Ot pa Were paran.”

²⁴To jodwoko Yosuwa ni, “Rupiri oyido otiek waco ri ŋecin perin iy'adieri ni Rwoth Were perin oyido ooro ŋeca pere Musa miyo lowo je, kodi ma reyo woko joma bedo i piny no je ruwaŋ win; riameno lworo madwoŋ oyido omako ri kwo mawan kwoŋbedo win, to watimo gime.

²⁵Aka onyo pama, wan ee i cingin: Tim gimaber aka otire rin atima riwan.”

²⁶Ameno otimo rijo, to gonyo jo wok i cingi Joisiraili aka jok'oneko jo kendo.

²⁷Yosuwa oloko jo i ndelo no jobar yen kodi jokulo ri cokirok kodi ri migam pa Rwoth, m'omedere tundo i ndelo me, i kabedo me ma go oyer.