Read dhopadhola 2 Jothesalonika 3 Bible Online

2 Jothesalonika 3 - dhopadhola bible

2 Jothesalonika 3

¹Macowe, wutmera, kway win riwan, ni mikwenda pa Rwoth womedere nyay mayot to limo dwoŋ, paka obedo i dier win.

²Kway win bende ni Were wobothi wan kwoŋ joreco, rupiri k'obedo ni dhano je nigi yeyo.

³To Were genere, aka go bino miyo win meni to kuro win maber kwoŋ Ŋatarac.

⁴Wanitie gi geno kwoŋ win i Rwoth ni witimo gima waoro win, aka wibino medere gi timo ameno.

⁵Weyi Rwoth womiy wibedi gi mar pa Were i cuny win kodi ciro teko paka Kristo ociro.

⁶I nyingi Rwoth Yesu Kristo waoro win, wutmere; eye win kwoŋ jom'oyeyo je ma jotimo nyapo, ma jokimaki fonji ma wamiyo win.

⁷Kole wiwegi wiŋeyo maber ni wiripo luwo kwo ma wanyutho win. Wakibedo manyap munyo wanitie gi win,

⁸aka wakicamo cemo pa nyatoro ma wakiculo. Kucel, watiyo aka waol wor g'odieceŋ ŋey wakiri wakel peko ri nyatoro kwoŋ win.

⁹Watimo ama ki rupiri wakiripi yenyo kwoŋ win kony; to watimo ameno ma miyo win ranen aluwa.

¹⁰Ato munyo wanitie gi win wamiyo win cik ni, “Ŋata kimiti tic wokiri wocemi.”

¹¹Wawaco ama rupiri wawinjo nike nitie jomoro i dier win ma jonyap, ma jokitim gimoro je kwanyo woko riwirok i tic pa wadi gin ayino.

¹²I nyingi Rwoth Yesu Kristo waoro, odoko wakwayo ji ma pameno jowoyiki kiti gin, aka jowocaki tic, ŋey jowolimi gima konyo kwo pajo wegi.

¹³Aka riwin, jowot wan, wikiri wiol gi timo gim'otire.

¹⁴Ka nyatoro nikenyo ma k'owinji mikwenda ma wadhiro riwin i balwa me, kaŋasa win go maber, aka wikiri witiyere gine, ŋey wiye wokwoti.

¹⁵To wikiri witer go paka jakwor, kucel fonji win go paka omin win.

¹⁶Weyi Rwoth won, ma poko siem, womiy win siem hongo je kodi i royo je. Rwoth wobedi kodi dhano je kwoŋ win.

¹⁷An Paulo, andiko moth me gi cingan won, aka meno a ranyuth m'aketho i balwin paran je. Me apaka andiko.

¹⁸Weyi nema pa Rwodhiwan Yesu Kristo wobedi gi wijoje.