Read dhopadhola 1 Timothe 1 Bible Online

1 Timothe 1 - dhopadhola bible

1 Timothe 1

¹Balwa m'owok bongi Paulo, jamoor pa Kristo Yesu ro or pa Were ma Jaboth mawan kodi Kristo Yesu m'obedo geno mawan.

²Ri Timothe, wodan adieri i yeyo. Weyi Were Bawan kodi Kristo Yesu Rwodhiwan womiy win nema, wor gi siem.

³Ayenyo ni ibedi Efeso paka aorin munyo oyido anitie i woth paran acomo yu Makedonia. Juki joma kelo kenyo fonji ma twodo jowowey.

⁴Wac rijo jowowey kigana ma kiniaŋere kodi bol m'oruwo ma nyingi kwarere pajo, rupiri gino kelo piem kendekende, jokikony can pa Were, ma ŋeyere i yeyo.

⁵Atoŋa ma or me obedo mar, aka wok i cuny m'olony, kodi i paro m'otire, kodi i yeyo mar'adieri.

⁶Jomogo joloko ŋey gin ri gigipiny me to jorwenyo royo pajo i piem ma miŋo.

⁷Jorodo bedo jofonji ma cik pa Were, to jokuya kiri dwoŋ wac pajo wegi, kosa gigipiny ma joluwo kwoŋe gi miseni.

⁸Waŋeyo ni Cik ber k'oor i royo m'otire.

⁹Aka waŋeyo, nike cik k'otimi ri ji mabeyo, to ri joma turo cik kodi jowictek, ri joma kilwor Were kodi joreco, ri joma kileŋ kodi joma kidew kwoŋ Were, ri joma neko bacere pajo kodi megi jo, ri joma neko jowoti gin.

¹⁰Ri jokidakana, ri jom'okom i timo giwickwot, ri joma tana ji, kodi jotwodo, gi joma wodho kony ma twodo, kosa joma timo gimoro je m'opokere kodi fonji m'otire

¹¹ma cungo kwoŋ Wac Manyen Maber ma didwoŋ, ma Were ma ripo g'apaka oketho i cingan.

¹²Afoyo Kristo Yesu Rwodhiwan, m'omiyan meni ma tic me, rupiri go oteran paka ŋata genere to kethan tiyo rigo.

¹³Makada nende con oyido aluwo kicar kwoŋe, kareno oyido alwenyo gi ji pere munyo aluwo kicar kwoŋe. To Were otimo kodan wor, rupiri oyido angoye gi yeyo aka oyido akuya kiri gim'atimo.

¹⁴Rwoth okonjo ran nema pere m'oasere to miyan yeyo gi mar manitie i Kristo Yesu.

¹⁵Me obedo wac mar'adieri, ma mitere ajola gi yeyo: Ni Kristo Yesu obino i piny botho joreco. Aka aŋat'aloyo i raco;

¹⁶to ro wac me Were onyuthan wor, ŋey Kristo Yesu wonyuthi diyo ici pere i tiyo kwoŋan, ŋatarac maloyo joreco je, paka ranen ri joma rumacen di joyeyo go to jolimo kwo makirum.

¹⁷Ri Kere ma cil gi cil, makitho aka kinenere, m'obedo Were kende, wor gi dwoŋ wobedi cil gi cil. Ameno.

¹⁸Timothe, nyathi paran, amiyin or me ma ripo gi wac m'otuci kwoŋin con. Weyi wac no wobedi gilweny perin munyo ilwenyo lweny maber,

¹⁹aka icwire kwoŋ yeyo perin kareno paro ma cunyin otire. Jomegi jok'owinjo paro ma cuny jo, to jonyeko woko yeyo pajo.

²⁰I dier jo nitie Himenawo kodi Alekizanda, m'atieko bolo jo i meni pa Sitan, ŋey wofonji jo weyo luwo marac kwoŋ Were.